ବିଜ୍ଞାନର ଅଗ୍ରଗତି ଏଭଳିଭାବେ ହେବାରେ ଲାଗିଛି ଯେ ପୂର୍ବେ ଆମେ ଯାହାକୁ କଳ୍ପନା ବୋଲି ଭାବୁଥିଲୁ, ଆଜି ତାହା ବାସ୍ତବରେ ପରିଣତ ହୋଇପାରୁଛି। ଆଉ ବିଜ୍ଞାନ ତଥା ଅତ୍ୟାଧୁନିକ ଉପକରଣ ତ ଆମ ଜୀବନକୁ ସହଜ ଓ ସରଳ କରିବାରେ ଲାଗିଛି। ଆଜିକାଲି ବୈଜ୍ଞାନିକ ଆର୍ଟିଫିସିଆଲ ଇଣ୍ଟେଲିଜେନ୍ସ ବ୍ୟବହୃତ ହ୍ୟୁମାନୋଏଡ ରୋବୋ ମଧ୍ୟ ତିଆରି କରୁଛନ୍ତି, ଯାହାର କର୍ମ କୁଶଳତା ଦେଖିଲେ ଆଶ୍ଚର୍ଯ୍ୟ ଚକିତ ହେବା ସୁନିଶ୍ଚିତ। ଚାଇନାର ମେଟାଓ୍ବର୍ସ କମ୍ପାନୀ ନେଟ୍ଡ୍ରାଗନ ଓ୍ବେସଫ୍ଟ ନିଜ ଅଫିସ୍ରେ ବସ୍ ତଥା ସିଇଓଭାବେ ଏକ ଆର୍ଟିଫିସିଆଲ ଇଣ୍ଟେଲିଜେନ୍ସ ବାଲା ହ୍ୟୁମାନୋଏଡ୍ ରୋବୋକୁ ନିଯୁକ୍ତ କରିଛି। ଏ ହେଉଛି ପୃଥିବୀର ପ୍ରଥମ ଘଟଣା ଯେଉଁଠି କମ୍ପାନୀର ଏକ ମୁଖ୍ୟ ପଦବୀରେ ରୋବୋ କାମ କରୁଛି। ଶୁଣିବାକୁ ଏହା କୌଣସି ସାଇନ୍ସ ଫିକ୍ସନ ମୁଭି ପରି ଲାଗୁଥିବ। କିନ୍ତୁ ବାସ୍ତବରେ ଚାଇନାର ଏକ କମ୍ପାନୀରେ ରୋବୋ ସିଇଓ ପଦବୀରେ ନିଯୁକ୍ତି ପାଇଛି। ଉକ୍ତ ରୋବୋର ନାମ ହେଉଛି ‘ଏମ୍ଏସ୍ ତାଙ୍ଗ ୟୁ’। ସିଇଓ ଭାବରେ ତାଙ୍ଗ ୟୁ କମ୍ପାନୀର ସଙ୍ଗଠନ ଓ କୌଶଳ ବିଭାଗର ନେତୃତ୍ୱ ନେବା ସହ ଟ୍ୟାଲେଣ୍ଟ ଡେଭେଲପମେଣ୍ଟରେ ବି ମୁଖ୍ୟ ଭୂମିକା ତୁଲାଇବ। ତା’ସହ ଡାଟା ଆନାଲିସିସ୍ରେ ମଧ୍ୟ ସାହାଯ୍ୟ କରିବ। ୧୦ ବିଲିୟନ ଆମେରିକୀୟ ଡଲାର ମୂଲ୍ୟଯୁକ୍ତ ଏହି କମ୍ପାନୀ ପ୍ରେସ୍ ବିଜ୍ଞପ୍ତି ଦ୍ୱାରା ଏହା ଜଣାଇଛି ଯେ ତାଙ୍କ କମ୍ପାନୀରେ ସିଇଓ ଭାବେ ଏକ ରୋବୋକୁ ନିଯୁକ୍ତି ମିଳିଛି। ଆଉ ଏଇ ପଦକ୍ଷେପ ନେଇ ସେ ପ୍ରମାଣିତ କରିବାକୁ ଚାହୁଁଛନ୍ତି ଯେ ଆର୍ଟିଫିସିଆଲ ଇଣ୍ଟେଲିଜେନ୍ସ ଏବେ ବ୍ୟବହାର କରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ।
