ଭବାନୀପାଟଣା,୨୬।୪(ସ୍ବ.ପ୍ର.): କଳାହାଣ୍ଡି ଜିଲା ଧର୍ମଗଡ଼ ଉପଡ଼ାକମଣ୍ଡଳ ଅଧୀନରେ ଥିବା ବିଭିନ୍ନ ପୋଷ୍ଟ ଅଫିସ୍ର ୫ଜଣ ପୋଷ୍ଟ ମାଷ୍ଟର କିଛିଦିନ ମଧ୍ୟରେ ଚାକିରିରୁ ଇସ୍ତଫା ଘଟଣା ସାମ୍ନାକୁ ଆସିଛି। ସେମାନେ ହେଲେ ଗୋଲାମୁଣ୍ଡା ବ୍ଲକ ବୋରଗୁଡ଼ାରେ କାର୍ଯ୍ୟରତ ଥିବା ଗ୍ରାମୀଣ ଡାକ ସେବକ (ପୋଷ୍ଟମାଷ୍ଟର) ସୁନୀତା ସାହୁ, ଜୁନାଗଡ଼ ବ୍ଲକ ଚକୁଳିରେ କାର୍ଯ୍ୟରତ କୋଟିଲିଙ୍ଗ ଭେଙ୍କଟେଶ, ଦେଦରରେ ଥିବା ନାରାୟଣ ମାଝି, କଲେଇ ଗଁାରେ ଥିବା ଚିନ୍ମୟ ରଞ୍ଜନ ଭୋଇ ଏବଂ ଛୋରିଆଗଡ଼ରେ ସହକାରୀ ଡାକ ପୋଷ୍ଟମାଷ୍ଟର ଭାବେ କାର୍ଯ୍ୟରତ ନୀଳାଞ୍ଚଳ ନାୟକ। ତେବେ ୯ ମାସ ଧରି କାର୍ଯ୍ୟରତ ଏହି ୫ ପୋଷ୍ଟମାଷ୍ଟର ହଠାତ୍ କାହିଁକି ଚାକିରିରୁ ଇସ୍ତଫା ଦେଲେ ତାକୁ ନେଇ ଏବେ ନାନା ସନ୍ଦେହ ପ୍ରକାଶ ପାଇଛି। ଗତ କିଛିଦିନ ତଳେ କଳାହାଣ୍ଡି ଜିଲା କୁଣ୍ଡାବନ୍ଦ ଗ୍ରାମର ରୁଦ୍ରମଣି ମିଶ୍ର ଜାଲ୍ ସାର୍ଟଫିକେଟ ଦେଇ ପୋଷ୍ଟମାଷ୍ଟର ଭାବେ ନିଯୁକ୍ତି ପାଇଥିଲେ। ସାର୍ଟିଫିକେଟ ଯାଞ୍ଚ ସମୟରେ ଜାଲିଆତି ଜଣାପଡ଼ିବା ପରେ ସେ ଫେରାର ହୋଇଯାଇଥିଲେ। ବଲାଙ୍ଗୀର ଡାକ ମଣ୍ଡଳରେ ଜାଲ୍ ସାର୍ଟିଫିକେଟ ଫର୍ଦ୍ଦାଫାଶ ପରେ ରାଜ୍ୟ ସାରା ଆଲୋଡ଼ନ ସୃଷ୍ଟି ହୋଇଥିଲା। ଏହାର ଚେର କଳାହାଣ୍ଡିକୁ ଲମ୍ବିଥିବା ଜଣାପଡ଼ିଥିଲା। ଜିଲାରେ ଡାକ ବିଭାଗରେ ୧୦୫ ପଦବୀ ପାଇଁ ଆବେଦନ କରିଥିବା ପ୍ରାର୍ଥୀଙ୍କ ମଧ୍ୟରୁ ୭୮ଜଣ ସାର୍ଟିଫିକେଟ ଯାଞ୍ଚ ପ୍ରକ୍ରିୟାରେ ସାମିଲ ହୋଇଥିବାବେଳେ ୨୭ ଜଣ ଅନୁପସ୍ଥିତ ରହିଥିଲେ। ସମ୍ପୃକ୍ତ ୨୭ ଜଣ ଜାଲ ସାର୍ଟିଫିକେଟ ଦେଇ ଆବେଦନ କରିଥିବାରୁ ଧରାପଡ଼ିଯିବା ଭୟରେ ସେମାନେ ଆସି ନ ଥିବା ସନ୍ଦେହ ସୃଷ୍ଟି ହୋଇଥିଲା। ବର୍ତ୍ତମାନ ପୋଷ୍ଟମାଷ୍ଟର ଇସ୍ତଫା ଦେବା ପଛରେ ଜାଲ୍ ସାର୍ଟିଫେକଟ ମୁଖ୍ୟ କାରଣ ବୋଲି ଚର୍ଚ୍ଚା ହେଉଛି। ତେବେ ସାର୍ଟିଫିକେଟ୍ ଯାଞ୍ଚ କରାଗଲେ ଏହାର ସତ୍ୟତା ଜଣାପଡ଼ନ୍ତା ବୋଲି ଆଲୋଚନା ହେଉଛି। ଏ ନେଇ ଧର୍ମଗଡ଼ ଡାକ ନିରୀକ୍ଷକ ଅନନ୍ତ ଚରଣ ସାହୁଙ୍କୁ ପଚାରିବାରୁ ୫ ଜଣ ପୋଷ୍ଟ ମାଷ୍ଟର ଇସ୍ତଫା ଦେବା କଥାକୁ ସେ ସ୍ବୀକାର କରିଛନ୍ତି ଏବଂ ଇସ୍ତଫାର କାରଣ ସମ୍ପର୍କରେ ଜାଣି ନ ଥିବା କହିଛନ୍ତି।
