ନାଗପୁର,୮।୨: ଟେଷ୍ଟ କ୍ରିକେଟରେ ବଡ଼ ଉପଲବ୍ଧି ହାସଲ କରିବାରୁ ଗୋଟିଏ ପାଦ ଦୂରରେ ଅଛନ୍ତି ଭାରତୀୟ କ୍ରିକେଟ ଟିମ୍ର ଷ୍ଟାର ବୋଲର ରବିଚନ୍ଦ୍ରନ ଅଶ୍ୱିନ। ୨୦୧୧ରେ ଟେଷ୍ଟ ଡେବ୍ୟୁ କରିଥିବା ଅଶ୍ୱିନ ନିଜର ୧୨ ବର୍ଷର କ୍ୟାରିୟରରେ ଅନେକ ରେକର୍ଡ ନିଜ ନାମରେ କରିଛନ୍ତି । ଏଯାବତ ସେ ୮୮ ଟେଷ୍ଟ ମ୍ୟାଚ୍ର ୧୬୬ ଇନିଂସରେ ବୋଲିଂ କରି ୪୪୯ ଉଇକେଟ ନିଜ ନାମରେ କରିଛନ୍ତି। ସେ ୪୫୦ ଉଇକେଟ ନେବାର ଉପଲବ୍ଧି ହାସଲ କରିବା ଠାରୁ ଗୋଟିଏ ଉଇକେଟ ଦୂରରେ ଅଛନ୍ତି। ନାଗପୁର ଟେଷ୍ଟରେ ଯଦି ସେ ଅତି କମ୍ରେ ଗୋଟିଏ ଉଇକେଟ ନିଅନ୍ତି ତେବେ ସେ ୪୫୦ ଅଥବା ତା’ଠାରୁ ଅଧିକ ଟେଷ୍ଟ ଉଇକେଟ ନେଇଥିବା ବିଶ୍ୱର ନବମ ଏବଂ ଅନିଲ କୁମ୍ବଲେଙ୍କ ପରେ ଦ୍ୱିତୀୟ ଭାରତୀୟ ବୋଲର ପାଲଟିବେ।
ସେହିଭଳି ଅଶ୍ୱିନ ନାଗପୁର ଟେଷ୍ଟରେ ଗୋଟିଏ ଉଇକେଟ ନେବା ପରେ ସବୁଠାରୁ ଦ୍ରୁତ ୪୫୦ ଉଇକେଟ ନେବାରେ କୁମ୍ବଲେଙ୍କୁ ପଛରେ ପକାଇବେ। ସେହିଭଳି ମୁଥିଆ ମୁରଲୀଧରନଙ୍କ ପରେ ଦ୍ୱିତୀୟ ସ୍ଥାନରେ ପହଞ୍ଚିବେ। ମୁରଲୀଧରନ ନିଜର ୮୦ତମ ଟେଷ୍ଟରେ ଏବଂ କୁମ୍ବଲେ ୯୩ ତମ ଟେଷ୍ଟରେ ସମାନ ସଂଖ୍ୟକ ଉଇକେଟ ନେଇଥିଲେ। ଏଣୁ ଏହି ଉପଲବ୍ଧି ହାସଲ କରିଥିବା ଦ୍ରୁତତମ ଭାରତୀୟ ହେବାର ରେକର୍ଡ ମଧ୍ୟ ତାଙ୍କ ନାମରେ ହେବ।
ଏହାଛଡ଼ା ଅଷ୍ଟ୍ରେଲିଆ ଟିମ୍ ବିପକ୍ଷରେ ଅଶ୍ୱିନଙ୍କ ରେକର୍ଡ ବହୁତ ଭଲ। ସେ ଏଯାବତ ଅଷ୍ଟ୍ରେଲିଆ ବିପକ୍ଷରେ ୧୮ଟେଷ୍ଟ ମ୍ୟାଚ୍ର ୩୪ ଇନିଂସlରେ ୮୯ ଉଇକେଟ ନିଜ ନାମରେ କରିଛନ୍ତି। ଏଣୁ ଖେଳାଯିବାକୁ ଥିବା ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ସେ ଉଇକେଟର ଶତକ ପୂରଣ କରିପାରନ୍ତି। ଏଥିରୁ ମାତ୍ର ୧୧ ଉଇକେଟ ଦୂରରେ ଅଛନ୍ତି ଅଶ୍ୱିନ।
