ଅହମଦାବାଦ୍, ୨୯ା୧୨: ଗୁଜରାଟର ରାଜକୋଟରେ ଏକ ଘରେ ୧୦ ବର୍ଷ ଧରି ବନ୍ଦ ରହିଥିବା ୩ ଭଉଣୀଭାଇଙ୍କୁ ଉଦ୍ଧାର କରାଯାଇଛି। ସେମାନଙ୍କ ନାମ ଅମରେଶ(୪୨), ଭବେଶ(୩୯) ଓ ମେଘ୍ନା ବୋଲି ଜଣାପଡିଛି। ଏକ ସ୍ବେଚ୍ଛାସେବୀ ସଙ୍ଗଠନ ସେମାନଙ୍କ ବାପାଙ୍କ ସହାୟତାରେ ଉକ୍ତ ଘରକୁ ଖୋଲିଥିଲା। ସେମାନେ ନିଜେ ନିଜକୁ ଦୀର୍ଘ ବର୍ଷ ଧରି ବନ୍ଦ କରି ରଖିଥିଲେ। ଘରର କବାଟ ଭାଙ୍ଗିଲା ପରେ ତାହା ଭିତର ସମ୍ପୂର୍ଣ୍ଣ ଅନ୍ଧକାରମୟ ଏବଂ ଏଣେତେଣେ ଖବରକାଗଜ ଓ କିଛି କଞ୍ଚା ଖାଦ୍ୟ ପଡିଥିବା ଦେଖିବାକୁ ମିଳିଥିଲା। ମା’ଙ୍କ ମୃତ୍ୟୁ ପରେ ସେମାନଙ୍କ ମାନସିକ ସ୍ଥିତି ବିଗିଡ଼ି ଯାଇଥିଲା। ପରେ ୩ ଜଣ ଯାକ ସମସ୍ତଙ୍କଠାରୁ ଦୂରେଇ ରହିଥିଲେ। ବହୁ ଉଦ୍ୟମ ସତ୍ତ୍ୱେ ସେମାନଙ୍କ ବାପା ୩ ଜଣଙ୍କୁ ଏଭଳି ସ୍ଥିତିରୁ ବାହାରକୁ ଆଣିବାରେ ସଫଳ ହୋଇ ନ ଥିଲେ। କେବଳ ପ୍ରତିଦିନ କବାଟ ପାଖରେ କିଛି ଖାଦ୍ୟ ରଖି ଦେଉଥିଲେ। ୩ ଜଣଙ୍କ ମାନସିକ ସ୍ବାସ୍ଥ୍ୟ ସୁଧାରିବା ପାଇଁ ଚିକିତ୍ସା ଜରୁରୀ ବୋଲି ସଙ୍ଗଠନ ପକ୍ଷରୁ କୁହାଯାଇଛି।
