ନୂଆଦିଲ୍ଲୀ, ୮।୧୧: ଲଣ୍ଡନର ଷ୍ଟୋକ୍ ପାର୍କକୁ ନେଇ କ୍ରୀଡା ଏବଂ ଆତିଥେୟତା କ୍ଷେତ୍ରରେ ରିଲାଏନ୍ସର ଅଧ୍ୟକ୍ଷ ମୁକେଶ ଅମ୍ବାନୀ ଏକ ନୂଆ ଯୋଜନା ରଖିଛନ୍ତି। ଏହି ପ୍ଲାନ ସମ୍ପର୍କରେ ଗଣମାଧ୍ୟମରେ ଏକ ରିପୋର୍ଟ ପ୍ରକାଶ ପାଇଛି। ଏହି ପ୍ରପର୍ଟିରେ ଅମ୍ବାନୀଙ୍କ ପରିବାର ରହିବେ ବୋଲି ପୂର୍ବରୁ ଗଣମାଧ୍ୟମରେ ଚର୍ଚ୍ଚା ହୋଇ ଆସୁଥିଲ। ଏହାକୁ ନେଇ ରିଲାଏନ୍ସ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। ଅମ୍ବାନୀଙ୍କ ପରିବାର ଭାରତ ଛାଡ଼ିବେ ନାହିଁ ବୋଲି ଗ୍ରୁପ ପକ୍ଷରୁ କୁହାଯାଇଥିଲା। ଲଣ୍ଡନରେ ଅବସ୍ଥିତ ୩୦୦ ଏକରର ନୂଆ ସମ୍ପତ୍ତିରେ ରିଲାଏନ୍ସ ଆଗାମୀ ଦିନରେ କ୍ରୀଡା ଏବଂ ହସ୍ପିଟାଲିଟି କ୍ଷେତ୍ରରେ ବିଭିନ୍ନ କାର୍ଯ୍ୟପନ୍ଥା ଗ୍ରହଣ କରିବ। ଏହି ପ୍ରପର୍ଟିରେ ହୋଟେଲ, ସ୍ପୋଟର୍ସ ଇନଫ୍ରାଷ୍ଟ୍ରକ୍ଚର, ୟୁରୋପର ସବୁଠାରୁ ଅଧିକ ରେଟିଂ ଲାଭ କରିଥିବା ଗଲ୍ଫ କୋର୍ସ ରହିଛି। ଏହି ପ୍ରପର୍ଟି ଦ୍ୱାରା ସ୍ପୋଟର୍ସ ଏବଂ ହସ୍ପିଟାଲିଟି କ୍ଷେତ୍ରକୁ କମ୍ପାନୀ ପ୍ରୋତ୍ସାହିତ କରିବାକୁ ଯୋଜନା ରଖିଛି।
ରିଲାଏନ୍ସ ପୂର୍ବରୁ ମୁମ୍ବାଇର ଓବରୟ ହୋଟେଲ ଗ୍ରୁପରେ ନିବେଶ କରିଛି। ବଜାର ବିଶେଷଜ୍ଞଙ୍କ କହିବା ମୁତାବକ, ଅମ୍ବାନୀ ଏଭଳି ବିଭିନ୍ନ କ୍ଷେତ୍ରଗୁଡ଼ିକରେ ଧ୍ୟାନ କେନ୍ଦ୍ରିତ କରିବେ। ମାତ୍ର କିଛି ବଛା ବଛା କ୍ଷେତ୍ର ଉପରେ ରିଲାଏନ୍ସ ଫୋକସ କରିବାକୁ ଚାହିଁବ। ସ୍ପୋଟର୍ସ ସହ ଗ୍ରୁପର ପୁରୁଣା ସମ୍ପର୍କ ରହି ଆସିଛି। ଭାରତରେ ଆଇପିଏଲ୍ ଦ୍ୱାରା ଏ କ୍ଷେତ୍ରରେ କମ୍ପାନୀ ଉପସ୍ଥିତ ରହିଛି। ଗୋଆରେ ମଧ୍ୟ ଫୁଟବଲ ଖେଳାଳିଙ୍କୁ କମ୍ପାନୀ ଉତ୍ସାହିତ କରୁଛି। ବ୍ରିଟେନରେ ଗଲ୍ପର ଲୋକପ୍ରିୟତା ରହିଥିବାରୁ ଉକ୍ତ ପ୍ରପର୍ଟିକୁ ଏଭଳି କ୍ଷେତ୍ରରେ ବ୍ୟବହାର କରିବାକୁ କମ୍ପାନୀ ଚାହୁଁଥିବା କୁହାଯାଉଛି। ପ୍ରପର୍ଟିରେ ଷ୍ଟୋକ୍ ପାର୍କ ହୋଟେଲ, ଗଲ୍ଫ କୋର୍ସ, ଟେନିସ କୋର୍ଟ ରହିଛି। ଏହି କ୍ରୀଡା ଏଠାରେ ଆୟୋଜନ କରିବା ସହଜ ହେବ। ଏଠାରେ ରହିବା ସହ ଅନ୍ୟ ସୁବିଧା ମଧ୍ୟ ଗ୍ରୁପ ପ୍ରଦାନ କରିପାରିବ। ସିନେମା ଶୁଟିଂ ଏବଂ ଆଓ୍ବାର୍ଡ କାର୍ଯ୍ୟକ୍ରମ ଏଠାରେ ମଧ୍ୟ ଆୟୋଜନ କରାଯାଇପାରେ। ବାଣିଜି୍ୟକ ଦୃଷ୍ଟିକୋଣରୁ ଏହି ପ୍ରପର୍ଟି ବ୍ୟବହାର କରାଯିବ ବୋଲି ଗ୍ରୁପ ପକ୍ଷରୁ ସ୍ପଷ୍ଟ କରାଯାଇଛି।
