କାର୍ମିକ ଓ ପ୍ରଶିକ୍ଷଣ ବିଭାଗ (ଡିଓପିଟି) ଆଇଏଏସ୍ ଅଧିକାରୀଙ୍କ ବାର୍ଷିକ ନିଯୁକ୍ତିକୁ ୧୮୦ ରୁ ୨୧୦ କୁ ବୃଦ୍ଧି କରିବାକୁ ବିଚାର କରୁଥିବା ଜଣାଯାଇଛି। ଏହି ସମ୍ଭାବ୍ୟ ନୀତି ପରିବର୍ତ୍ତନ ଏକ ବିଭାଗୀୟ କମିଟି ଏବଂ ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ପବ୍ଲିକ ଆଡ୍ମିନିଷ୍ଟ୍ରେଶନ (ଆଇଆଇପିଏ)ଙ୍କ ରିପୋର୍ଟ ଉପରେ ଆଧାରିତ। ଯଦି ଏହି ଯୋଜନା କାର୍ଯ୍ୟକାରୀ ହୁଏ, ତେବେ ଏହା ମୋଦି ସରକାରଙ୍କ ପ୍ରଥମ ପାଳିର ସମ୍ପୂର୍ଣ୍ଣ ବିପରୀତ ବୋଲି କୁହାଯିବ, ଯେଉଁ ସମୟରେ ସିଭିଲ ସର୍ଭିସ ଏବଂ ଅଲ୍ ଇଣ୍ଡିଆ ସର୍ଭିସେସ (ଏଆଇଏସ୍) ନିଯୁକ୍ତିରେ ପ୍ରାୟ ୪୦ ପ୍ରତିଶତ ହ୍ରାସ ହୋଇଥିଲା। ବିଭିନ୍ନ ସରକାରୀ ସ୍ତରରେ ବ୍ୟାପକ ପଦବୀ ଖାଲି ଥିବାରୁ ଅଧିକ ବାବୁଙ୍କ ଆବଶ୍ୟକତା ଉପରେ ଅନେକେ ଆଲୋକପାତ କରନ୍ତି। ୨୦୧୪ ପରଠାରୁ ପ୍ରାୟ ୧୦୦ଟି ନୂତନ ଜିଲା ହୋଇଥିବାରୁ ଖାଲି ପଦବୀ ସଂଖ୍ୟା ବଢ଼ିଛି। ବର୍ତ୍ତମାନ ଦେଶରେ ୧୩୦୦ରୁ ଅଧିକ ଆଇଏଏସ୍ ପଦବୀ ଖାଲି ଅଛି। ଏହି ପରିସ୍ଥିତିରେ ସରକାର ଆଇଏଏସ୍ ଅଧିକାରୀଙ୍କ ବାର୍ଷିକ ନିଯୁକ୍ତି ଉପରେ ଧାର୍ଯ୍ୟ ସୀମାକୁ ପୁନଃ ମୂଲ୍ୟାୟନ କରିପାରନ୍ତି। ଏହାପୂର୍ବରୁ ଧାରଣା ରହି ଆସିଥିଲା ଯେ, ଆଇଏଏସ୍ ନିଯୁକ୍ତି ୧୮୦ରୁ ବଢ଼ାଇଲେ ବାବୁମାନଙ୍କ କ୍ୱାଲିଟି ଏବଂ କ୍ୟାରିୟର ପ୍ରଗତି କ୍ଷତିଗ୍ରସ୍ତ ହୋଇପାରେ। କିନ୍ତୁ ସେଭଳି ଚିନ୍ତାଧାରା ବୋଧହୁଏ ଏବେ ବଦଳି ଯାଇଛି । ସୂତ୍ରରୁ ପ୍ରକାଶ ଯେ,ସରକାର ଖାଲିଥିବା ପଦବୀ ତୁରନ୍ତ ପୂରଣ କରିବାକୁ ଲାଟେରାଲ ଏଣ୍ଟ୍ରିରେ ୫୧ଟି ଉପ ସଚିବ, ନିର୍ଦ୍ଦେଶକ ଏବଂ ଯୁଗ୍ମ ସଚିବ ପଦବୀ ପୂରଣ କରିବା ପାଇଁ ଯୋଜନା କରୁଛନ୍ତି। ଆଇଏଏସ୍ ଅଧିକାରୀଙ୍କ ନିଯୁକ୍ତି ବୃଦ୍ଧି ପାଇଁ ପଦକ୍ଷେପ ଗତ କିଛି ବର୍ଷ ମଧ୍ୟରେ ଆଇପିଏସ୍ ଅଧିକାରୀ ଏବଂ ଭାରତୀୟ ବନ ସେବା ଅଧିକାରୀଙ୍କ ସଂଖ୍ୟା ବୃଦ୍ଧି ଭଳି ହେବାକୁ ଯାଉଛି। ଆଗକୁ କ’ଣ ଘଟୁଛି ତାହା ଦେଖିବାକୁ ବାକି ରହିଲା।
ସେବିର କଟକଣା
କର୍ପୋରେଟ ଶାସନକୁ କାର୍ଯ୍ୟକାରୀ କରିବା ପାଇଁ ଏକ ସାହସିକ ପଦକ୍ଷେପ ନେଇଛି ସିକ୍ୟୁରିଟିଜ୍ ଆଣ୍ଡ୍ ଏକ୍ସଚେଞ୍ଜ ବୋର୍ଡ ଅଫ୍ ଇଣ୍ଡିଆ(ସେବି)। ଏହା ପିଟିସି ଇଣ୍ଡିଆ ଏବଂ ଏହାର ସହାୟକ କମ୍ପାନୀ ପିଟିସି ଇଣ୍ଡିଆ ଫାଇନାନ୍ସିଆଲ ସର୍ଭିସେସ (ପିଏଫ୍ଏସ୍)ର ଦୁଇଜଣ ବରିଷ୍ଠ କାର୍ଯ୍ୟନିର୍ବାହୀଙ୍କୁ କଡ଼ା ସମାଲୋଚନା କରିଛି। ପିଟିସି ଇଣ୍ଡିଆର ସିଏମ୍ଡି ତଥା ପିଏଫ୍ଏସ୍ର ନିର୍ଦ୍ଦେଶକ ରାଜୀବ କୁମାର ମିଶ୍ରଙ୍କୁ ୧୦ ଲକ୍ଷ ଟଙ୍କା ଜରିମାନା ହୋଇଥିବାବେଳେ ପିଏଫ୍ଏସର ପୂର୍ବତନ ଏମ୍ଡି ତଥା ସିଇଓ ପୱନ ସିଂଙ୍କୁ ୨୫ ଲକ୍ଷ ଟଙ୍କା ଜରିମାନା ଭୋଗିବାକୁ ପଡିଛି । ସେବି ଏତିକିରେ ଅଟକି ନାହିଁ। ଉଭୟ ମିଶ୍ର ଏବଂ ସିଂଙ୍କୁ କୌଣସି ତାଲିକାଭୁକ୍ତ କମ୍ପାନୀରେ କୌଣସି ବୋର୍ଡ କିମ୍ବା ମୁଖ୍ୟ ପରିଚାଳକ ପଦବୀ ରହିବା ଉପରେ କଟକଣା କରାଯାଇଛି। ଜନସାଧାରଣଙ୍କଠାରୁ ଟଙ୍କା ସଂଗ୍ରହ କରିବାକୁ ଚାହୁଁଥିବା କୌଣସି ତାଲିକାଭୁକ୍ତ ସଂସ୍ଥା ସହିତ ସେମାନଙ୍କୁ ଯୋଗାଯୋଗ ରକ୍ଷା କରିବାକୁ ବାରଣ କରାଯାଇଛି। ଜୁନ୍ ୨୦୨୩ରେ ରିଜର୍ଭ ବ୍ୟାଙ୍କ୍ ଅଫ୍ ଇଣ୍ଡିଆ (ଆର୍ବିଆଇ)ର ନିର୍ଦ୍ଦେଶନାମା ଅନୁଯାୟୀ ଅବସର ନ ନେବା ପର୍ଯ୍ୟନ୍ତ ସିଂଙ୍କୁ ଛୁଟିରେ ଯିବାକୁ ବାଧ୍ୟ କରିଥିଲା। ପିଏଫ୍ଏସ୍ର ଅଣ-କାର୍ଯ୍ୟନିର୍ବାହୀ ଚେୟାରମ୍ୟାନ ତଥା ପିଟିସି ଇଣ୍ଡିଆର ସିଏମ୍ଡି ଭାବରେ କାର୍ଯ୍ୟରତ ମିଶ୍ରଙ୍କୁ ବର୍ତ୍ତମାନ ଏହି ପଦବୀରୁ ଇସ୍ତଫା ଦେବାକୁ ପଡ଼ିବ। କର୍ପୋରେଟ ନେତାମାନେ ନିୟମ ଅନୁଯାୟୀ କାମ କରିବା ଦରକାର ବୋଲି ସେବିର ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ। ଏହି ଦୁଇ ବରିଷ୍ଠ ଅଧିକାରୀଙ୍କୁ ଉତ୍ତରଦାୟୀ କରି ସେବି କହିଛି ଯେ, ଶାସନରେ ବିଫଳତାକୁ ସହ୍ୟ କରାଯିବ ନାହିଁ। କର୍ପୋରେଟ ଇଣ୍ଡିଆରେ ସ୍ବଚ୍ଛତା ଏବଂ ଅଖଣ୍ଡତା ନିଶ୍ଚିତ କରିବା, ସମସ୍ତଙ୍କ ପାଇଁ ଏକ ସୁସ୍ଥ ବ୍ୟବସାୟିକ ପରିବେଶ ସୃଷ୍ଟି କରିବା ପାଇଁ ଏହା ଏକ ଆବଶ୍ୟକ ପଦକ୍ଷେପ।
ସୋସିଆଲ ମିଡିଆରେ ବାବୁ
ସୋସିଆଲ ମିଡିଆରେ କେତେଜଣ ବାବୁ ସେମାନଙ୍କ ପଦୋନ୍ନତି ଏବଂ ଏମ୍ପ୍ୟାନେଲମେଣ୍ଟ ବିଷୟ କିପରି ଘୋଷଣା କରୁଛନ୍ତି ସେ ବିଷୟରେ କେବଳ ତୁମର ସ୍ତମ୍ଭକାର ନା ଅନ୍ୟ କେହି ଧ୍ୟାନ ଦେଉଛନ୍ତି? ସଫଳତାକୁ ପାଳନ କରିବା ଅତ୍ୟନ୍ତ ଭଲ ହୋଇଥିବାବେଳେ ଏଭଳି ଘଟଣା ସମ୍ପୂର୍ଣ୍ଣ ଆଶ୍ଚର୍ଯ୍ୟକର। ପାରମ୍ପରିକ ଭାବରେ ଆଇଏଏସ୍ ଏବଂ ଅନ୍ୟାନ୍ୟ ନାଗରିକ ସେବାରେ ପଦୋନ୍ନତି ଏବଂ ବଦଳିଗୁଡ଼ିକୁ କମ୍ ଗୁରୁତ୍ୱପୂର୍ଣ୍ଣ ଦିଆଯାଉଥିଲା, କାରଣ ଏହା ପ୍ରାୟତଃ ନିୟମିତ ଭାବେ କରାଯାଏ। ଆପଣ ସେମାନଙ୍କ ବିଷୟରେ ଖବରକାଗଜରେ କିମ୍ବା ସରକାରୀ ସୂତ୍ରରୁ ଶୁଣିଥିଲେ। କିନ୍ତୁ ବର୍ତ୍ତମାନ ଜଣେ ଅଧିକାରୀ ପ୍ରତିଦିନ ଟୁଇଟର କିମ୍ବା ଲିଙ୍କ୍ଡଇନ୍ରେ କୌଣସି ଗୁରୁତ୍ୱପୂର୍ଣ୍ଣ ଘଟଣା କିମ୍ବା ସ୍ବତନ୍ତ୍ର ମୁହୂର୍ତ୍ତକୁ ପୋଷ୍ଟ କରୁଥିବା ଜଣାପଡ଼ୁଛି। ଏହି ଘୋଷଣାଗୁଡ଼ିକ ଉପରେ କିପରି ଅନୁଗାମୀ ଏବଂ ଶୁଭେଚ୍ଛୁମାନଙ୍କ ଅଭିନନ୍ଦନ ମିଳେ ତାହା ପ୍ରକୃତରେ କୌତୂହଳପୂର୍ଣ୍ଣ (କିମ୍ବା ଅଦ୍ଭୁତ)କଥା।
ବୋଧହୁଏ ଏହା କେବଳ ସମୟର ଏକ ସଙ୍କେତ। ପ୍ରତ୍ୟେକ ଛୋଟ ଜୀବନ ସମ୍ବନ୍ଧିତ ସୂଚନା ଶେୟାର ପାଇଁ ସୋସିଆଲ ମିଡିଆ ଏକ ପ୍ଲାଟଫର୍ମ ପାଲଟିଛି, ତେବେ ଗୁରୁତ୍ୱପୂର୍ଣ୍ଣ ବୃତ୍ତିଗତ ଘଟଣା କାହିଁକି ନୁହେଁ? ବୃତ୍ତିଗତ ଘଟଣା ଶେୟାର କରିବା ନିଶ୍ଚିତ ଭାବରେ ଅତୀତ ତୁଳନାରେ ଏକ ପରିବର୍ତ୍ତନ। ସମ୍ଭବତଃ ଏହା ସ୍ବଚ୍ଛତା ଓ ଜନସାଧାରଣଙ୍କ ସହ ଯୋଗାଯୋଗ ପାଇଁ ମଧ୍ୟ ଭଲ । ତଥାପି ସୋସିଆଲ ମିଡିଆରେ ବାବୁମାନେ ଜଡ଼ିତ ହେବା ପ୍ରକ୍ରିୟାକୁ ଦେଖିଲେ ଟିକେ ଅଜବ ଲାଗେ।
Email: dilipcherian@gmail.com
