ଭେଡେନ,୨୯।୭(ସୁଦନ ମହାକୁର): ବରଗଡ଼ ଜିଲା ଭେଡେନ ଥାନା ରୁଷୁଡ଼ା ଫାଣ୍ଡି ଅଧୀନ ଗୋଡ଼ଭଗା-ସୋନପୁର ୫୪ ନମ୍ବର ରାଜ୍ୟ ରାଜପଥର ପଧାନପାଲି ଗ୍ରାମରେ ଥିବା ଆବର୍ଜନା କୁଣ୍ଡ ନିକଟରେ ଆଶ୍ରୟ ନେଇଥିବା ଜଣେ ଯୁବକଙ୍କୁ ପୋଲିସ ଉଦ୍ଧାର କରି ଶନିବାର ପରିବାର ଲୋକଙ୍କୁ ହସ୍ତାନ୍ତର କରିଛି ।
ପ୍ରକାଶ ଯେ, ଖୋର୍ଦ୍ଧା ଜିଲା ବେଗୁନିଆଁ ଥାନା ଗୋବିନ୍ଦପୁର ପଞ୍ଚାୟତ ଅଧୀନ ଲୋକିପୁର ଗ୍ରାମର ହାଡ଼ିବନ୍ଧୁ ନାୟକଙ୍କ ବଡ଼ ପୁଅ ସୂର୍ଯ୍ୟକାନ୍ତ (୩୨) ମେଣ୍ଢା ଚରାଇବାକୁ ଯାଇ ପ୍ରାୟ ୨ ବର୍ଷ ତଳେ ନିଖୋଜ ହୋଇଯାଇଥିଲେ। ପରିବାର ଲୋକେ ବହୁ ଖୋଜାଖୋଜି କରିବା ସତ୍ତ୍ୱେ ତାଙ୍କର ସନ୍ଧାନ ପାଇ ନ ଥିଲେ। ଏ ନେଇ ଥାନାରେ ଏକ ନିଖୋଜ ମାମଲା ରୁଜୁ ହୋଇଥିଲା। ହେଲେ ସୂର୍ଯ୍ୟକାନ୍ତ ୨ବର୍ଷ ହେବ ପଧାନପାଲି ଆବର୍ଜନା କୁଣ୍ଡ ନିକଟରେ ଖରା ବର୍ଷା ଶୀତରେ ପଡ଼ି ରହିଥିଲେ। କୌଣସି ସହୃଦୟ ବ୍ୟକ୍ତି କିଛି ଖାଇବାକୁ ଦେଲେ ସେ ଖାଇ ରହୁଥିଲେ। ଏପରିକି ଦିନେ ଦିନେ ଭୋକ ଉପାସରେ ପଡ଼ି ରହୁଥିଲେ। କିଛି ଦିନ ତଳେ ଋଷୁଡ଼ା ଫାଣ୍ଡି ପୋଲିସ ପାଟ୍ରୋଲିଂ କରୁଥିବା ବେଳେ ଯୁବକଙ୍କୁ ଦେଖି ଗାଡ଼ି ଅଟକାଇଥିଲେ। ପରେ ଫାଣ୍ଡି ଅଧିକାରୀ ପ୍ରେମରାଜ ସାହୁ ଯୁବକଙ୍କ ସମସ୍ତ ତଥ୍ୟ ପଚାରି ବୁଝିଥିଲେ। ଯୁବକଙ୍କ ସାମାନ୍ୟ ମସ୍ତିଷ୍କ ବିକୃତି ରହିଥିବା ବେଳେ ସେ କେମିତି ଏଠାକୁ ଆସିଲେ କିଛି କହି ପାରି ନ ଥିଲେ।
ତେବେ ସେ ଘରକୁ ଫେରିବାକୁ ଚାହୁଁଥିବା ପୋଲିସ ଆଗରେ କହିଥିଲେ। ପୋଲିସ ତୁରନ୍ତ ବେଗୁନିଆଁ ଥାନା ସହିତ ଯୋଗାଯୋଗ କରିଥିଲେ। ଖବର ତାଙ୍କ ପରିବାର ଲୋକଙ୍କ ପାଖରେ ପହଞ୍ଚି ଥିଲା । ପରେ ପରିବାର ଲୋକେ ଋଷୁଡ଼ାରେ ପହଞ୍ଚି ପୋଲିସ, ଗ୍ରାମବାସୀ ଏବଂ ସ୍ଥାନୀୟ ସରପଞ୍ଚଙ୍କ ଉପସ୍ଥିତିରେ ସୂର୍ଯ୍ୟକାନ୍ତଙ୍କୁ ନେଇ ଘରକୁ ଫେରିଥିଲେ। ଏନେଇ ପରିବାର ଲୋକେ ଫାଣ୍ଡି ଅଧିକାରୀଙ୍କ ମହନୀୟତା, ସ୍ଥାନୀୟ ଗ୍ରାମବାସୀ ଏବଂ ସରପଞ୍ଚଙ୍କୁ କୃତଜ୍ଞତା ଜଣାଇଛନ୍ତି।
