କେନ୍ଦୁଝର,୧ା୧୦(ସ୍ବ.ପ୍ର.): ସଦର ବ୍ଲକ ପଳାଶପଙ୍ଗାସ୍ଥିତ ଓଡ଼ିଶା ସ୍ପଞ୍ଜ ଲୁହା କାରଖାନା ସମ୍ମୁଖରେ ଶନିବାର ସ୍ଥାନୀୟ କ୍ଷତିଗ୍ରସ୍ତ ୩ଟି ପଞ୍ଚାୟତ- ପଳାଶପଙ୍ଗା, ରାଇକଳା ଓ କଣ୍ଡରାପଶିର ଗ୍ରାମବାସୀ ନିଯୁକ୍ତି ଦାବିରେ ଧାରଣାରେ ବସିଛନ୍ତି। ଦାବି ପୂରଣ ନ ହେଲେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିବେ ବୋଲି ଚେତାବନୀ ଦେଇଛନ୍ତି। ଏହି ଆନ୍ଦୋଳନରେ ୪ ନମ୍ବର ଜୋନର ଜିଲା ପରିଷଦ ସଭ୍ୟା ଲୀଳାବତୀ ମହାନ୍ତ, ପଳାଶପଙ୍ଗା ସରପଞ୍ଚ ବାସନ୍ତୀ ନାଏକ ଓ ସମିତି ସଭ୍ୟ ସଞ୍ଜୟ ନାୟକ, ରାଇକଳା ସରପଞ୍ଚ ପ୍ରମୋଦ ନାଏକ ଓ ସମିତି ସଭ୍ୟା ଦ୍ରୌପଦୀ ମହାନ୍ତ, କଣ୍ଡରାପଶି ସରପଞ୍ଚ ସାବିତ୍ରୀ ନାଏକ ଓ ସମିତିଭ୍ୟା ଲଛମନ ମୁଣ୍ଡା ଏବଂ ଝୁମ୍ପୁରା ସରପଞ୍ଚ ରେବତୀ ବିରୁଆ ସାମିଲ ହୋଇଛନ୍ତି।
ଏନେଇ କାରଖାନାରର ମୁଖ୍ୟ ପରିଚାଳନା ଅଧିକାରୀ କବଲଦୀପ ସାହାଣି ଆସି ଆନ୍ଦୋଳନ କାରୀଙ୍କ ସହିତ ଆଲୋଚନା କରିଥିଲେ। ଶିକ୍ଷାଗତ ଯୋଗ୍ୟତା ଆଧାରରେ ସ୍ଥାନୀୟ ଯୁବକମାନଙ୍କ ନିଯୁକ୍ତି ଏବଂ ସ୍ଥାନୀୟ ଲୋକଙ୍କ ଠିକାକାମ ଦେବା ପାଇଁ ସହମତି ହୋଇଥିଲେ ହେଁ କାରଖାନାର ପରିଚାଳନା ଦାୟିତ୍ୱରେ ଥିବା ଅଧିକାରୀମାନଙ୍କ ସହିତ ଆଲୋଚନା ପରେ କୌଣସି ପ୍ରତିଶ୍ରୁତି ଦେଇ ପାରିବେ ବୋଲି କହିଥିଲେ।
ତେବେ ଏହାକୁ ନେଇ ଆନ୍ଦୋଳନକାରୀମାନେ ଅସନ୍ତୋଷ ବ୍ୟକ୍ତ କରି ଧାରଣା ଜାରି ରଖିଛନ୍ତି। ନିଯୁକ୍ତି ଓ କାମ ଦେବା ନେଇ ଲିଖିତ ପ୍ରତିଶ୍ରୁତି ନ ପାଇବା ପର୍ଯ୍ୟନ୍ତ ଶାନ୍ତିପୂର୍ଣ୍ଣ ଭାବରେ ଧାରଣା ଜାରି ରହିବ ବୋଲି ଚେତାବନୀ ଦେଇଛନ୍ତି। ଆଇନଶୃଙ୍ଖଳା ରକ୍ଷା ପାଇଁ ଆନ୍ଦୋଳନସ୍ଥଳରେ ପୋଲିସ ମୁତୟନ ହୋଇଛନ୍ତି।
ପ୍ରକାଶ ଯେ, ଏହି କାରଖାନା ଉକ୍ତ ଅଞ୍ଚଳର ଲୋକଙ୍କ ଜୀବନଜୀବିକା ହୋଇ ରହିଥିଲା। ପ୍ରତ୍ୟକ୍ଷ ଓ ପରୋକ୍ଷ ଭାବରେ ଲୋକମାନେ କାମଧନ୍ଦା କରି ଚଳୁଥିଲେ। ପ୍ରାୟ ୮ ବର୍ଷ ତଳେ ଏହି କାରଖାନା ବନ୍ଦ ହୋଇଯିବାରୁ ଲୋକମାନେ ବହୁ ଅସୁବିଧା ମଧ୍ୟରେ ରହୁଥିଲେ। ତେବେ ମାସକ ତଳେ ଏହି କାରଖାନା ପୁନଃ କାର୍ଯ୍ୟକ୍ଷମ ହୋଇଥିଲେ ହେଁ ସ୍ଥାନୀୟ ଲୋକଙ୍କୁ ନିଯୁକ୍ତି କ୍ଷେତ୍ରରେ ଉପେକ୍ଷା କରିଆସୁଛି। ବାଧ୍ୟ ହୋଇ ଗ୍ରାମବାସୀ ଏଭଳି ପଦକ୍ଷେପ ଗ୍ରହଣ କରିଛନ୍ତି।
