ଓ୍ବାଶିଂଟନ,୨୭ା୧୨:ମୁଦ୍ରାସ୍ଫୀତି ନିୟନ୍ତ୍ରଣ ପାଇଁ ବିଭିନ୍ନ ଦେଶର କେନ୍ଦ୍ରୀୟ ବ୍ୟାଙ୍କଗୁଡ଼ିକ ପକ୍ଷରୁ ସୁଧହାର ବୃଦ୍ଧି କରାଯାଉଛି। ଏହି ଉଚ୍ଚ ସୁଧହାର ଯୋଗୁ ୨୦୨୩ରେ ବିଶ୍ୱ ଅର୍ଥନୀତି ମାନ୍ଦାବସ୍ଥା ଆଡ଼କୁ ମୁହଁାଇବ ବୋଲି ସେଣ୍ଟର ଫର୍ ଇକୋନୋମିକ୍ସ ଆଣ୍ଡ ବିଜ୍ନେସ ରିସର୍ଚ୍ଚ (ସିଇବିଆର୍) ପକ୍ଷରୁ ସୋମବାର ସତର୍କ କରାଯାଇଛି।
୨୦୨୨ରେ ବୈଶ୍ୱିକ ଅର୍ଥନୀତି ପ୍ରଥମ ଥର ପାଇଁ ୧୦୦ ଟ୍ରିଲିୟନ୍ ଡଲାର ଅତିକ୍ରମ କରିଛି। କିନ୍ତୁ ନୀତି ନିର୍ଦ୍ଧାରକମାନେ ଦରଦାମ୍ ବୃଦ୍ଧି ବିରୋଧରେ ଲଢ଼େଇ ଜାରି ରଖିଥିବାରୁ ନୂଆବର୍ଷରେ ଅଭିବୃଦ୍ଧି ବାଧାପ୍ରାପ୍ତ ହେବା ନେଇ ବ୍ରିଟିଶ୍ କନ୍ସଲ୍ଟାନ୍ସି ଏହାର ବାର୍ଷିକ ଓ୍ବାଲର୍ଡ ଇକୋନୋମିକ୍ ଲିଗ୍ ଟେବୁଲରେ ପ୍ରକାଶ କରିଛି। ସିଇବିଆର୍ ନିର୍ଦ୍ଦେଶକ କେୟ ଡାନିଏଲ୍ ନେଉଫେଲ୍ଡ କହିଛନ୍ତି, ଉଚ୍ଚ ମୁଦ୍ରାସ୍ଫୀତିର ମୁକାବିଲା ପାଇଁ ବଢ଼ାଯାଉଥିବା ସୁଧହାର ହେତୁ ଆସନ୍ତା ବର୍ଷ ବିଶ୍ୱ ଅର୍ଥନୀତି ମାନ୍ଦାବସ୍ଥାକୁ ସାମ୍ନା କରିପାରେ। ସେ ଆହୁରି କହିଛନ୍ତି, ମୁଦ୍ରାସ୍ଫୀତି ବିରୋଧରେ ଚାଲିଥିବା ଯୁଦ୍ଧ ଶେଷ ହୋଇନାହିଁ। ୨୦୨୩ରେ ମଧ୍ୟ କେନ୍ଦ୍ରୀୟ ବ୍ୟାଙ୍କଗୁଡ଼ିକ ମୁଦ୍ରାସ୍ଫୀତି ନିୟନ୍ତ୍ରଣ ସକାଶେ କଡ଼ା ପଦକ୍ଷେପ ନେଇପାରନ୍ତି। ଏପରି ହେଲେ ଆଗାମୀ କିଛି ବର୍ଷ ଧରି ଅଭିବୃଦ୍ଧି ଉପରେ ନକାରାମତ୍କ ପ୍ରଭାବ ପଡ଼ିପାରେ।
ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍)ର ସଦ୍ୟତମ ଆକଳନ ତୁଳନାରେ ଏବେ ଆହୁରି ନକାରାମତ୍କ ତଥ୍ୟ ସାମ୍ନାକୁ ଆସିବାରେ ଲାଗିଛି। ୨୦୨୩ରେ ଏକ-ତୃତୀୟାଂଶ ବିଶ୍ୱ ଅର୍ଥନୀତି ସଙ୍କୁଚିତ ହେବ ଏବଂ ବୈଶ୍ୱିକ ମୋଟ ଘରୋଇ ଉତ୍ପାଦ (ଜିଡିପି)ରେ ୨%ରୁ କମ୍ ଅଭିବୃଦ୍ଧି ଘଟିବା ନେଇ ୨୫ ପ୍ରତିଶତ ଆଶଙ୍କା ଥିବା ଗତ ଅକ୍ଟୋବରରେ ଆଇଏମ୍ଏଫ୍ ସତର୍କ କରାଇଥିଲା। ତେବେ ବିକାଶଶୀଳ ଅର୍ଥନୀତିଗୁଡ଼ିକ ଧନୀ ରାଷ୍ଟ୍ରଗୁଡ଼ିକ ସହ ତାଳ ଦେଇ ଆଗକୁ ବଢ଼ୁଥିବାରୁ ୨୦୩୭ ସୁଦ୍ଧା ବିଶ୍ୱର ଜିଡିପି ଦ୍ୱିଗୁଣିତ ହେବ। ଏହି ଅବଧି ମଧ୍ୟରେ ପୂର୍ବ ଏସିଆ ଓ ପ୍ରଶାନ୍ତ ମହାସାଗରୀୟ କ୍ଷେତ୍ରରେ କ୍ଷମତା ସନ୍ତୁଳନରେ ପରିବର୍ତ୍ତନ ହେତୁ ବୈଶ୍ୱିକ ଉତ୍ପାଦନର ପରିମାଣରେ ଏକ-ତୃତୀୟାଂଶ ଅଭିବୃଦ୍ଧି ଘଟିବ। ଅନ୍ୟପକ୍ଷେ ୟୁରୋପର ଉତ୍ପାଦନ କ୍ଷମତା ଏକ-ପଞ୍ଚମାଂଶକୁ ସଙ୍କୁଚିତ ହୋଇଯିବ।
ଆଇଏମ୍ଏଫ୍ର ଓ୍ବାଲର୍ଡ ଇକୋନୋମିକ୍ ଆଉଟ୍ଲୁକ୍ଠାରୁ ତଥ୍ୟ ସଂଗ୍ରହ କରି ସିଇବିଆର୍ ଏହାକୁ ଅଭିବୃଦ୍ଧି, ମୁଦ୍ରାସ୍ଫୀତି ଓ ବିନିମୟ ହାର (ଏକ୍ସଚେଞ୍ଜ ରେଟ୍ସ) ଆକଳନ ସକାଶେ ଏକ ଆଭ୍ୟନ୍ତରୀଣ ମଡେଲ ରୂପେ ବ୍ୟବହାର କରିଛି। ଚାଇନା ୨୦୩୬ ବେଳକୁ ଆମେରିକାକୁ ପଛରେ ପକାଇ ବିଶ୍ୱର ସର୍ବବୃହତ୍ ଅର୍ଥନୀତି ରୂପେ ଉଭା ହେବ। ପୂର୍ବରୁ ୨୦୩୦ ସୁଦ୍ଧା ଆମେରିକାକୁ ଚାଇନା ଅତିକ୍ରମ କରିବା ନେଇ ଭବିଷ୍ୟବାଣୀ କରାଯାଇଥିଲା। ସିଇବିଆର୍ର ପୂର୍ବ ଆକଳନ ଅନୁସାରେ ୨୦୨୮ରେ ଏପରି ହେବା ନେଇ ଆକଳନ କରାଯାଇଥିବାବେଳେ ଗତବର୍ଷର ଲିଗ୍ ଟେବୁଲରେ ଏହାକୁ ୨୦୩୦ ପର୍ଯ୍ୟନ୍ତ ଧାର୍ଯ୍ୟ କରାଯାଇଥିଲା। ଯଦି ବେଜିଂ ତାଇଓ୍ବାନକୁ ଦଖଲ ପାଇଁ ଉଦ୍ୟମ କରେ ଏବଂ ଏହାର ଜବାବରେ ବାଣିଜି୍ୟକ କଟକଣାକୁ ସାମ୍ନା କରେ ତେବେ ଆମେରିକାକୁ ଅତିକ୍ରମ କରିବା ଆହୁରି ବିଳମ୍ବିତ ହୋଇପାରେ ବୋଲି ସିଇବିଆର୍ ମନେକରୁଛି। ଚାଇନା ଓ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ଆର୍ଥିକ ପ୍ରତିଯୋଗିତାର ପରିଣାମ ରୁଷିଆର ୟୁକ୍ରେନ୍ ଆକ୍ରମଣ ପରେ ଦେଖିବାକୁ ମିଳିଥିବା ଦୁଃସ୍ଥିତିଠାରୁ ଆହୁରି ଭୟଙ୍କର ହେବ। ଫଳରେ ଦରଦାମ୍ ଆହୁରି ଆକାଶଛୁଅଁା ହେବ ଏବଂ ବିଶ୍ୱରେ ମାନ୍ଦାବସ୍ଥା ସୃଷ୍ଟି ହେବା ଏକପ୍ରକାର ନିଶ୍ଚିତ ବୋଲି ସିଇବିଆର୍ ପକ୍ଷରୁ କୁହାଯାଇଛି। ଭାରତ ୨୦୩୨ ସୁଦ୍ଧା ତୃତୀୟ ଅର୍ଥ ବ୍ୟବସ୍ଥା ପାଲଟିବ ଏବଂ ୨୦୩୫ ବେଳକୁ ଏହାର ଅର୍ଥନୀତି ୧୦ ଟ୍ରିଲିୟନ୍ ଡଲାରରେ ପହଞ୍ଚତ୍ବ। ବ୍ରିଟେନ୍ ବିଶ୍ୱର ଷଷ୍ଠ ବୃହତ୍ ଅର୍ଥନୀତି ପାଲଟିବାକୁ ଥିବାବେଳେ ପରବର୍ତ୍ତୀ ୧୫ ବର୍ଷ ପର୍ଯ୍ୟନ୍ତ ଫ୍ରାନ୍ସ ସପ୍ତମ ସ୍ଥାନରେ ରହିବ। ନବୀକରଣୀୟ ଶକ୍ତିକୁ ଅଧିକ ଗୁରୁତ୍ୱ ଦିଆଗଲେ ବିକାଶଶୀଳ ଅର୍ଥନୀତିଗୁଡ଼ିକ ନିଜ ପ୍ରାକୃତିକ ସମ୍ବଳରୁ ବଳ ପାଇବେ ବୋଲି ଏଥିରେ ଉଲ୍ଲେଖ କରାଯାଇଛି।
