ବେଜିଂ,୨୨।୭ : ଚାଇନାର ରାଷ୍ଟ୍ରପତି ଶି ଜିନପିଙ୍ଗ ପ୍ରଥମ ଥର ପାଇଁ ମଧ୍ୟବିତ୍ତ ଲୋକଙ୍କ ବିଦ୍ରୋହର ସମ୍ମୁଖୀନ ହୋଇଛନ୍ତି। ଚାଇନାର ୩୧ଟି ପ୍ରଦେଶ ମଧ୍ୟରୁ ୨୪ ଟିରେ, ୨୩୫ଟି ସମ୍ପତ୍ତି ପ୍ରକଳ୍ପରେ ୧.୩ କୋଟି ଲୋକ ଗୃହଋଣ କିସ୍ତି ପୈଠ କରୁ ନାହାଁନ୍ତି। ସେମାନେ ଅଭିଯୋଗ କରିଛନ୍ତି ଯେ ବିଲଡରମାନେ ଠିକ ସମୟରେ ସମ୍ପତ୍ତି ହସ୍ତାନ୍ତର କରୁନାହାଁନ୍ତି। କରୋନା ଅବଧିରେ, ଚାଇନାରେ ଶୂନ କୋଭିଡ ନୀତି ଅନୁଯାୟୀ କଡା ଲକଡାଉନ ଯୋଗୁଁ ସମ୍ପତ୍ତି କ୍ଷେତ୍ରରେ ବହୁ କ୍ଷତି ଘଟିଥିଲା। ଏଭଳି ପରିସ୍ଥିତିରେ ପ୍ରକଳ୍ପଗୁଡ଼ିକ ଠିକ ସମୟରେ ଶେଷ ହେଉ ନଥିବାରୁ ସମସ୍ୟା ଉପୁଜୁଛି।
ରିସର୍ଚ୍ଚ ସଂଗଠନ କ୍ୟାପିଟାଲ ଇକୋନୋମିକ୍ସର ଜୁଲିୟାନ ଇଭାନ୍ସ କହିଛନ୍ତି ଯେ ସମ୍ପତ୍ତି କ୍ଷେତ୍ରର ମନ୍ଥରତା ଚାଇନାର ଅନ୍ୟ କ୍ଷେତ୍ର ଉପରେ ମଧ୍ୟ ପ୍ରଭାବ ପକାଇବାର ଆଶଙ୍କା ରହିଛି॥ ନଭେମ୍ବରରେ, କମ୍ୟୁନିଷ୍ଟ ପାର୍ଟିର ସମ୍ମିଳନୀରେ ଜିନପିଙ୍ଗ ତୃତୀୟ ଥର ପାଇଁ ରାଷ୍ଟ୍ରପତି ପ୍ରାର୍ଥୀ ହେବେ। ମଧ୍ୟବିତ୍ତ ଶ୍ରେଣୀର ଏହି ବିଦ୍ରୋହ ତାଙ୍କ ପାଇଁ ଏକ ବଡ଼ ଆହ୍ବାନ ବୋଲି କୁହାଯାଉଛି। ଚାଇନାର କମ୍ୟୁନିଷ୍ଟ ପାର୍ଟିର ପ୍ରାୟ ୧୦ କୋଟି ସଦସ୍ୟ ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ଭୋଟ ଦେବେ।
ଗ୍ଲୋବାଲ ଟାଇମ୍ସ ରିପୋର୍ଟ ଅନୁଯାୟୀ ଚାଇନାରେ ପ୍ରାୟ ୭୦ ପ୍ରତିଶତ ଲୋକ ସମ୍ପତ୍ତିରେ ବିନିଯୋଗ କରିଛନ୍ତି, ଯାହା ଆମେରିକା ତୁଳନାରେ ବହୁତ ଅଧିକ। ଆମେରିକାର ପ୍ରାୟ ୪୦ରୁ ୫୦ ପ୍ରତିଶତ ଲୋକ ସମ୍ପତ୍ତିରେ ବିନିଯୋଗ କରିଥାନ୍ତି।
ଚାଇନାର ୪୦୦୦ ବ୍ୟାଙ୍କ ଏବେ ବନ୍ଦ ହେବାର ସ୍ଥିତିରେ ପହଞ୍ଚିଛନ୍ତି। ୪ ଲକ୍ଷରୁ ଅଧିକ ଆକାଉଣ୍ଟଧାରୀଙ୍କ ହଜାର ହଜାର କୋଟି ଟଙ୍କା ଏଥିରେ ଫସି ରହିଛି। ସେମାନଙ୍କ ଟଙ୍କା ପାଇଁ ଅନେକ ପ୍ରଦେଶର ଲୋକମାନେ ବ୍ୟାଙ୍କ ସମ୍ମୁଖରେ ପ୍ରଦର୍ଶନ ଜାରି ରଖିଛନ୍ତି। ତେଣୁ ଏହି ବିରୋଧକୁ ନେଇ ଜିନପିଙ୍ଗ୍ଙ୍କ ଚିନ୍ତା ବଢ଼ିବାରେ ଲାଗିଛି। ଚଳିତ ବର୍ଷ ପ୍ରଥମ ଛଅ ମାସରେ ଦେଶରେ ୩୧ ଲକ୍ଷ ଶିଳ୍ପ ଏବଂ ବ୍ୟବସାୟ ବନ୍ଦ ହୋଇଯାଇଛି। ଏହାଯୋଗୁ ଆର୍ଥିକ ସଙ୍କଟ ସୃଷ୍ଟି ହୋଇଛି। କୋଭିନ୍ ଶୂନ ନୀତି ଯୋଗୁ ଚାଇନା ପୃଥିବାଠାରୁ ବିଚ୍ଚିନ୍ନ ହେବା ଯୋଗୁ ସମସ୍ତ କାରବାର କ୍ଷତିଗ୍ରସ୍ତ ହୋଇଥିବା ଅର୍ଥଶାସ୍ତ୍ରୀମାନେ ମତପୋଷଣ କରିଛନ୍ତି।
