ଅହମଦାବାଦ, ୨୨।୫: ଦାୟିତ୍ୱହୀନ ବ୍ୟାଟିଂ ଯୋଗୁ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ଇଣ୍ଡିଆନ ପ୍ରିମିୟର ଲିଗ୍ରୁ ପୁଣିଥରେ ଏଲିମିନେଟ୍ ହୋଇଛି। ଲିଗ୍ ପର୍ଯ୍ୟାୟରେ କ୍ରମାଗତ ୬ ମ୍ୟାଚ ଜିତି ପ୍ଲେଅଫ୍ରେ ପ୍ରବେଶ କରିଥିବା ଏହି ଦଳ ବୁଧବାର ଅନୁଷ୍ଠିତ ଏଲିମିନେଟ ମ୍ୟାଚରେ ରାଜସ୍ଥାନ ରୟାଲ୍ସଠାରୁ ୪ ଉଇକେଟରେ ହାରି ଯାଇଛି। ଆରସିବି ୨୦ ଓଭରରେ ୮ ଉଇକେଟ ହରାଇ ୧୭୨ ରନ କରିଥିଲା।
ରାଜସ୍ଥାନ ୧୯ ଓଭରରେ ୬ ଉଇକେଟ ହରାଇ ୧୭୪ ରନ ସଂଗ୍ରହ କରି ନେଇଥିଲା। ଟପ୍ ଅର୍ଡରରେ ଯଶସ୍ବୀ ଜୟସ୍ବାଲ ୪୫ ରନର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିବାବେଳେ ମଧ୍ୟଭାଗରେ ରିୟାନ ପରାଗଙ୍କ ୨୬ ବଲ୍ରୁ ୩୬, ଇମ୍ପାକ୍ଟ ସବ୍ଷ୍ଟିଚ୍ୟୁଟ ଶିମରନ ହେଟମେରଙ୍କ ୧୪ ବଲ୍ରୁ ୨୬ ଓ ଶେଷରେ ରୋଭମାନ ପାଓ୍ବେଲଙ୍କ ୮ ବଲ୍ରୁ ଅପରାଜିତ ୧୬ ରନ ବଳରେ ଦଳ ଗୋଟିଏ ଓଭର ପୂର୍ବରୁ ବିଜୟ ଲକ୍ଷ୍ୟରେ ପହଞ୍ଚି ଯାଇଥିଲା।
ଏହାକୁ ମିଶାଇ ଆରସିବି ୫ମ ଥର ଆଇପିଏଲ୍ରେ ଏଲିମିନେଟର ମ୍ୟାଚ ହାରିଛି। ଏହା ପୂର୍ବରୁ ଦଳ ୮ ଥର ପ୍ଲେ-ଅଫ୍ରେ ପ୍ରବେଶ କରିଥିଲେ ହେଁ ୪ ଥର ଏଲିମିନେଟରରେ ପରାଜିତ ହୋଇଥିଲା। ଏଠାରେ ବିଜୟ ଦ୍ୱାରା ରାଜସ୍ଥାନ କ୍ୱାଲିଫାୟର-୨ ଖେଳିବାକୁ ଯୋଗ୍ୟ ବିବେଚିତ ହୋଇଛି। ରାଜସ୍ଥାନ ଓ ସନ୍ରାଇଜର୍ସ ହାଇଦ୍ରାବାଦ ମଧ୍ୟରେ କ୍ୱାଲିଫାୟର୍ସ-୨ ଶୁକ୍ରବାର ଅନୁଷ୍ଠିତ ହେବ। ଏହାର ବିଜେତା ରବିବାର ହେବାକୁଥିବା ଫାଇନାଲରେ କୋଲକାତା ନାଇଟ ରାଇଡର୍ସକୁ ଭେଟିବ।
