କଟକ ଅଫିସ,୭ା୪: କାଳବୈଶାଖୀ ପ୍ରଭାବରେ ଗୁରୁବାର ଅପରାହ୍ନରେ କଟକ ସହରର ବିଭିନ୍ନ ସ୍ଥାନରେ ପ୍ରବଳ ବେଗରେ ପବନ ବହିବା ସହ ବର୍ଷା ହୋଇଛି। କେତେକ ସ୍ଥାନରେ ଗଛ ଉପୁଡି ପଡିଥିବା ଦେଖିବାକୁ ମିଳିଛି। ପବନରେ ବାଲିଯାତ୍ରା ଉପର ପଡିଆରେ ପଡିଥିବା ଅନ୍ତର୍ଜାତୀୟ କଟକ ବୈଶାଖୀ ବାଣିଜ୍ୟ ମେଳାର ମୁଖ୍ୟ ତୋରଣ ଭାଙ୍ଗିପଡିଛି। ସେହିପରି ପଡିଆରେ ପାଣି ଜମିରହିବାରୁ ବ୍ୟବସାୟ ବାଧାପ୍ରାପ୍ତ ହୋଇଛି। ବର୍ଷା ଯୋଗୁ ସହରର ଅନେକ ଅଞ୍ଚଳ ଜଳାର୍ଣ୍ଣବ ହୋଇଛି। ସହରର ମୁଖ୍ୟ ରାସ୍ତା ବାଦାମବାଡି ସମେତ ଗଳି ରାସ୍ତାରେ ବର୍ଷାପାଣି ଜମିଛି। ଏପରି କି ବାଦାମବାଡ଼ି ମୁଖ୍ୟ ରାସ୍ତା ସମେତ କେତେକ ସ୍ଥାନରେ ବର୍ଷା ଯୋଗୁ ରାସ୍ତା-ନାଳ ଏକାକାର ହୋଇପଡିଛି। ଡ୍ରେନ୍ରେ ବର୍ଷାପାଣି ନିଷ୍କାସନ ବାଧାପ୍ରାପ୍ତ ହେବାରୁ ଉଦ୍ବୃତ୍ତ ପାଣି ରାସ୍ତାରେ ଲହଡି ଭାଙ୍ଗୁଛି। ଫଳରେ ଲୋକଙ୍କ ଜାତାୟତରେ ସମସ୍ୟା ହୋଇଛି। ଅପରପକ୍ଷରେ ଅନେକ ଯୋଜନା ପରେ ମଧ୍ୟ ଜଳ ନିଷ୍କାସନର ସ୍ଥାୟୀ ସମାଧାନ କରିବାରେ କଟକ ମହାନଗର ନିଗମ(ସିଏମ୍ସି) ବିଫଳ ହୋଇଛି। ଆଗାମୀ ଦିନରେ ଏଥିପ୍ରତି ଦୃଷ୍ଟି ଦେଇ ଜଳବନ୍ଦୀ ସମସ୍ୟାରୁ ମୁକ୍ତ କରିବା ପାଇଁ ସହରବାସୀ ଦାବି କରିଛନ୍ତି।ସିଏମ୍ସି ସୂଚନା ଅନୁଯାୟୀ, ସହରରେ ପ୍ରାୟ ୧୭୨୯ କିମି ଡ୍ରେନ୍ ରହିଛି। ସେଥିମଧ୍ୟରୁ ୨୨ କିମି ଏମ୍ଏସ୍ଡବ୍ଲୁସି-୧ ଓ ୨ ଡ୍ରେନ୍, ୨୯ କିମି ବିଏସ୍ଡବ୍ଲୁସି ଶାଖା ଡ୍ରେନ୍, ୫୨୦ କିମି ସର୍ଫେସ୍, ୧୩୦ କିମି ମେଜର୍ ସର୍ଫେସ୍ ଡ୍ରେନ ଓ ୧୦୨୮ କିମି କଚ୍ଚା ଡ୍ରେନ୍ ରହିଛି। ୧୦୦୦ କିମି ଅଧିକ ଡ୍ରେନ୍ ଉପରେ ସ୍ଲାବ୍ ପଡିନାହିଁ। ପ୍ରତିବର୍ଷ ଡ୍ରେନ୍ ଉପରେ ସ୍ଲାବ୍ ପକାଇବା ବାବଦରେ ସିଏମ୍ସି ପକ୍ଷ ୮୦ ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହୁଏ। ମାତ୍ର ଏବେସୁଦ୍ଧା ସହରର ୫୦ ଭାଗ ଡ୍ରେନ୍ ମୁକୁଳା ପଡିଛି। ମୁକୁଳା ଡ୍ରେନ୍ରେ ଛୋଟ ପିଲା ଓ ଗୋରୁ ପଡ଼ି ଆହତ ହେବା ଅନେକ ନଜିର ରହିଛି। ଏ ନେଇ ଅଭିଯୋଗ ହେଲେ ମଧ୍ୟ କର୍ତ୍ତୃପକ୍ଷ ଗୁରୁତ୍ୱ ଦେଉନାହାନ୍ତି। ଫଳରେ ଦୁର୍ଘଟଣା କମିବା ବଦଳରେ ବଢିବାରେ ଲାଗିଛି। ତେବେ ବର୍ଷା ପରେ ସ୍ଥିତି ଆହୁରି ସଙ୍ଗୀନ ହୋଇପଡିଛି। ଡ୍ରେନ୍ଗୁଡିକ ସଫା କରାଯାଇ ନ ଥିବାରୁ ବର୍ଷାଜଳ ନିଷ୍କାସନ ହୋଇ ନ ପାରି ରାସ୍ତାରେ ଜମିଛି। ସ୍ଥିତି ଏପରି ହୋଇଛି ଯେ ନାଳ କେଉଁଠୁ ଆରମ୍ଭ ହୋଇଛି ଶେଷ ହୋଇଛି ତାହା ଜାଣିବା କଷ୍ଟକର। ପ୍ରତିଦିନ ସ୍କୁଲ ଓ କଲେଜ ଛାତ୍ରୀଛାତ୍ର ଯାତାୟତ କରୁଥିବାବେଳେ ରାସ୍ତାପାର୍ଶ୍ୱ ଡ୍ରେନ୍ ମୁକୁଳା ଥିବାରୁ ବିପଦକୁ ଏଡାଇ ଦିଆ ନ ଯାଇପାରେ। ଅପରପକ୍ଷରେ କେତେକ ସ୍ଥାନରେ ଡ୍ରେନ୍ରୁ ପଙ୍କୋଦ୍ଧାର କରାଯାଇ ପାର୍ଶ୍ୱରେ ରଖାଯାଉଛି। ବର୍ଷା ହେଲେ ପଙ୍କ ପୁଣି ଡ୍ରେନ୍ରେ ପଶି ଜଳ ନିଷ୍କାସନରେ ବାଧା ସୃଷ୍ଟି କରୁଛି। ଫଳରେ ଲୋକମାନେ ଜଳବନ୍ଦୀ ସମସ୍ୟାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ସିଏମ୍ସି ମେୟର ସୁବାସ ସିଂ କହିଛନ୍ତି, ମୁକୁଳା ଡ୍ରେନ୍ରେ ସ୍ଲାବ୍ ପଡିବା କାର୍ଯ୍ୟ ଜାରି ରହିଛି। ସବୁ ମୁକୁଳା ଡ୍ରେନ୍କୁ କଭର କରିବାକୁ ଚେଷ୍ଟା କରୁଛୁ। ପଙ୍କୋଦ୍ଧାର କାର୍ଯ୍ୟ ଜାରି ରହିଛି। ଖୁବ୍ଶ୍ରୀଘ୍ର ଏହି କାର୍ଯ୍ୟ ଶେଷ ହେବ ବୋଲି ସେ କହିଛନ୍ତି।
