ନିଶ୍ଚିନ୍ତକୋଇଲି/ମାହାଙ୍ଗା, ୧୭।୪(ସ୍ବ.ପ୍ର.): କଟକ ଜିଲା ମାହାଙ୍ଗା ଥାନା କୁସୁପୁର ଗ୍ରାମରେ ସମ୍ପତ୍ତି ବିବାଦରୁ ବଡ଼ଭାଇଙ୍କ ପରିବାରର ସମସ୍ତ ୫ ଜଣଙ୍କୁ ହତ୍ୟା କରିବା ଘଟଣାର ଅଭିଯୁକ୍ତ ତଥା ସାନ ଭାଇ ଶିବ ପ୍ରସାଦ ସାହୁଙ୍କ ୩ଦିନିଆ ରିମାଣ୍ଡ ଅବଧି ଶନିବାର ଶେଷ ହୋଇଛି। ରବିବାର ତାଙ୍କୁ କୋର୍ଟରେ ହାଜର କରାଯିବାସହ ଆବଶ୍ୟକ ପଡ଼ିଲେ ଆଉଥରେ ରିମାଣ୍ଡରେ ଆଣିବାକୁ ଆବେଦନ କରାଯାଇପାରେ ବୋଲି ପୋଲିସ କହିଛି। ତେବେ ରିମାଣ୍ଡର ତୃତୀୟ ତଥା ଅନ୍ତିମ ଦିନରେ ପୋଲିସ ସିନ୍ ରିକ୍ରିଏଶନ ପାଇଁ ମାହାଙ୍ଗା ଥାନାରୁ ବାଲିଚନ୍ଦ୍ରପୁର ହାଟକୁ ନେଇଥିଲା। ହତ୍ୟାକାଣ୍ଡରେ ଶିବ ଯେଉଁ କଟୁରି ବ୍ୟବହାର କରିଥିଲେ ତାକୁ ଘଟଣା ପୂର୍ବରୁ ପଜାଇ ଥିବା କମାର ଶାଳକୁ ନେଇ ସିନ୍ ରିକ୍ରିଏଶନ କରାଯାଇଥିଲା। କଟୁରି ପଜାଇବା ପରେ ତାକୁ କିଭଳି ସତର୍କତାର ସହ ଆଣି ଘରେ ରଖିଥିଲେ ସେନେଇ ଶିବ ପୋଲିସକୁ କହିଥିଲେ। ଶନିବାର ରିମାଣ୍ଡ ସରିବାକୁ ଥିବାରୁ ଘଟଣାରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ସମ୍ପର୍କରେ ପୋଲିସ ବାରମ୍ବାର ପ୍ରଶ୍ନ କରିଥିଲେ ସୁଦ୍ଧା ସେ ଏକମାତ୍ର ହତ୍ୟାକରୀ ବୋଲି ଶିବ କହିଥିବା ଜଣାପଡ଼ିଛି।
ଘଟଣା ସମ୍ପର୍କରେ ମାହାଙ୍ଗା ଥାନା ଅଧିକାରୀ ନୀହାର ମହାନ୍ତିଙ୍କୁ ପ୍ରଶ୍ନ କରିବାରୁ ସେ ତଦନ୍ତ ଚାଲିଛି ବୋଲି କହି କଥାକୁ ଏଡ଼ାଇ ଦେଇଛନ୍ତି। ଅପରପକ୍ଷରେ ଶିବଙ୍କ ସ୍ତ୍ରୀ ଓ ଶ୍ୱଶୁର ଘର ଲୋକଙ୍କ ଘଟଣାରେ ସମ୍ପୃକ୍ତି ଅଛିକି ନାହିଁ ସେନେଇ ପୁଙ୍ଖାନୁପୁଙ୍ଖ ତଦନ୍ତର ଆବଶ୍ୟକତା ରହିଛି ବୋଲି ସାଧାରଣରେ ଆଲୋଚନା ହେଉଛି। ସୂଚନା ଥାଉକି ସମ୍ପତ୍ତି ବିବାଦକୁ ନେଇ ଗତ ସୋମବାର ରାତିରେ କୁସୁପୁର ଗ୍ରାମର ଶିବ ପ୍ରସାଦ ସାହୁ ତାଙ୍କ ବଡ଼ ଭାଇ, ଭାଉଜ, ଝିଆରୀ ଓ ୨ ପୁତୁରାଙ୍କୁ କଟୁରିରେ ହାଣି ହତ୍ୟା କରିଥିଲେ। ପରେ ମଙ୍ଗଳବାର ଘଟଣା ସମ୍ପର୍କରେ ସାମାଜିକ ଗଣମାଧ୍ୟମରେ ଏକ ଭିଡିଓ ଜାରି କରିବା ସହ ବାଲିଚନ୍ଦ୍ରପୁର ଥାନାରେ ଆମତ୍ସମର୍ପଣ କରିଥିଲେ।
