ଝାରସୁଗୁଡ଼ା ଅଫିସ,୧୩ା୧: ଉତ୍ତରାଧିକାରୀ (ଲିଗାଲ୍ହେୟାର) ସାର୍ଟିଫିକେଟ୍ କରାଇଦେବା ପାଇଁ ଝାରସୁଗୁଡା ଜିଲା ସାହରପୁର ଆର୍ଆଇ ଯସ୍ମିତା ଭରାସାଗର ଓ ଏଆର୍ଆଇ ଚଙ୍କିରାଣି ନାୟକ ଜଣେ ବ୍ୟକ୍ତିଙ୍କ ନିକଟରୁ ୭ହଜାର ଟଙ୍କା ଲାଞ୍ଚ ନେଉଥିବା ବେଳେ ଗୁରୁବାର ଭିଜିଲାନ୍ସ ହାତରେ ଧରାପଡିଛନ୍ତି। ସେମାନଙ୍କ ନିକଟରୁ ଭିଜିଲାନ୍ସ ବିଭାଗ ୧୪ଖଣ୍ଡ ୫ଶହ ଟଙ୍କିଆ ନୋଟ୍ ଜବତ କରିଛି। ଶୁକ୍ରବାର ଦୁଇ ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ଝାରସୁଗୁଡା ଡିଏସ୍ପି ପ୍ରଦୀପ କୁମାର ଆଇନ୍ଦ କହିଛନ୍ତି।
ଲଇକେରା ଥାନା ଅଇତାପଡା ଗ୍ରାମର ଶାନ୍ତନୁ ଷଣ୍ଢଙ୍କ ବାପା ମୃତ୍ୟୁବରଣ କରିଥିବା ବେଳେ ତାଙ୍କ ମା’ଙ୍କ ନାମରେ ଉତ୍ତରାଧିକାରୀ ସାର୍ଟିଫିକେଟ୍ ବାହାର କରିବା ପାଇଁ ସେ ଲଇକେରା ତହସିଲଦାରଙ୍କ ନିକଟରେ ଆବେଦନ କରିଥିଲେ। ଏହାର ତଦାରଖ ପାଇଁ ତହସିଲ ଅଫିସ୍ରୁ ଆର୍ଆଇ ଅଫିସ୍କୁ ଯାଇଥିବାବେଳେ ସେଠାରେ ଆର୍ଆଇ ସମ୍ପୃକ୍ତ ବ୍ୟକ୍ତିଙ୍କୁ ୭ହଜାର ଟଙ୍କା ଲାଞ୍ଚ ମାଗିଥିଲେ। ଏ ନେଇ ଶାନ୍ତନୁ ଭିଜିଲାନ୍ସ ବିଭାଗକୁ ଜଣାଇଥିଲେ। ରାଉରକେଲା ଭିଜିଲାନ୍ସ ଏସ୍ପିଙ୍କ ନିର୍ଦ୍ଦେଶ କ୍ରମେ ଝାରସୁଗୁଡା ଡିଏସ୍ପି ପି.କେ. ଆଇନ୍ଦ, ସୁନ୍ଦରଗଡ ଡିଏସ୍ପି ସୁଧାଂଶୁ ଶେଖର ପୂଜାରୀ, ଦେବଗଡ ଡିଏସ୍ପି ଯୋଗେଶ ପ୍ରତାପ ପଟେଲଙ୍କୁ ନେଇ ଟିମ୍ ଗଠନ କରାଯାଇଥିଲା। ଝରିଆବାହାଲ ଛକ ନିକଟରେ ଶାନ୍ତନୁ ଛିଡାହୋଇଥିବା ବେଳେ ଏଆର୍ଆଇ ନାୟକ ଆସି ତାଙ୍କ ନିକଟରୁ ଲାଞ୍ଚ ଟଙ୍କା ଗ୍ରହଣ କରିଥିଲେ। ଏହି ସମୟରେ ପୂର୍ବରୁ ପ୍ରସ୍ତୁତ ରହିଥିବା ଭିଜିଲାନ୍ସ ଅଧିକାରୀ ଟଙ୍କା ସହ ତାଙ୍କୁ କାବୁ କରିଥିଲେ। ପରେ ଆର୍ଆଇ ଭରାସାଗରଙ୍କୁ ତାଙ୍କ କାର୍ଯ୍ୟାଳୟରୁ ଗିରଫ କରିଥିଲେ।
