କଟକ ଅଫିସ, ୧୦ା୮: ଭାରତ ସରକାରଙ୍କ ଅଗ୍ନିପଥ ଯୋଜନାରେ ସୈନ୍ୟ ବାହିନୀରେ ନିଯୁକ୍ତି ରାଲି ପାରାଦୀପସ୍ଥିତ ଗୋପବନ୍ଧୁ ଷ୍ଟାଡିୟମରେ ଆସନ୍ତା ଅକ୍ଟୋବର ୭ରୁ ୧୪ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ। ଏଣୁ ପ୍ରାର୍ଥୀମାନେ ଅଗଷ୍ଟ ୧ରୁ ୩୦ ତାରିଖ ମଧ୍ୟରେ ଆବେଦନ କରିପାରିବେ। ଅନ୍ଲାଇନରେ ଫର୍ମପୂରଣ ନିମନ୍ତେ ପ୍ରାର୍ଥୀମାନେ ପୂର୍ବାହ୍ନ ୧୦ଟାରୁ ଅପରାହ୍ନ ୧ଟା ପର୍ଯ୍ୟନ୍ତ କଟକ ସୈନ୍ୟ ବାହିନୀ ନିଯୁକ୍ତି କାର୍ଯ୍ୟାଳୟର ସହାୟତା ନେଇପାରିବେ ବୋଲି ସୈନ୍ୟବାହିନୀ ନିଯୁକ୍ତି ଅଧିକାରୀ କହିଛନ୍ତି। ଏହି ରାଲିରେ ଅଗ୍ନିବୀର ସାଧାରଣ ସେବା, ଅଗ୍ନିବୀର ବୈଷୟିକ ସେବା, ଅଗ୍ନିବୀର ବ୍ୟବସାୟିକ ସେବା, ଅଗ୍ନିବୀର କିରାଣୀ/ଭଣ୍ଡାର ରକ୍ଷକ ବୈଷୟିକ ସେବା ଆଦି ପଦବୀ ପାଇଁ ନିଯୁକ୍ତି ଦିଆଯିବ। ସମସ୍ତ ପଦବୀ ନିମନ୍ତେ ପ୍ରାର୍ଥୀଙ୍କ ବୟସ ୧୭ ବର୍ଷ ୬ ମାସରୁ ୨୩ ବର୍ଷ ମଧ୍ୟରେ ହୋଇଥିବା ଦରକାର। ଅଗ୍ନିବୀର ପଦବୀ ନିଯୁକ୍ତି ପ୍ରକ୍ରିୟାରେ ପୂର୍ବତନ ସାମରିକ କର୍ମଚାରୀଙ୍କ ସନ୍ତାନଙ୍କୁ ଉଚ୍ଚତା, ଛାତି ଏବଂ ଓଜନ ଆଦି ଶାରୀରିକ ପରୀକ୍ଷାରେ ସରକାରଙ୍କ ନୀତି ଅନୁଯାୟୀ କୋହଳ ପ୍ରଦାନ କରାଯିବ। ଶାରୀରିକ ପରୀକ୍ଷାରେ ଉତ୍ତୀର୍ଣ୍ଣ ହେଲା ପରେ ପ୍ରାର୍ଥୀମାନଙ୍କର ସ୍ବାସ୍ଥ୍ୟ ପରୀକ୍ଷା ହେବ। ଏହାପରେ ସାଧାରଣ ଲିଖିତ ପରୀକ୍ଷା କରାଯିବ। ପ୍ରାର୍ଥୀମାନଙ୍କର ସମର ଶିକ୍ଷାର୍ଥୀ ବାହିନୀ (ଏନ୍ସିସି) ଏ, ବି, ସି ସାର୍ଟିଫିକେଟ ଥିଲେ ସେମାନଙ୍କୁ ଲିଖିତ ପରୀକ୍ଷାରେ ଅଗ୍ରାଧିକାର ଦିଆଯିବ। ଏ ସମ୍ପର୍କିତ ସମସ୍ତ ବିବରଣୀ ୱେବ୍ସାଇଟ୍ www.joinindianarmy.nic.inରେ ଉପଲବ୍ଧ ରହିଛି। ଏଥିସହ ବିସ୍ତୃତ ବିବରଣୀ ନିମନ୍ତେ ପ୍ରାର୍ଥୀମାନେ ସୈନ୍ୟ ବାହିନୀ ନିଯୁକ୍ତି କାର୍ଯ୍ୟାଳୟ କଟକ ଫୋନ ନମ୍ବର ୦୬୭୧-୨୩୦୫୨୮୦/୯୪୩୭୧୬୨୨୮୦ ରେ ଯୋଗାଯୋଗ କରିବାକୁ କଟକ ଜିଲା ପ୍ରଶାସନ ପକ୍ଷରୁ ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ଲଲାଟେନ୍ଦୁ ମହାପାତ୍ର ବୁଧବାର ପ୍ରେସ୍ ଇସ୍ତାହାରରେ ଜଣାଇଛନ୍ତି।
