ଯାଜପୁର,୧୬ା୧୦(ହର୍ଷବର୍ଦ୍ଧନ ବେହେରା) : ଯାଜପୁର ଜିଲାର ବିଭିନ୍ନ ହୋଟେଲ, ଗ୍ୟାରେଜ ଆଦି ସ୍ଥାନରେ କାମ କରୁଥିବା ଶିଶୁମାନଙ୍କୁ ଉଦ୍ଧାର କରିବା ପରେ ପୁଣି ସେମାନେ ଶିଶୁ ଶ୍ରମିକ ଭାବେ କାମ କରୁଥିବା ଦେଖିବାକୁ ମିଳିଛି।
ଶିଶୁ ଅଧିକାରକୁ କ୍ଷୁର୍ଣ୍ଣ କରୁଥିବା ବ୍ୟକ୍ତି ବିଶେଷଙ୍କ ବିରୋଧରେ ଶିଶୁ ଓ କିଶୋର ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଅଭିଯୋଗ ହୋଇଛି। ଏ ସଂକ୍ରାନ୍ତରେ ଶିଶୁ ଅଧିକାର କର୍ମୀ ମଣ୍ଟୁ ଦାସ ଶ୍ରମ ଉଦ୍ଧାରକାରୀ ଟାକ୍ସଫୋର୍ସ କମିଟିର ଅଧ୍ୟକ୍ଷ ଓ ଶ୍ରମ କମିଶନରଙ୍କୁ ପତ୍ର ମାଧ୍ୟମରେ ଅବଗତ କରିଛନ୍ତି । ଯଦି ପ୍ରଶାସନ ପକ୍ଷରୁ ଶ୍ରମ ମୁକ୍ତ ରାଜ୍ୟ ଗଠନ ପାଇଁ ଉପଯୁକ୍ତ ପଦକ୍ଷେପ ଗ୍ରହଣ କରା ନ ଯାଏ ତେବେ ସେ ନ୍ୟାୟିକ ବ୍ୟବସ୍ଥାର ଆଶ୍ରୟ ନେବେ ବୋଲି ଚେତାବନୀ ଦେଇଛନ୍ତି। ସେ ତାଙ୍କ ଅଭିଯୋଗରେ ଆହୁରି ଦର୍ଶାଇଛନ୍ତି ଯେ, ଗତ ଏପ୍ରିଲ ୨୯ରେ ରସୁଲପୁର ବ୍ଲକ କାର୍ଯ୍ୟାଳୟରେ ଅନୁଷ୍ଠିତ ଜନଶୁଣାଣୀ ଶିବିରରେ ଜାତୀୟ ରାଜପଥ-୧୬ ଗୋପାଳପୁର ନିକଟରେ ଥିବା ଏକ ହୋଟେଲରୁ ଦୁଇ ଜଣ ଶିଶୁ ଶ୍ରମିକ କାମ କରୁଥିଲେ। ଘଟଣାର ଅଭିଯୋଗ ପରେ ଜିଲାପାଳଙ୍କ ନିର୍ଦ୍ଦେଶରେ ଡିସିପିଓ ଓ କୁଆଖିଆ ପୋଲିସ ମିଳିତ ପ୍ରୟାସରେ ହୋଟେଲରେ ଚଢାଉ କରି ଦୁଇ ଶିଶୁଙ୍କୁ ଉଦ୍ଧାର କରିଥିଲେ। ଶିଶୁ ଦୁହିଁଙ୍କୁ ଶିଶୁ ମଙ୍ଗଳ କମିଟିରେ ହାଜର କରିବା ପରେ ସେମାନଙ୍କ ଅଭିଭାବକଙ୍କୁ ହସ୍ତାନ୍ତର କରାଯାଇଥିଲା । ମାତ୍ର ସେମାନଙ୍କ ମଙ୍ଗଳ ପାଇଁ କୌଣସି ବ୍ୟବସ୍ଥା କରାଯାଇ ନ ଥିଲା। କେବଳ ସେମାନଙ୍କୁ ଭିନ୍ନ ଭିନ୍ନ ଶିକ୍ଷାନୁଷ୍ଠାନରେ ନାମ ଲେଖାଇ ଦିଆଯାଇଥିଲା। କିନ୍ତୁ ଶିଶୁଙ୍କ ପାରିବାରିକ ଆର୍ଥିକ ସ୍ଥିତିର ସୁଧାର ପାଇଁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିଲା । ଉକ୍ତ ଶିଶୁଙ୍କ ସ୍ଥାୟୀ ଘର ଅଛି କି ନାହିଁ ତାହାର ତଥ୍ୟ ନିଆଯାଇ ନ ଥିଲା । ପରିବାରରେ ଦାରିଦ୍ର୍ୟତା ଯୋଗୁ ଶିଶୁ ଦୁଇଜଣ ଏବେ ଉକ୍ତ ହୋଟେଲରେ ପୁନର୍ବାର ଶ୍ରମିକ ଭାବେ କାମ କରୁଥିବା ଅଭିଯୋଗ ହୋଇଛି। ହୋଟେଲରୁ ଶିଶୁ ଉଦ୍ଧାର ୩ ମାସ ପରେ ମଧ୍ୟ ପ୍ରଶାସନ ପକ୍ଷରୁ ହୋଟେଲ ମାଲିକ ବିରୋଧରେ ଏତଲା ମଧ୍ୟ କରାଯାଇନାହିଁ । ଯାହାଫଳରେ ଶିଶୁ ଦୁହେଁ ଏବେ ବି ଶ୍ରମିକ ଭାବେ ନିଯୋଜିତ ହୋଇଥିବା ସୂଚନା ମିଳିଛି।
ସୂଚନାଯୋଗ୍ୟ, ଜିଲାରେ ଶିଶୁ ଶ୍ରମିକ ବଢୁଥିବା ବେଳେ ଜିଲା ପ୍ରଶାସନ ପକ୍ଷରୁ କେବେ କେମିତି ଉଦ୍ଧାର କରାଯାଉଛି। ମାତ୍ର ନିୟମ ଅନୁଯାୟୀ ଶିଶୁଶ୍ରମିକ ନିଯୋଜିତ କରୁଥିବା ଲୋକଙ୍କ ବିରୋଧରେ କୌଣସି ପ୍ରକାର ଆଇନଗତ କାର୍ଯ୍ୟାନୁଷ୍ଠାନ ନିଆଯାଉ ନ ଥିବାରୁ ସମାଜରେ ଶିଶୁଶ୍ରମିକ ସଂଖ୍ୟା ଅଣାୟତ୍ତ ହେବାର ଦେଖା ଦେଇଛି। ଅପରପକ୍ଷେ ଶିଶୁଶ୍ରମିକ ନିୟୋଜିତ କରୁଥିବା ବ୍ୟକ୍ତିମାନେ ଆହୁରି ଉତ୍ସାହିତ ହେଇଛନ୍ତି। ଯାହାଫଳରେ ସରକାରଙ୍କ ଯେଉଁ ମହତ୍ ଉଦ୍ଦେଶ୍ୟ ରହିଛି ଶିଶୁଶ୍ରମିକ ମୁକ୍ତ ରାଜ୍ୟ ଗଠନ କରିବା ତାହା ସଫଳ ହୋଇ ପାରୁନାହିଁ ବୋଲି ମତପ୍ରକାଶ ପାଇଛି। ଏ ସଂକ୍ରାନ୍ତରେ ଜିଲା ଶିଶୁ ସୁରକ୍ଷା ଅଧିକାରୀ ନିରଞ୍ଜନ କରଙ୍କ ମତାମତ ନେବାକୁ ତାଙ୍କ ମୋବାଇଲକୁ ରବିବାର ରାତି ପ୍ରାୟ ୭ ଟା ୫୦ ମିନିଟରେ ଯୋଗାଯୋଗ କରିଥିଲେ ହେଁ ସେ ଫୋନ କଲ ଗ୍ରହଣ କରି ନ ଥିଲେ।
