ନୂଆଦିଲ୍ଲୀ, ୨୮।୫:କେନ୍ଦ୍ର ସରକାରଙ୍କ ପକ୍ଷରୁ ଗତ ଫେବୃୟାରୀରେ ଜାରି ହୋଇଥିବା ନୂଆ ଡିଜିଟାଲ ମିଡିଆ ନିୟମାବଳୀ କେତେଦୂର କାର୍ଯ୍ୟକାରୀ ହୋଇଛି ୧୫ ଦିନ ମଧ୍ୟରେ ତା’ର ସବିଶେଷ ବିବରଣୀ ଦାଖଲ କରିବା ପାଇଁ ସୂଚନା ଓ ପ୍ରସାରଣ ମନ୍ତ୍ରଣାଳୟ ସମସ୍ତ ଓଭର ଦି ଟପ୍ (ଓଟିଟି), ଡିଜିଟାଲ ନ୍ୟୁଜ୍ ପ୍ଲାଟଫର୍ମ ସମେତ ଡିଜିଟାଲ ମିଡିଆ ପବ୍ଲିଶରମାନଙ୍କୁ ଗୁରୁବାର ନିର୍ଦ୍ଦେଶ ଦେଇଛି। ବୁଧବାର ସମସ୍ତ ସୋସିଆଲ ମିଡିଆ ପ୍ଲାଟଫର୍ମକୁ ୨୪ ଘଣ୍ଟା ମଧ୍ୟରେ ଅନୁରୂପ ଅନୁପାଳନ ରିପୋର୍ଟ ଦାଖଲ କରିବା ପାଇଁ କୁହାଯାଇଥିଲା।
ଡିଜିଟାଲ ନ୍ୟୁଜ୍ ସଂସ୍ଥା, ସୋସିଆଲ ମିଡିଆ ପ୍ଲାଟଫର୍ମ, ନେଟ୍ଫ୍ଲିକ୍ସ ଭଳି ଓଟିଟି ଷ୍ଟ୍ରିମିଂ ସେବାକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର ଗତ ଫେବୃୟାରୀରେ ପ୍ରଥମ ଥର ପାଇଁ ସୂଚନା ପ୍ରଯୁକ୍ତି (ମଧ୍ୟବର୍ତ୍ତୀ ସଂସ୍ଥାଗୁଡ଼ିକ ପାଇଁ ଗାଇଡ୍ଲାଇନ ଓ ଡିଜିଟାଲ ମିଡିଆ ଏଥିକ୍ସ କୋଡ୍) ନିୟମାବଳୀ, ୨୦୨୧ ପ୍ରଣୟନ କରିଥିଲେ। ଏ ସମ୍ପର୍କିତ ବିଜ୍ଞପ୍ତି ପ୍ରକାଶ କରି ସରକାର କହିଥିଲେ, ଏପରି ଏକ ବ୍ୟବସ୍ଥା ପ୍ରସ୍ତୁତ କରାଯିବ, ଯେଉଁଥିରେ ନ୍ୟୁଜ୍ ଓ୍ବେବସାଇଟ୍ ଏବଂ ଓଟିଟି ପ୍ଲାଟଫର୍ମଗୁଡ଼ିକ ପାଇଁ କୋଡ୍ ଅଫ୍ ଏଥିକ୍ସ ଏବଂ ତ୍ରିସ୍ତରୀୟ ଅଭିଯୋଗ ସମାଧାନ ସଂରଚନା ରହିବ। ତଦନୁଯାୟୀ ସମସ୍ତ ଡିଜିଟାଲ ମିଡିଆ ସାଇଟ୍ର ଏକ ଅଭିଯୋଗ ସମାଧାନ ବ୍ୟବସ୍ଥା ରହିବ ଯେଉଁଥିରେ ଅନୁପାଳନ ଅଧିକାରୀମାନେ ଅଭିଯୋଗଗୁଡ଼ିକର ସମାଧାନ କରିବା ସହ ଅନୁଧ୍ୟାନ କରିବେ, ଆପତ୍ତିଜନକ ବିଷୟବସ୍ତୁ ହଟାଇବା ସହ ଅନୁପାଳନ ରିପୋର୍ଟ ଜାରି କରିବେ। ପୂର୍ବରୁ ଆଇନ ଡିଜିଟାଲ ନ୍ୟୁଜ୍ ମିଡିଆକୁ ପ୍ରେସ୍ କାଉନସିଲ୍ ନିୟମାବଳୀ ଅଧୀନକୁ ଆଣିଥିଲା। ନୂଆ ଓ୍ବେବ୍ସାଇଟଗୁଡ଼ିକ ସୂଚନା ଓ ପ୍ରସାରଣ ମନ୍ତ୍ରଣାଳୟ ସାଇଟ୍ରେ ପଞ୍ଜୀକରଣ ହେବା ଆବଶ୍ୟକ। ମିଥ୍ୟା ଖବରକୁ ରୋକିବା ପାଇଁ ସୋସିଆଲ ମିଡିଆ ଏବଂ ଷ୍ଟ୍ରିମିଂ କମ୍ପାନୀଗୁଡ଼ିକ ନିମନ୍ତେ ନିୟମାବଳୀକୁ କଡ଼ାକଡ଼ି କରାଯାଉଥିବା ସୂଚନା ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି।
ନୂଆ ଗାଇଡ୍ଲାଇନ ଅନୁଯାୟୀ ଅଭିଯୋଗ ଆସିବାର ୨୪ ଘଣ୍ଟା ମଧ୍ୟରେ ନଗ୍ନତା ସହ ସମ୍ପୃକ୍ତ ବିଷୟବସ୍ତୁ ଏବଂ ମହିଳାଙ୍କ ରୂପାନ୍ତରିତ ଚିତ୍ରକୁ ହଟାଇ ଦିଆଯିବ। ପ୍ଲାଟଫର୍ମଗୁଡ଼ିକ ନିଯୁକ୍ତ କରିଥିବା ଗ୍ରିଭାନ୍ସ ଅଫିସର ୨୪ ଘଣ୍ଟା ମଧ୍ୟରେ ଅଭିଯୋଗ ପଞ୍ଜୀକରଣ କରି ୧୫ ଦିନ ମଧ୍ୟରେ ଏହାର ସମାଧାନ କରିବେ ବୋଲି ଆଇଟି ମନ୍ତ୍ରୀ କହିଛନ୍ତି।
