ମହାକାଳପଡ଼ା,୧୨।୪ (ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳର ସମୁଦ୍ର ସଂଲଗ୍ନ ନଦୀ ନାଳଗୁଡ଼ିକ ଲୁଣିଆ ପାଣି ହୋଇଥିବାରୁ ସ୍ଥାନୀୟ ଜଳକ୍ଲିଷ୍ଟ ଲୋକମାନେ ପାନୀୟ ଜଳ ପାଇଁ ନାହିଁ ନ ଥିବା ଅସୁବିଧା ଭୋଗୁଛନ୍ତି। ମୁନ୍ଦେ ଜଳ ପାଇଁ ନଦୀକୂଳିଆ ଲୋକମାନେ ଡହଳ ବିକଳ ହେଉଛନ୍ତି। ଅପରପକ୍ଷରେ ପାନୀୟ ଜଳ ଯୋଗାଣ ବିଭାଗ ପକ୍ଷରୁ ସ୍ଥାନୀୟ ଜଳକ୍ଲିଷ୍ଟ ଅଞ୍ଚଳରେ ଲୋକମାନଙ୍କୁ ଟ୍ୟାଙ୍କର ଯୋଗେ ପାଣି ଯୋଗାଇ ଦେଉଥିଲେ ମଧ୍ୟ ଆବଶ୍ୟକ ମୁତାବକ ଜଳ ମିଳୁନାହିଁ। କେବଳ ରୋଷେଇ ଓ ପିଇବା ପାଣି ବ୍ୟବହାର ଲାଗି ୨ଦିନରେ ଥରେ ମଧୁର ଜଳ ଯୋଗାଣ କରାଯାଉଛି ବୋଲି ବିଭାଗୀୟ ସୂତ୍ରରୁ ପ୍ରକାଶ।
ମିଳିଥିବା ସୂଚନା ଅନୁସାରେ, ବ୍ଲକର ଲୁଣା ନଦୀ ଉପରେ ସ୍ଥାନୀୟ ବାସିନ୍ଦା ପାନୀୟ ଜଳ ପାଇଁ ନର୍ଭର କରୁଥିବା ବେଳେ ନଦୀ ଜଳ ଲୁଣି ରହୁଛି। ସ୍ଥାନୀୟ ମଙ୍ଗଳପୁର ଓ ବରକନ୍ଧା ପଞ୍ଚାୟତର ୯ଟି ଗ୍ରାମର ୧୦ ହଜାରରୁ ଅଧିକ ଲୋକଙ୍କୁ ୫୦ ହଜାର ଲିଟର ଜଳ ଯୋଗାଣ ବିଭାଗ ପକ୍ଷରୁ ୨ଦିନରେ ଥରେ କରାଯାଉଛି ବୋଲି ମହାକାଳପଡ଼ା ବ୍ଲକ ପାନୀୟ ଜଳ ଯୋଗାଣ ବିଭାଗ ଯନ୍ତ୍ରୀ ସୁବ୍ରତ କୁମାର ସାହୁ କହିଛନ୍ତି। ସ୍ଥାନୀୟ ମଙ୍ଗଳପୁର, ଦଧିପୁର, ତେନ୍ତୁଲି, କୁମାରପଡ଼ା, ବନ୍ଧପଡ଼ା, ଗୋଜାବନ୍ଧ, ଛେଡ଼ାକଣି, ଷାଠିଏ ବାଟି ଓ ବରକନ୍ଧା ଗ୍ରାମକୁ ଶୁଦ୍ଧ ପାନୀୟ ଜଳ ଯୋଗାଣ ବିଭାଗ ପକ୍ଷରୁ ଯୋଗାଇ ଦିଆଯାଉଛି। ହେଲେ ଅଧିକ ଟାଣ ଖରା ସାଙ୍ଗକୁ ଗରମ ହେଉଥିବାରୁ ଏହି ଗ୍ରାମର ଲୋକମାନଙ୍କୁ ଅଧିକ ଜଳ ଯୋଗାଣ ଲାଗି ସ୍ଥାନୀୟ ଲୋକେ ଅନୁରୋଧ କରିଛନ୍ତି। ପାଣି ଯୋଗାଣ ସମୟରେ ଗ୍ରାମର ଲୋକମାନେ ଧାଡ଼ି ହୋଇ ଗରା, ବାଲଟି, ପ୍ଲାଷ୍ଟିକ ଜାରକିନ୍ରେ ଜଳ ଭର୍ତ୍ତି କରି ନେଉଥିବା ଦେଖିବାକୁ ମିଳୁଛି। ପାଣିପାଗ ବିଭାଗର ପୂର୍ବାନୁମାନ ସୂଚନା ଅନୁସାରେ, ଅଞ୍ଚଳରେ ଉତ୍ତାପ ବୃଦ୍ଧି ପାଇବାର ଆଶଙ୍କା ରହିଛି। ସେଥିପାଇଁ ସ୍ଥାନୀୟ ଲୋକମାନଙ୍କୁ ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ପକ୍ଷରୁ ଅଧିକ ଜଳ ଯୋଗାଇ ଦେବାକୁ ଲୋକମାନେ କହିଛନ୍ତି। ଦୈନିକ ମୁଣ୍ଡ ପିଛା ୫ ଲିଟର ଜଳ ଯୋଗାଣ କରାଯାଉଛି ବୋଲି କୁହାଯାଇଛି। ଏ ସମ୍ପର୍କରେ ବ୍ଲକ ଗ୍ରାମ୍ୟ ପାନୀୟ ଜଳ ଯୋଗାଣ ବିଭାଗ ଯନ୍ତ୍ରୀ ସାହୁଙ୍କୁ ପଚାରିବାରେ ଖରାଦିନେ ଏହି ଅଞ୍ଚଳରେ ବିଭାଗ ପକ୍ଷରୁ ଜଳ ଯୋଗାଣ ଅବ୍ୟାହତ ରହିଛି। ଆଗାମୀଦିନରେ ଏହି ଅଞ୍ଚଳରେ ଅଧିକ ଜଳ ଯୋଗାଣ ପାଇଁ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି। ଏହି ଅଞ୍ଚଳର କୂଅ, ପୋଖରୀର ଜଳସ୍ତର ନିମ୍ନଗାମୀ ହେବାରେ ଲାଗିଛି। ଖାଲ ପାଟ ଶୁଖିଲା ପଡ଼ିଥିବା ବେଳେ ଗୋ, ପ୍ରାଣୀ, ପକ୍ଷୀ ଓ ଅନ୍ୟ ଜୀବଜନ୍ତୁ ପାଣି ମୁନ୍ଦେ ପାଇଁ ଡହଳ ବିକଳ ହେଉଛନ୍ତି।
