କଟକ,୧୯ା୪ (କାର୍ତ୍ତିକ ସାହୁ) ଜଣେ ଚିଟ୍ଫଣ୍ଡ ଅଭିଯୁକ୍ତଙ୍କ ପାସ୍ପୋର୍ଟ ଫେରାଇବାକୁ ହାଇକୋର୍ଟ ସିବିଆଇକୁ ଆଦେଶ ଦେଇଛନ୍ତି। ଏଥିସହ ସମ୍ପୃକ୍ତ ଅଭିଯୁକ୍ତଙ୍କ ପାସ୍ପୋର୍ଟ ଫେରାଇବା ବିରୋଧରେ ସିବିଆଇ ଅଦାଲତ ଦେଇଥିବା ଆଦେଶକୁ ହାଇକୋର୍ଟ ଖାରଜ କରିଛନ୍ତି। ଏଡେନ୍ ଇନ୍ଫ୍ରା ପ୍ରୋଜେକ୍ଟ୍ସ୍ ପ୍ରାଇଭେଟ୍ ଲିମିଟେଡ୍ ଚିଟ୍ଫଣ୍ଡ କମ୍ପାନୀର ମୁଖ୍ୟ ଇନ୍ଦ୍ରଜିତ୍ ଦେଙ୍କ ପକ୍ଷରୁ ଆଗତ ଆବେଦନର ଶୁଣାଣି କରି ହାଇକୋର୍ଟ ଏହି ଆଦେଶ ଦେଇଛନ୍ତି।
ମାମଲାର ବିବରଣୀ ଅନୁସାରେ, ବାଲେଶ୍ୱର ଜିଲା ବାଲିଆପାଳରେ ଉପରୋକ୍ତ କମ୍ପାନୀ ମୁଖ୍ୟାଳୟ ଖୋଲି ସ୍ବଳ୍ପ ସମୟରେ ଜମାଟଙ୍କା ଦୁଇଗୁଣା କରାଇଦେବାର ଲୋଭ ଦେଖାଇ ଜମାକାରୀଙ୍କ ନିକଟରୁ ୨ କୋଟି ୫ ଲକ୍ଷରୁ ଊର୍ଦ୍ଧ୍ୱ ଟଙ୍କା ଠକି ନେଇଥିବା ଅଭିଯୋଗ ହୋଇଥିଲା। ଏହି ମାମଲାରେ ସିବିଆଇ ପ୍ରାଇଜ୍ ଚିଟ୍ସ ଏଣ୍ଡ୍ ମନି ସର୍କ୍ୟୁଲେସନ୍ (ସ୍କିମ୍) ବ୍ୟାନିଂ ଆକ୍ଟ୍ ୧୯୭୮ ଆଧାରରେ କମ୍ପାନୀ ମୁଖ୍ୟ ଦେଙ୍କୁ ଗିରଫ କରିଥିଲା। ସିବିଆଇ ତାଙ୍କ ବିରୋଧରେ କୋର୍ଟରେ ଅଭିଯୋଗ ଫର୍ଦ୍ଦ ଦାଖଲ କରିଥିଲା। ତେବେ ଏହି ମାମଲାରେ ସେ ଜାମିନରେ ମୁକୁଳିବା ବେଳେ ସିବିଆଇ କୋର୍ଟରେ ନିଜର ପାସ୍ପୋର୍ଟ ୨୦୨୩ ଅକ୍ଟୋବର ୯ ତାରିଖ ଦିନ ଦାଖଲ କରିଥିଲେ। ପରବର୍ତ୍ତୀ ସମୟରେ ତାଙ୍କୁ ପାସ୍ପୋର୍ଟ ପ୍ରଦାନ କରିବାକୁ ସେ ସିବିଆଇ କୋର୍ଟରେ ଆବେଦନ କରିଥିଲେ ବି ତାହା ଖାରଜ ହୋଇଥିଲା। ପରବର୍ତ୍ତି ସମୟରେ ଏହାକୁ ନେଇ ଶ୍ରୀ ଦେ ହାଇକୋର୍ଟରେ ଏକ ମାମଲା ରୁଜୁ କରି ଦୁଇମାସ ପର୍ଯ୍ୟନ୍ତ ତାଙ୍କୁ ପାସ୍ପୋର୍ଟ ପ୍ରଦାନ କରିବାକୁ ପ୍ରାର୍ଥନା କରିଥିଲେ। ଏଥିରେ ସେ ଦର୍ଶାଇଥିଲେ ଯେ ଆମେରିକାରେ ତାଙ୍କ ଶାଶୁ ଶଯ୍ୟାଶାୟୀ ହୋଇ ମୃତ୍ୟୁ ସହ ସଂଗ୍ରାମ କରୁଛନ୍ତି। ତାଙ୍କ ଛୋଟ ଝିଅ ଓ ସ୍ତ୍ରୀ ମଧ୍ୟ ଆମେରିକାରେ ରହୁଛନ୍ତି। ଆମେରିକାରେ ତାଙ୍କୁ ଗ୍ରୀନ୍ କାର୍ଡ ମିଳିଥିବା ବେଳେ ସେ ନିମୟିତ ଭାବେ ଆମେରିକା ଯାଇଥାନ୍ତି ବୋଲି କୋର୍ଟଙ୍କୁ ଦର୍ଶାଇଥିଲେ। ହାଇକୋର୍ଟ ମାମଲାର ଶୁଣାଣି ବେଳେ ଦର୍ଶାଇଛନ୍ତି ଯେ ପାସ୍ପୋର୍ଟ ମିଳିଗଲେ ସେ ଫ୍ଲାଇଟ୍ରେ ଦେଶ ଛାଡ଼ି ପଳାଇବେ ଅନୁମାନ କରାଯାଇପାରେ ମାତ୍ର ଆଇନରୁ ମୁକୁଳିପାରିବେ ନାହିଁି ବୋଲି ସ୍ପଷ୍ଟ କରିଛନ୍ତି।
