ଆଳି,୨୯ା୧୧(ଡି.ଏନ୍.ଏ.): ରାଜ୍ୟ ସରକାର ନଦୀ ଗ୍ରାସରୁ ସାଧାରଣ ଲୋକଙ୍କୁ ସୁରକ୍ଷା ଦେବା ନିମନ୍ତେ ତଟବନ୍ଧ ବିଭାଗ ପକ୍ଷରୁ ଅର୍ଥ ଖର୍ଚ୍ଚକରି ନଦୀବନ୍ଧ ସୁଦୃଢ଼ କରାଯାଉଛି। ବାଲି ବ୍ୟବସାୟୀମାନେ ବନ୍ଧ କାଟି ନଦୀରୁ ଅହରହ ବାଲି ବୋଝେଇ ଗାଡ଼ି ନେଉଛନ୍ତି। ଫଳରେ ନଦୀବନ୍ଧ ଦୁର୍ବଳ ହେବାରେ ଲାଗିଛି l ନଦୀବନ୍ଧର ସୁରକ୍ଷାକୁ ଲକ୍ଷ୍ୟକରି ଏହି ବାଲି ଗାଡି ଚଳାଚଳ କରୁଥିବା ରାସ୍ତାରେ ବାଉଁଶ ବାନ୍ଧିଛନ୍ତି ଆଳି ତହସିଲ ଅନ୍ତର୍ଗତ ହଦୁଆ ଗ୍ରାମବାସୀ l ଏ ନେଇ ଗ୍ରାମବାସୀ ବାରମ୍ବାର ଆଳି ତହସିଲ ନିକଟରେ ଅଭିଯୋଗ କରୁଥିବା ବେଳେ ତହସିଲଦାର ଲୋକଦେଖାଣିଆ ଭାବେ ସେଠାକୁ ଆସି କୌଣସି କାର୍ଯ୍ୟାନୁଷ୍ଠାନ ନ ନେଇ ଚାଲିଯାଉଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ହଦୁଆ ଗ୍ରାମ ନିକଟରେ ଖରସ୍ରୋତା ନଦୀ ପ୍ରବାହିତ ହେଉଛି। ଜୁଆଣିଆ ପଞ୍ଚାୟତ ଅନ୍ତର୍ଗତ ହଦୁଆ ନିକଟରୁ ବାଲି ଉଠାଇବା ଲାଗି ଆଳି ତହସିଲ ପକ୍ଷରୁ ଟେଣ୍ଡର ହୋଇଥିଲା। ଟେଣ୍ଡର ପାଇଥିବା ବ୍ୟକ୍ତି ଜଣକ ଯେଉଁ ପରିମାଣର ବାଲି ଉଠାଇବା କଥା ତାହାଠାରୁ ଢେର୍ ଅଧିକ ଉଠାଇ ସାରିଲଣି, ଯାହାକୁ ନେଇ ବର୍ଷେ ପୂର୍ବେ ଗ୍ରାମବାସୀ ଆଳି ତହସିଲଦାରଙ୍କ ନିକଟରେ ଅଭିଯୋଗ କରିଥିଲେ। ତହସିଲଦାର ଲୋକଦେଖାଣିଆ ଭାବେ ଘଟଣାସ୍ଥଳ ବୁଲି ପଳାଇବା ପରେ ପୁନର୍ବାର ଏହି କାରବାର ଚାଲୁ ରହିଥିଲା। ଦୈନିକ ଶହ ଶହ ଟ୍ରକ୍, ଟ୍ରାକ୍ଟର ନଦୀରୁ ବାଲି ବୋଝେଇ କରି ନେଉଥିବା ବେଳେ ତାହା ନଦୀବନ୍ଧ ଦେଇ ଯାତାୟାତ କରୁଥିବାରୁ ନଦୀବନ୍ଧ ଦୁର୍ବଳ ହେବାରେ ଲାଗିଛି। ତଟବନ୍ଧ ବିଭାଗ ପକ୍ଷରୁ କରାଯାଇଥିବା ପଥର ସ୍ପରକୁ ଜେସିବି ମେଶିନରେ ତାଢ଼ି ନଦୀରୁ ନଦୀବନ୍ଧକୁ ରାସ୍ତା କରାଯାଇଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି। ବାଲି ବ୍ୟବସାୟୀମାନେ ନିଜର ସ୍ବାର୍ଥ ନିମନ୍ତେ ଅନେକ ବ୍ୟକ୍ତିଗତ ଲୋକଙ୍କ ଜମି ସମେତ ଗ୍ରାମ ଶ୍ମଶାନକୁ ମଧ୍ୟ ଛାଡ଼ିନାହାନ୍ତି। ଶ୍ମଶାନକୁ ଖୋଳି ବଡ଼ ବଡ଼ ଗାତ କରି ଦେଇଛନ୍ତି। ଦୀର୍ଘଦିନ ହେବ ଏହି ବାଲି ବୋଝେଇ ଗାଡ଼ିଗୁଡ଼ିକ ନଦୀବନ୍ଧ ଦେଇ ଗ୍ରାମ ଭିତରେ ସଂକୀର୍ଣ୍ଣ ରାସ୍ତା ଦେଇ ଯାତାୟାତ କରୁଛି। ନଦୀବନ୍ଧ ସମ୍ପୂର୍ଣ୍ଣ ଶୋଚନୀୟ ହୋଇପଡ଼ିଥିବା ବେଳେ ଗ୍ରାମ ଭିତରେ ଥିବା ଢଳେଇ ରାସ୍ତା ଫାଟି ଅଁା କରିଛି। ଏହି ଅଞ୍ଚଳ ବନ୍ୟାଞ୍ଚଳ ଭାବେ ପରିଚିତ ଥିବା ବେଳେ ବନ୍ୟା ଆସିଲେ ସାଧାରଣ ଲୋକମାନେ ଭୟଭୀତ ହୋଇପଡ଼ୁଛନ୍ତି। ଯଦି ଏଭଳି ଭାବେ ନଦୀବନ୍ଧକୁ ଖୋଳି ବାଲି ଗାଡ଼ି ଯାତାୟାତ କରେ ତେବେ ବନ୍ୟା ଆସିଲେ ବନ୍ଧ ଭୁଶୁଡ଼ି ଧନଜୀବନ ହାନି ହେବାର ଆଶଙ୍କା ଦେଖାଦେଇଛି। ତେଣୁ ଆଗାମୀ ଦିନରେ ପ୍ରଶାସନ ପକ୍ଷରୁ ଯଦି କୌଣସି କାର୍ଯ୍ୟାନୁଷ୍ଠାନ ନିଆ ନ ଯାଏ ତେବେ ଗଁାର ଗୌରାଙ୍ଗ ପ୍ରଧାନ, ଈଶ୍ୱର ଥାଟୋଇ, ସୁବ୍ରତ ଥାଟୋଇ, ଅମର ସେଠୀ, ପ୍ରମୋଦ ସେଠୀ, ପ୍ରହଲ୍ଲାଦ ପ୍ରଧାନ, ଦିଲୀପ ସାମଲ, ସରୋଜ ସାମଲ, ବିଦ୍ୟାଧର ସେଠୀ, ଆକୁଳି ଥାଟୋଇ ପ୍ରମୁଖ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି। ଏ ନେଇ ଆଳି ତହସିଲଦାର ତପନ ସେନାପତିଙ୍କୁ ପଚାରିବାରେ ଏପର୍ଯ୍ୟନ୍ତ କୌଣସି ଅଭିଯୋଗ ଆସିନାହିଁ। ଅଭିଯୋଗ ଆସିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି। ଆଳି ତଟବନ୍ଧ ବିଭାଗ କାର୍ଯ୍ୟାଳୟରେ ଜୁଆଣିଆ ସରପଞ୍ଚ ସୁବ୍ରତ ନାୟକ ଖରସ୍ରୋତା ନଦୀବନ୍ଧକୁ ସୁରକ୍ଷା ଦେବା ଉଦ୍ଦେଶ୍ୟରେ ଏକ ଲିଖିତ ଅଭିଯୋଗ କରିବା ପରେ ବିଭାଗ ଅଧୀକ୍ଷଣ ଯନ୍ତ୍ରୀ ସୁବ୍ରତ ଦାସ କାର୍ଯ୍ୟାନୁଷ୍ଠାନ ନେବେ ବୋଲି ପ୍ରତିକ୍ରିୟାରେ କହିଛନ୍ତି।
