ନୂଆଦିଲ୍ଲୀ, ୨।୧(ପି.ଟି.)-
ସିନିୟର ଓପନର ରୋହିତ ଶର୍ମା କ୍ୟାରିୟରରେ ପ୍ରଥମଥରପାଇଁ ଭାରତୀୟ ଟେଷ୍ଟ କ୍ରିକେଟ ଦଳର ଉପଅଧିନାୟକ ମନୋନୀତ ହୋଇଛନ୍ତି। ଚେତେଶ୍ୱର ପୂଜାରାଙ୍କ ସ୍ଥାନରେ ରୋହିତଙ୍କୁ ଏହି ନୂଆ ଦାୟିତ୍ୱ ମିଳିଛି। ଆଡିଲେଡ୍ରେ ଅନୁଷ୍ଠିତ ପ୍ରଥମ କ୍ରିକେଟ ଟେଷ୍ଟ ପରେ ନିୟମିତ ଅଧିନାୟକ ବିରାଟ କୋହଲି ପିତୃତ୍ୱ ଛୁଟିରେ ଥିବାବେଳେ ପୂଜାରାଙ୍କୁ ଦ୍ୱିତୟ ଟେଷ୍ଟ ପାଇଁ ଅଜିଙ୍କ୍ୟ ରାହାନେଙ୍କ ଡେପୁଟି ମନୋନୀତ କରାଯାଇଥିଲା। ମାତ୍ର ରୋହିତ ଫିଟ୍ ହେବାପରେ ଟିମ୍ ମ୍ୟାନେଜମେଣ୍ଟ ତାଙ୍କୁ ଏହି ଦାୟିତ୍ୱ ଦେଇଛି। ”ବିରାଟଙ୍କ ଅନୁପସ୍ଥିତିରେ ରାହାନେଙ୍କୁ ନେତୃତ୍ୱ ଦାୟିତ୍ୱ ମିଳିବାପରେ କିଏ ଉପଅତ୍ଧନାୟକ ହେବେ ତାହା ପୂର୍ବରୁ ନିର୍ଦ୍ଧାରିତ ହୋଇ ନ ଥିଲା। ମାତ୍ର ରୋହିତ ଫିଟ୍ ହେଲେ ତାଙ୍କୁ ଏହି ଦାୟିତ୍ୱ ଦେବବୋଲି ମ୍ୟାନେଜମେଣ୍ଟ ସ୍ଥିର କରିଥିଲା। ସେ ଦ୍ୱିତୀୟ ଟେଷ୍ଟ ପାଇଁ ଉପଲବ୍ଧ ନ ହେବାରୁ ପୂଜାରାଙ୍କୁ ଉପଅଧିନାୟକ କରାଯାଇଥିଲା ବୋଲି ଜଣେ ସିନିୟର ଅଫିସିଆଲ ପ୍ରକାଶ କରିଛନ୍ତି। ରୋହିତ ଦୀର୍ଘଦିନଧରି ଭାରତୀୟ ସୀମିତ ଓଭର କ୍ରିକେଟରେ ଉପଅଧିନାୟକ ଦାୟିତ୍ୱ ତୁଲାଇ ଆସିଛନ୍ତି। ତେଣୁ କୋହଲିଙ୍କ ଅନୁପସ୍ଥିତିରେ ତାଙ୍କୁ ଭାରତୀୟ ଲିଡରଶିପ୍ ଗ୍ରୁପରେ ସାମିଲ କରିବାକୁ ନିଷ୍ପତ୍ତି ହୋଇଛି ବୋଲି ସେ କହିଛନ୍ତି। ୧୪ ଦିନିଆ କଷ୍ଟସାଧ୍ୟ କ୍ୱାରାଣ୍ଟାଇନ୍ ସମୟ କଟାଇବାପରେ ରୋହିତଙ୍କୁ ଦଳରେ ଭବ୍ୟ ସ୍ବାଗତ କରାଯାଇଥିଲା। ତେବେ ଖରାପ ଫର୍ମରେ ଥିବା ମୟଙ୍କ ଅଗ୍ରଓ୍ବାଲଙ୍କ ସ୍ଥାନରେ ରୋହିତ ଇନିଂସ ଓପନ କରିବେ ନା ସମାନ ପରିସ୍ଥିତିଦେଇ ଗତି କରୁଥିବା ହନୁମା ବିହାରୀଙ୍କ ସ୍ଥାନରେ ସେ ମିଡିଲ ଅର୍ଡରରେ ବ୍ୟାଟିଂ କରିବେ ତାହା ଚୂଡ଼ାନ୍ତ ହୋଇନାହିଁ। ରୋହିତ ୩୨ଟି ଟେଷ୍ଟ ଖେଳି ୪୬ରୁ ଊର୍ଦ୍ଧ୍ୱ ହାରରେ ରନ ସଂଗ୍ରହ କରିଥିବାବେଳେ ୬ଟି ଶତକ ଅର୍ଜନ କରିଛନ୍ତି। ୨୦୧୯ରେ ସେ ଦକ୍ଷିଣ ଆଫ୍ରିକା ବିପକ୍ଷରେ ସର୍ବାଧିକ ୨୧୨ ରନ ସ୍କୋର କରିଥିଲେ। ତୃତୀୟ ଟେଷ୍ଟ ଆସନ୍ତା ୭ ତାରିଖରୁ ଆରମ୍ଭ ହେବାକୁ ଯାଉଥିବାବେଳେ ଭାରତୀୟ ଦଳ ୫ରେ ମେଲବୋର୍ନରୁ ସିଡ୍ନୀ ଯିବ।
