ଢେଙ୍କାନାଳ,୨୨ା୯(ରତନ ନାୟାର):ଢେଙ୍କାନାଳ ଜିଲାର ବିଭିନ୍ନ ରାସ୍ତା ପାର୍ ହୋଇ ହାତୀ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ଯାଉଛନ୍ତି। ଏପରି କି ୫୫ନଂ. ଜାତୀୟ ରାଜପଥ ଉପରେ ମଧ୍ୟ ଅନେକ ସମୟରେ ହାତୀ ଠିଆ ହୋଇ ରହୁଥିବାରୁ ଗାଡ଼ି ଚଳାଚଳ ବାଧାପ୍ରାପ୍ତ ହେବା ସହ ଯାତ୍ରୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହେଉଛି। ଭାରିଯାନ ଧକ୍କାରେ ମଧ୍ୟ ହାତୀଙ୍କ ମୃତ୍ୟୁ ଘଟଣା ବାରମ୍ବାର ଦେଖିବାକୁ ମିଳୁଛି। ତେଣୁ ରାସ୍ତା ପାର ହେଉଥିବା ହାତୀଙ୍କ ସମ୍ପର୍କରେ କିପରି ଗାଡ଼ି ଚାଳକ, ଯାତ୍ରୀ ଓ ନିକଟସ୍ଥ ଅଞ୍ଚଳବାସୀ ସୂଚନା ପାଇପାରିବେ ଏବଂ ସତର୍କ ହୋଇପାରିବେ ସେ ନେଇ ଢେଙ୍କାନାଳ ଜିଲା ବନ ବିଭାଗ ପକ୍ଷରୁ ଗୁରୁବାର ରେଡ୍ଲାଇଟ୍ ସହିତ ସାଇରନ ବ୍ୟବସ୍ଥା କରାଯାଇଛି। ମୋବାଇଲ ଦ୍ୱାରା ପରିଚାଳିତ ଏହି ବ୍ୟବସ୍ଥା ରାଜ୍ୟରେ ପ୍ରଥମ କରି ତଥା ଢେଙ୍କାନାଳ ଜିଲାରେ ଆରମ୍ଭ ହୋଇଥିବା ସୂଚନା ମିଳିଛି।
ଢେଙ୍କାନାଳ ଜିଲାରେ ପ୍ରଥମ ପର୍ଯ୍ୟାୟରେ ବିଭିନ୍ନ ରେଞ୍ଜ୍ରେ ମୋଟ ୨୫ଟି ରେଡ୍ଲାଇଟ ଓ ସାଇରନ ବ୍ୟବସ୍ଥା କରାଯିବ। ସେଥିରୁ ପ୍ରାୟ ୨୨ଟି ରେଡ ଲାଇଟ୍ ଓ ସାଇରନ କେବଳ ହିନ୍ଦୋଳ ଓ ସଦର ରେଞ୍ଜ୍ରେ ଲାଗିବ। ସଦର ରେଞ୍ଜ୍ ଅଧୀନ ଢେଙ୍କାନାଳ-କପିଳାସ ରାସ୍ତାର ମେଘା ଜଙ୍ଗଲ କଡ଼ରେ ଏହି ରେଡ ଲାଇଟ୍ ଓ ସାଇରନ ବ୍ୟବସ୍ଥାର ଶୁଭାରମ୍ଭ କରାଯାଇଛି। ବିଦ୍ୟୁତ୍ ଖୁଣ୍ଟଭଳି ଏକ ଖୁଣ୍ଟରେ ଏହାକୁ ଲଗାଯାଇଛି। ଏହା ସୌରକିରଣ ମାଧ୍ୟମରେ କାର୍ଯ୍ୟ କରିବ। ଏହାସହିତ ଏକ ଷ୍ଟ୍ରିଟ୍ଲାଇଟ୍ ମଧ୍ୟ ଲଗାଯାଇଛି। ଏହାକୁ ୪ଟି ମୋବାଇଲ ଫୋନ ଦ୍ୱାରା ପରିଚାଳନା କରାଯିବ। ୪ଟି ମୋବାଇଲ ମଧ୍ୟରୁ ୩ଟି ମୋବାଇଲ ଫୋନ୍ ଓ ଏଥିରେ ଥିବା ନମ୍ବର ଫରେଷ୍ଟ ଗାର୍ଡ ଏବଂ ଫରେଷ୍ଟରମାନଙ୍କ ପାଖରେ ରହିଛି। ଅନ୍ୟଟି ଜିଲା ବନଖଣ୍ଡ କାର୍ଯ୍ୟାଳୟରେ ରହିଛି। ହାତୀଙ୍କ ଗତିବିଧି ସମ୍ପର୍କରେ ସୂଚନା ପାଇଲା ମାତ୍ରେ ସମ୍ପୃକ୍ତ ଅଞ୍ଚଳରେ ଥିବା ଫରେଷ୍ଟ ଗାର୍ଡ ଓ ଫରେଷ୍ଟରମାନେ ନିଜ ମୋବାଇଲ ନମ୍ବରରୁ ତାଙ୍କୁ ଦିଆଯାଇଥିବା ଏହି ନୂଆ ବ୍ୟବସ୍ଥାର ନମ୍ବରକୁ ଡାଏଲ କଲେ ଜୋର୍ରେ ସାଇରନ ବାଜିବା ସହିତ ରେଡ୍ ଲାଇଟ୍ ଜଳି ଉଠିବ। ଏହା ୩ ମିନିଟ ପର୍ଯ୍ୟନ୍ତ ବାଜିବ। ଏହି ସାଇରନ ୨ କିଲୋମିଟର ପର୍ଯ୍ୟନ୍ତ ଶୁଣାଯିବ ଓ ଲାଇଟ୍ ମଧ୍ୟ ବହୁ ଦୂର ପର୍ଯ୍ୟନ୍ତ ଦେଖାଯିବ। ଏଥିସହିତ ରେଡ୍ ଲାଇଟ୍ ସହ ସିଗନାଲ କାର୍ଯ୍ୟକ୍ଷମ ହେବା ମାତ୍ରେ ବନ କର୍ମଚାରୀମାନଙ୍କୁ ମେସେଜ୍ ଯିିବ। ଗୋଟିଏ ରେଡ୍ଲାଇଟ ଓ ସିଗନାଲ ବ୍ୟବସ୍ଥା ପାଇଁ ୫୦ରୁ ୬୦ ହଜାର ଟଙ୍କା ଖର୍ଚ୍ଚ ହୋଇଛି। ହାତୀଙ୍କୁ ନେଇ ସତର୍କ ରହିବା ପାଇଁ ଢେଙ୍କାନାଳ ଜିଲାରେ ମୋବାଇଲ ଦ୍ୱାରା ପରିଚାଳିତ ଏପରି ରେଡ୍ଲାଇଟ ଓ ସାଇରନ ବ୍ୟବସ୍ଥା ରାଜ୍ୟରେ ପ୍ରଥମ ବୋଲି ଜିଲା ବନଖଣ୍ଡ ଅଧିକାରୀ ସୁମିତ କୁମାର କର କହିଛନ୍ତି। ପ୍ରଥମ ପର୍ଯ୍ୟାୟ ପରେ ପରବର୍ତ୍ତୀ ସମୟରେ ଅନ୍ୟସ୍ଥାନଗୁଡ଼ିକରେ ଏହା ଲଗାଯିବା ଲକ୍ଷ୍ୟ ରଖାଯାଇଛି। ଢେଙ୍କାନାଳ ଜିଲାର ହିନ୍ଦୋଳ ରେଞ୍ଜ୍ରେ ପ୍ରାୟ ୨୫୦ରୁ ଉର୍ଦ୍ଧ୍ୱ ହାତୀ ରହୁଥିବା ବେଳେ ସଦର ରେଞ୍ଜ୍ରେ ୧୦୦ରୁ ଅଧିକ ରହିଛନ୍ତି। ଏହି ରେଡ୍ଲାଇଟ ଓ ସାଇରନ ବ୍ୟବସ୍ଥା ଯୋଗୁ ରାସ୍ତା ଆଖପାଖ ଅଞ୍ଚଳରେ ଥିବା ଗ୍ରାମଗୁଡିକୁ ମଧ୍ୟ ସତର୍କ ସୂଚନା ଦେଇହେବ ବୋଲି ଜିଲା ବନଖଣ୍ଡ ଅଧିକାରୀ କହିଛନ୍ତି।
