ମୁମ୍ବାଇ,୧୧।୪: ଆଇପିଏଲ ଇତିହାସରେ ରବିଚନ୍ଦ୍ରନ ଅଶ୍ୱିନ ପ୍ରଥମ ଖେଳାଳି ଭାବେ ରିଟାୟର୍ଡ ଆଉଟ୍ ହୋଇଛନ୍ତି। ଆଇପିଏଲ ୨୦୨୨ର ବିଂଶତମ ଲିଗ ମ୍ୟାଚରେ ଲକ୍ଷ୍ନୌ ସୁପର ଜିଆଣ୍ଟସ ବିପକ୍ଷରେ ବ୍ୟାଟିଂ କରୁଥିବାବେଳେ ରାଜସ୍ଥାନ ରୟାଲ୍ସ ପାଇଁ ବ୍ୟାଟିଂ କରୁଥିବା ଅଶ୍ୱିନ ହଠାତ୍ କ୍ରିଜ୍ ଛାଡି ପାଭିଲିୟନକୁ ଫେରି ଆସିଥିଲେ। ଏହି ମ୍ୟାଚ୍ରେ ରାଜସ୍ଥାନ ତାଙ୍କୁ ଇନିଂସର ଦଶମ ଓଭରରେ ଷଷ୍ଠ ନମ୍ବରରେ ବ୍ୟାଟିଂ କରିବାକୁ ପଠାଇଥିଲା। ତେବେ ଏହାପୂର୍ବରୁ ରିୟାନ ପରାଗ ଏହି ନମ୍ବରରେ ବ୍ୟାଟିଂ କରୁଥିଲେ।
ରାଜସ୍ଥାନ ରୟାଲ୍ସ ଇନିଂସର ୧୯ତମ ଓଭରରେ ଦୁଇଟି ବଲ ବୋଲିଂ ହେବା ପରେ ଆର ଅଶ୍ୱିନ ରିଟାୟର୍ଡ ଆଉଟ୍ ହେବାକୁ ନିଷ୍ପତ୍ତି ନେଇଥିଲେ। ସେ ୨୩ଟି ବଲରେ ୨୮ରନ ସଂଗ୍ରହ କରିଥିଲେ। ଅଶ୍ୱିନ ରିଟାୟର୍ଡ ଆଉଟ୍ ହୋଇ ରିୟାନ ପାରାଗଙ୍କୁ ଏକ ସୁଯୋଗ ଦେଇଥିଲେ। ପରାଗ ୪ଟି ବଲରୁ ୮ ରନ ସଂଗ୍ରହ କରିଥିଲେ। ପ୍ରଥମେ ବ୍ୟାଟିଂ କରି ରାଜସ୍ଥାନ ୬ ଉଇକେଟ୍ ହରାଇ ୧୬୫ ସ୍କୋର କରିଥିଲା। ଅଶ୍ୱିନ ପ୍ୟାଭିଲିୟନକୁ ଫେରିବାକୁ ସ୍ଥିର କଲାବେଳେ ଶିମ୍ରନ ହେଟମିୟର ଅନ୍ୟ ପଟେ ଥିଲେ।
ରିଟାୟର୍ଡ ଆଉଟ୍ କ’ଣ?
ଯେତେବେଳେ ଜଣେ ବ୍ୟାଟ୍ସମ୍ୟାନ ଅମ୍ପାୟାର କିମ୍ବା ବିରୋଧୀ ଦଳର ଅଧିନାୟକଙ୍କ ପରାମର୍ଶ ନ କରି ନିଜ ଇନିଂସ ମଝିରେ ପ୍ୟାଭିଲିୟନ ଛାଡିଥା’ନ୍ତି, ସେତେବେଳେ ସେ ରିଟାୟର୍ଡ ଆଉଟ୍ ବୋଲି ଧରାଯାଏ। ନିୟମ ଅନୁଯାୟୀ ଏହାକୁ ଉଇକେଟ ଭାବେ ବିବେଚନା କରାଯାଏ। ଥରେ ଜଣେ ବ୍ୟାଟ୍ସମ୍ୟାନ ରିଟାୟର୍ଡ ଆଉଟ୍ ନେଇଗଲେ, ସେ ଆଉଥରେ ବ୍ୟାଟିଂ କରିବାକୁ ଆସି ପାରିବେ ନାହିଁ। ଅନ୍ୟ ପଟେ ରିଟାୟର୍ଡ ହର୍ଟ ବ୍ୟାଟ୍ସମ୍ୟାନ ଦଳର ଆବଶ୍ୟକତା ଅନୁଯାୟୀ ପୁନର୍ବାର ବ୍ୟାଟିଂ କରିବାକୁ ପଡ଼ିଆ ନେଇପାରିବେ।
