ଭଞ୍ଜନଗର,୧୧ା୨(ଡି.ଏନ.ଏ): ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ଗତ ଡିସେମ୍ବର ମାସରୁ ବନ୍ଦ ହୋଇଯାଇଛି । ଏହାଦ୍ୱାରା ଭଞ୍ଜନଗର ଉପଖଣ୍ଡର ୮ଟି ବ୍ଲକ ଏବଂ ୫ଟି ଏନ୍ଏସିର ପ୍ରାୟ ୯ ଲକ୍ଷ ହିତାଧିକାରୀ ପ୍ରଭାବିତ ହୋଇଛନ୍ତି । ଯାହାକୁ ନେଇ ଭଞ୍ଜନଗର ବ୍ଲକ ଏବଂ ଏନଏସି ବିଜେଡି ପକ୍ଷରୁ ଆସନ୍ତା ୧୫ ଓ ୧୬ ତାରିଖ ଦୁଇଦିନ ଧରି ଆନ୍ଦୋଳନ କରାଯିବ। ଏନେଇ ସୂଚନା ଦେଇଛନ୍ତି ଭଞ୍ଜନଗର ବ୍ଲକ ଏମ୍ପି ପ୍ରତିନିଧି ଦିବାକର ନାୟକ।
ଯେ, ଜାତୀୟ ଖାଦ୍ୟ ସୁରକ୍ଷା ଯୋଜନାରେ ହିତାଧିକାରୀଙ୍କୁ ୫ କେଜି ଚାଉଳ କିମ୍ବା ଗହମ ୫ ଟଙ୍କାରେ ମିଳୁଥିଲା। କୋଭିଡ ସମୟରେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାରେ ଅତିରିକ୍ତ ୫ କେଜି ଚାଉଳ କିମ୍ବା ଗହମ ହିତାଧିକାରୀଙ୍କୁ ମିଳୁଥିଲା। ଏହି ଯୋଜନା ପ୍ରାୟ ୨ ବର୍ଷ ଚାଲିଥିଲା। ଗତ ଡିସେମ୍ବରମାସରୁ କେନ୍ଦ୍ର ସରକାର ଏହି ଯୋଜନା ବନ୍ଦ କରିଦେଇଛନ୍ତି। ଏହି ଯୋଜନାରେ ଆସିଥିବା ଚାଉଳ ଶୁକ୍ରବାର ମଧ୍ୟରେ ବାଣ୍ଟିବା ପାଇଁ ତାରିଖ ଧାର୍ଯ୍ୟ ହୋଇଥିଲା, ଯାହା ଶେଷ ହୋଇଛି। ଏବେ ହିତାଧିକାରୀ ପିଛା କେବଳ ୫ କେଜି ଚାଉଳ ଜାନୁୟାରୀ ମାସର କୋଟା ମିଳିବ । କିନ୍ତୁ ତାହା ୫ଟଙ୍କା ବଦଳରେ ମାଗଣା ମିଳିବ । ଏଥିସହ ଅନ୍ତଦ୍ୟୋୟ ଯୋଜନାରେ ୩୫ କେଜି ଚାଉଳ ମଧ୍ୟ ହିତାଧିକାରୀଙ୍କୁ ମାଗଣାରେ ମିଳିବ। ଜାତୀୟ ଖାଦ୍ୟ ସୁରକ୍ଷା ଯୋଜନାରେ ମିଳୁଥିତ୍ବା ଗହମ ଗତ ଅଗଷ୍ଟ ମାସରୁ ୨୦୨୩ ମାର୍ଚ୍ଚ ମାସ ପର୍ଯ୍ୟନ୍ତ ଯୋଗାଣ ବନ୍ଦ ଅଛି। ଭଞ୍ଜନଗର ବ୍ଲକ ଓ ଏନଏସି, ବେଲଗୁଣ୍ଠା ବ୍ଲକ ଓ ଏନଏସି, ସୋରଡ଼ା ବ୍ଲକ ଓ ଏନଏସି, ବୁଗୁଡ଼ା ବ୍ଲକ ଓ ଏନଏସି, ଆସିକା ବ୍ଲକ ଓ ଏନଏସି, ଜଗନ୍ନାଥପ୍ରସାଦ, ଧରାକୋଟ, ଶେରଗଡ଼ ବ୍ଲକରେ ଜାତୀୟ ଖାଦ୍ୟ ସୁରକ୍ଷା ଯୋଜନାରେ ୨ଲକ୍ଷ ୪୭ ହଜାର ୮୮୫ କାର୍ଡ଼ ଅଛି । ତାହାର ସୁଫଳ ୮ଲକ୍ଷ ୬୫ ହଜାର ୪୧୮ ହିତାଧିକାରୀ ପାଉଛନ୍ତି। ଅନ୍ତଦ୍ୟୋୟ ଯୋଜନାରେ ୨୬ ହଜାର ୩୭୧ଟି କାର୍ଡ଼ ଥିବାବେଳେ ଏଥିରେ ୭୩ ହଜାର ୯୨୦ ହିତାଧିକାରୀ ଅଛନ୍ତି। ଅନ୍ୟପଟେ ବିଜୁଳି ପ୍ରାୟ ଅଧିକାଂଶ ଘରେ ଥିତ୍ବା ବେଳେ କିରାସିନି ଦର ଅଧିକ ଯୋଗୁ ହିତାଧିକାରୀମାନେ କିରାସିନି କିଣିବାକୁ ଆଗ୍ରହ ପ୍ରକାଶ କରୁନାହାନ୍ତି। ଉପଖଣ୍ଡ ଯୋଗାଣ ବିଭାଗ ଅଧିକାରୀ ଅସିତ ମହାନ୍ତି କହିଛନ୍ତି, ସରକାରଙ୍କ ଯାହା ନିର୍ଦ୍ଦେଶ ଆସିଲା ତାହାକୁ ଆମେ କାର୍ଯ୍ୟକାରୀ କରୁଛୁ। ଅପରପକ୍ଷେ କେନ୍ଦ୍ର ସରକାରଙ୍କ ଏଭଳି ଜନବିରୋଧି ନୀତି ବିରୋଧରେ ବିଜେଡି ଆସନ୍ତା ୧୫ ତାରିଖରେ ଭଞ୍ଜନଗର ବ୍ଲକର ପ୍ରତ୍ୟେକ ପଞ୍ଚାୟତ କାର୍ଯ୍ୟାଳୟ ଓ ୧୬ ତାରିଖରେ ବ୍ଲକ କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନ କରାଯିବ ବୋଲି ଭଞ୍ଜନଗର ବ୍ଲକ ଏମପି ପ୍ରତିନିଧି ଦିବାକର ନାୟକ ସୂଚନା ଦେଇଛନ୍ତି ।
