ଉଦଳା,୨୧ା୮(ଡି.ଏନ୍.ଏ.): ମୟୂରଭଞ୍ଜ ଜିଲା ଉଦଳା ବ୍ଲକ ଅଧୀନ ବାଲ୍ମା ଗ୍ରାମର ଜଣେ ଗର୍ଭବତୀ ବିପଦସଙ୍କୁଳ ଭାବେ ଭରାନଦୀ ପାରି ହୋଇ ଆମ୍ବୁଲାନ୍ସ ପାଖକୁ ଯିବା ଘଟଣା ଚର୍ଚ୍ଚାର ବିଷୟ ହୋଇଛି।
ଶୁକ୍ରବାର ମଧ୍ୟାହ୍ନରେ ବାଲମା ଗ୍ରାମର ସୁକାନ୍ତୀ ହେମ୍ବ୍ରମଙ୍କ ପ୍ରସବ ଯନ୍ତ୍ରଣା ହୋଇଥିଲା। ପରିବାର ଲୋକେ ତାଙ୍କୁ ଡାକ୍ତରଖାନା ନେବା ନିମନ୍ତେ ଜନନୀ ଏକ୍ସପ୍ରେସ୍କୁ ଫୋନ କରିଥିଲେ। ଖବର ପାଇ ଜନନୀ ଏକ୍ସପ୍ରେସ୍ ଆସି ବାଲ୍ମା ଗ୍ରାମ ନିକଟରେ ପହଞ୍ଚିଥିଲା। ମାତ୍ର ଗ୍ରାମକୁ ଯିବା ନିମନ୍ତେ ଶିମିଳିପାଳରୁ ବାହାରିଥିବା ବାଲ୍ମା ନଦୀର ଶାଖା ସଞ୍ଜ ନଦୀ ବାଧକ ସାଜିଥିବାରୁ ନଦୀର ଆରପାଖରେ ଛିଡ଼ା ହୋଇ ରହିଥିଲା ଆମ୍ବୁଲାନ୍ସ। ପରିବାର ଲୋକେ ସୁକାନ୍ତୀଙ୍କୁ ପ୍ରଥମେ ସାଇକେଲରେ ୨ କି.ମି ଆଣିବା ପରେ ସଞ୍ଜ ନଦୀର ଭରା ପାଣି ଭିତରେ ପଶି ବିପଦପୂର୍ଣ୍ଣ ଭାବେ ଆମ୍ବୁଲାନ୍ସ ପାଖରେ ପହଞ୍ଚାଇଥିଲେ। ସେଠାରୁ ତାଙ୍କୁ ଜନନୀ ଏକ୍ସପ୍ରେସ୍ ଯୋଗେ ଚିକିତ୍ସା ନିମନ୍ତେ ଉଦଳା ଡାକ୍ତରଖାନାରେ ଭର୍ତ୍ତି କରାଯାଇଥିଲା।
ଉଲ୍ଲେଖଯୋଗ୍ୟ ଯେ, ବାଲ୍ମା ଗ୍ରାମକୁ ରାସ୍ତା ଓ ନଦୀରେ ଏକ ପୋଲ ନିର୍ମାଣ ପାଇଁ ଗ୍ରାମବାସୀ ପୂର୍ବରୁ ଅନେକ ଥର ପ୍ରଶାସନ ଓ ସ୍ଥାନୀୟ ରାଜନେତାଙ୍କଠାରେ ଦାବି କରି ଆସୁଥିଲେ ମଧ୍ୟ ସେମାନଙ୍କ କଥା କେହି ଶୁଣୁ ନ ଥିବା ଗର୍ଭବତୀ ସୁକାନ୍ତୀଙ୍କ ସ୍ବାମୀ ଠାକୁରା ହେମ୍ବ୍ରମ ଓ ସମ୍ପର୍କୀୟା ବାସନ୍ତୀ ମୁର୍ମୁ କହିଛନ୍ତି। ସେହିଭଳି ଏହି ଘଟଣା ଅତ୍ୟନ୍ତ ନିନ୍ଦନୀୟ ବୋଲି ବୁଦ୍ଧିଜୀବୀ ଦୀପକ କୁମାର ପାଣିଗ୍ରାହୀ କହନ୍ତି। ଉଦଳା ଉପ ଜିଲାପାଳ ଭଗବାନ ବେହେରାଙ୍କୁ ପଚାରିବାରୁ ଏଦିଗରେ ପଦକ୍ଷେପ ଗ୍ରହଣ କରାଯିବ ବୋଲି କହିଥିଲେ।
