ପରଜଙ୍ଗ, ୨୮।୧(ଡି.ଏନ.ଏ.): ପାଳିତ ମା’ବାପାଙ୍କ ଦ୍ୱାରା ଅକଥନୀୟ ନିର୍ଯାତନାର ଶିକାର ହୋଇଥିବା ୨ କୋମଳମତି ଶିଶୁଙ୍କୁ ବନ୍ଦ ପ୍ରକୋଷ୍ଠରୁ ଉଦ୍ଧାର କରିଛି ଢେଙ୍କାନାଳ ଜିଲା ପରଜଙ୍ଗ ଥାନା ସରାଙ୍ଗ ଫାଣ୍ଡି ପୋଲିସ। ଡମୋଳ ଗ୍ରାମରୁ ଆସିଥିବା ଏଭଳି ହୃଦୟ ବିଦାରକ ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
ଡମୋଳ ସରପଞ୍ଚ ସୁନୀଲ ଧଳ ଏବଂ ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ସରାଙ୍ଗ ଗ୍ରାମର କାଳିଆ ନାୟକ ହେଉଛନ୍ତି ସମ୍ପୃକ୍ତ ଦୁଇ ଶିଶୁଙ୍କ ପ୍ରକୃତ ବାପା। ସେମାନଙ୍କ ମଧ୍ୟରୁ ବଡ଼ ଝିଅଟିର ବୟସ ୭ବର୍ଷ ଏବଂ ସାନପୁଅର ବୟସ ୪ ବର୍ଷ। ତେବେ ସ୍ତ୍ରୀଙ୍କ ଆକସ୍ମିକ ମୃତ୍ୟୁ ପରେ ଉଭୟ ସନ୍ତାନଙ୍କୁ ଲାଳନପାଳନ କରିବାରେ ଅସମର୍ଥ ହୋଇପଡ଼ିଥିଲେ କାଳିଆ। ଏଭଳି ସ୍ଥିତିରେ ଡମୋଳ ଗ୍ରାମର ଦମ୍ପତି ଅଜୟ ସାହୁ ଓ ସୁକାନ୍ତି ସାହୁଙ୍କ ଉପରେ ଭରସା କରି ପ୍ରାୟ ୮ ମାସ ତଳେ ଉଭୟଙ୍କୁ ସେମାନଙ୍କ ହାତରେ ଟେକିଦେଇଥିଲେ। ହେଲେ ଏହାପରେ ଶିଶୁ ଦୁହିଙ୍କ ଉପରେ ପାଳିତ ମା’ବାପାଙ୍କ ଆରମ୍ଭ ହୋଇଯାଇଥିଲା ନିର୍ଯାତନା। ସେମାନଙ୍କୁ ଘର କାମ କରିବାକୁ ବାଧ୍ୟ କରୁଥିଲେ। ଠିକ୍ ଭାବେ ଖାଇବାକୁ ଦେଉ ନ ଥିଲେ। ସାମାନ୍ୟ ଭୁଲ୍ ହେଲେ ନିସ୍ତୁକ ମାଡ଼ମାରି ଘରେ ତାଲା ପକାଇ ବନ୍ଦ କରିଦେଉଥିଲେ। ଏଭଳି ଏକ ସମ୍ବେଦନଶୀଳ ଘଟଣା ସମ୍ପର୍କରେ ଉପଜିଲାପାଳ ଜ୍ୟୋତିଶଙ୍କର ସାହୁ କୌଣସି ସୂତ୍ରରୁ ସୂଚନା ପାଇ ପରଜଙ୍ଗ ପୋଲିସକୁ ଶିଶୁଙ୍କୁ ଉଦ୍ଧାର କରିବାକୁ ନିର୍ଦ୍ଦେଶ ଦେଇଥିଲେ। ନିର୍ଦ୍ଦେଶ ଅନୁଯାୟୀ ଶୁକ୍ରବାର ସରାଙ୍ଗ ଫାଣ୍ଡି ଅଧିକାରୀ ପ୍ରଶାନ୍ତ ସାହୁ ପହଞ୍ଚତ୍ ଜଣେ ଶିଶୁଙ୍କୁ ବନ୍ଦ ପାଇଖାନା ଘରୁ ଏବଂ ଅନ୍ୟଜଣଙ୍କୁ ବନ୍ଦ କୋଠରିରୁ ଉଦ୍ଧାର କରିଥିଲେ। ଶିଶୁ ନିର୍ଯାତନା ଭଳି ଘଟଣାରେ ସମ୍ପୃକ୍ତ ଦମ୍ପତିଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରପଞ୍ଚ ଏବଂ ଗ୍ରାମବାସୀ ଦାବି କରିଛନ୍ତି। ଅନ୍ୟପଟେ
ଶିଶୁଙ୍କୁ ନିର୍ଯାତନା ଦେଉଥିବା ଅଭିଯୋଗକୁ ଖଣ୍ଡନ କରିଛନ୍ତି ପାଳିତ ମା’ବାପା ସୁକାନ୍ତି ଏବଂ ଅଜୟ। ସେମାନେ କହିଛନ୍ତି, ଶିଶୁମାନେ ଅବାଧ୍ୟ ହେଉଛନ୍ତି। ସ୍କୁଲ ଛୁଟି ପରେ ବହୁ ବିଳମ୍ବରେ ଘରକୁ ଫେରୁଛନ୍ତି। ସେମାନଙ୍କୁ ଘରେ ଛାଡ଼ି ଜରୁରୀ କାମରେ ଗଲେ କଳିଝଗଡ଼ା କରୁଛନ୍ତି। ତେଣୁ ଶୁକ୍ରବାର ଏକ କାମରେ ସରାଙ୍ଗ ଯାଇଥିବାରୁ ଖାଇବାକୁ ଦେଇ ସେମାନଙ୍କୁ ଅଲଗା ଅଲଗା ଘରେ କବାଟ ବନ୍ଦ କରି ରଖି ଯାଇଥିବା କହିଛନ୍ତି। ଏ ସଂକ୍ରାନ୍ତରେ ସରାଙ୍ଗ ଫାଣ୍ଡି ଅଧିକାରୀ କୁହନ୍ତି, ଉଦ୍ଧାର ପରେ ଦୁଇ ଶିଶୁ ଏବଂ ସେମାନଙ୍କ ପାଳିତ ମା’ବାପାଙ୍କୁ ସିଡବ୍ଲ୍ୟୁସି ନିକଟରେ ହାଜର କରାଯାଇଛି। ସିଡବ୍ଲ୍ୟୁସିଙ୍କ ନିଷ୍ପତ୍ତି ଅନୁଯାୟୀ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅନ୍ୟପଟେ ଘଟଣା ଅତି ସମ୍ବେଦନଶୀଳ ଥିବାରୁ ଏହାର ତଦନ୍ତ କରାଯିବ ବୋଲି ଉପଜିଲାପାଳ କହିଛନ୍ତି।
