ଭଞ୍ଜନଗର,୩୦ା୯(ବାବୁଲା ପ୍ରଧାନ)-ଭଞ୍ଜନଗର-ଫୁଲବାଣୀ ଜାତୀୟ ରାଜପଥରରେ ଥିବା କଳିଙ୍ଗା ଘାଟିରେ ଗତ ୧୬ ତାରିଖରେ ପ୍ରବଳ ବର୍ଷା ଯୋଗୁ ଭୂସ୍ଖଳନ ହେବା ସହ ବଡ ବଡ ପଥର ଖସିଥିଲା। ଫଳରେ ଉକ୍ତ ଘାଟି ରାସ୍ତା ଧୋଇ ହୋଇଯାଇଥିଲା। ବଡ଼ ବଡ଼ ପଥର ମଧ୍ୟ ଖସିଥିବାରୁ ଗମନାଗମନରେ ବାଧା ଉପୁଜଛି। ଜାତୀୟ ରାଜପଥ କତ୍ତୃୃପକ୍ଷ ଉକ୍ତ ଗୁରୁତ୍ତ୍ୱପୁର୍ଣ ରାସ୍ତାକୁ ମରାମତି କରିବା ପାଇଁ ପଦକ୍ଷେପ ନେଇଥିଲେ ମଧ୍ୟ କାମ ମନ୍ଥର ଗତିରେ ଚାଲିଛି। ୧୫ ଦିନ ହେଲା ଉକ୍ତ ରାସ୍ତାରେ ଗମନାଗମନ ସ୍ବାଭାବିକ ହୋଇପାରିନାହିଁ। ଲୋକେ ଅନ୍ୟ ରାସ୍ତାରେ ଯାଇ ଅଧିକ ଖର୍ଚ୍ଚାନ୍ତ ସହ ସମୟ ମଧ୍ୟ ନଷ୍ଟ ହେଉଛି। ଉକ୍ତ ରାସ୍ତାରେ ଗମନାଗମନ ବାରଣ କରାଯାଇଛି। ଘାଟିର ଉଭୟ ମୁଣ୍ଡରେ ପୋଲିସ ମୁତୟନ ହୋଇଛି। ରାସ୍ତା ସ୍ବାଭାବିକ ହେବା ଓ ଭାରିଯାନ ଏବଂ ବସ ଚଳାଚଳ କରିବାକୁ ଆହୁରି ବହୁଦିନ ଲାଗିଯିବ। ବର୍ଷା ଯଦି ନ ହେବ ତେବେ ଚାରିଚକିଆ ଏବଂ ଦୁଇ ଚକିଆ ଗାଡ଼ି ସପ୍ତାହେ ମଧ୍ୟରେ ଚାଲିବା ସମ୍ଭାବନା ରହିଛି। ଅପରପକ୍ଷେ ଘାଟିରେ ଥିବା ଠାକୁରାଣୀଙ୍କ ମନ୍ଦିରରେ ମଙ୍ଗଳବାର ବୋଦା ବଳି ଦିଆଯାଇଛି। ଏହାପରେ ସେଠାରେ ଭୋଜିଭାତ ହୋଇଥିଲା। ଶ୍ରମିକ, ଜାତୀୟ ରାଜପଥ କର୍ମଚାରୀ, ଠିକାଦାର ପ୍ରମୁଖ ଭୋଜି ଖାଇଥିଲେ। ବୋଦା ବଳି ପଡିବା ପରେ ରାସ୍ତା କାମରେ ଆଉ କୌଣସି ସମସ୍ୟା ରହିବ ନାହିଁ ବୋଲି କାମ କରୁଥିବା ଶ୍ରମିକ ମାନଙ୍କ ବିଶ୍ୱାସ। କାମ ବିଳମ୍ବ ନେଇ ଜାତୀୟ ରାଜପଥ ବିଭାଗର ଜଣେ ଯନ୍ତ୍ରୀ କହିଛନ୍ତି, ଶ୍ରମିକ ଅଭାବ ଯୋଗୁଁ କାମ ବିଳମ୍ବ ହେଉଛି। ତଥାପି ପୂଜା ପରେ ଦ୍ରୁତ ଗତିରେ କାମ କରିବା ଯୋଜନା ଅଛି। ପ୍ରଶାସନ ନିଷ୍ପତ୍ତି ପରେ ଛୋଟ ଯାନବାହାନ ଚଳାଚଳ ପାଇଁ ରାସ୍ତା ଖୋଲିବ ବୋଲି କହିଥିଲେ। କଳିଙ୍ଗା ଘାଟି ଏବେବି ଯାନବାହାନ ଚଳାଚଳ ପାଇଁ ବିପଦପୂର୍ଣ୍ଣ ଅଛି । ତେଣୁ ପରିସ୍ଥିତିକୁ ଦେଖି ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସେ କହିଥିଲେ। ବଳି ବୋଦା ସମ୍ପର୍କରେ ଜଣେ ବ୍ୟକ୍ତି କହିଛନ୍ତି ଘାଟି କାମ ମରାମତି ସମୟରେ ଏକ ଗାଡି ଏବଂ ଚାଳକ ବିପଦରେ ପଡ଼ି ଯାଇଥିଲେ। ମା’ଙ୍କ କୃପାରୁ ଚାଳକ ଜଣଙ୍କ ବଞ୍ଚିଯାଇଥିବା ଯୋଗୁ ସେ ବୋଦା ବଳି ପକାଇଥିଲେ ବୋଲି ବ୍ୟକ୍ତି ଜଣଙ୍କ କହିଛନ୍ତି।
