ମହାକାଳପଡ଼ା,୧୩ା୯ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଗହୀରମଥା ସାମୁଦ୍ରିକ ଅଭୟାରଣ୍ୟ ନୀଳ ଜଳରାଶିର ସାମୁଦ୍ରିକ ବିରଳ ସବୁଜ ଶାମୁକା ଅନ୍ୟତମ। ଗହୀରମଥା ଅଞ୍ଚଳର ଲଞ୍ଚ ଘୋଲା ମାଦେଲି, ଚଟକା, ହୁକିଟୋଲା ଓ ଷୋଳ ମୁହାଣ ଆଦି ତ୍ରିକୋଣ ଭୂମି ଅବବାହିକା ଅଞ୍ଚଳରୁ ମତ୍ସ୍ୟଜୀବୀମାନେ ଟ୍ରଲର ଓ ବୋଟ୍ ଯୋଗେ ବେଆଇନ ଭାବେ ମାଛ ମାରିବା ସହ ବିରଳ ସାମୁଦ୍ରିକ ସବୁଜ ଶାମୁକା ଧରି ଜଳପଥରେ ଚାଲାଣ କରୁଥିବା ନିଜ ନାମ ଗୋପନ ରଖି ମତ୍ସ୍ୟଜୀବୀମାନେ କହିଛନ୍ତି। ଏହି ବିରଳ ସବୁଜ ଶାମୁକାର ମୂଲ୍ୟ ବିଦେଶରେ କିଗ୍ରା ପ୍ରତି ୫୦୦ ଟଙ୍କାରେ ବିକ୍ରି ହେଉଛି। ଏହାର ଲାଳ ଓ ମାଂସରୁ ବିଭିନ୍ନ ରୋଗର ମହୌଷଧି ପ୍ରସ୍ତୁତ ହେଉଥିବା କୁହାଯାଉଛି।
ବିଶେଷକରି ବର୍ଷାଋତୁରେ ସମୁଦ୍ରକୂଳ ବାଲି ପଟୁମାଟିରେ ଜୀବନ୍ତ ସବୁଜ ଶାମୁକା ବିଚରଣ କରନ୍ତି। ଚତୁରତାର ସହିତ ମାଛଧରାଳି ଏହାକୁ ଧରି ବସ୍ତା ଓ ଜାଲରେ ଭର୍ତ୍ତି କରିଥାନ୍ତି। ପରେ ଦଲାଲମାନଙ୍କ ସହ ଯୋଗାଯୋଗ କରି ମଝି ସମୁଦ୍ରରେ ଅନ୍ୟ ଡଙ୍ଗାରେ ପଡ଼ୋଶୀ ଜିଲାକୁ ସମୁଦ୍ର ପଥରେ ଚାଲାଣ ହୋଇଥାଏ। ସେଠାରୁ ଟ୍ରକ୍ ଯୋଗେ କୋଲକାତା, ଭାଇଜାଗ୍ ଦେଇ ବିଦେଶକୁ ଚାଲାଣ ହୋଇଥାଏ ବୋଲି କହିଛନ୍ତି।
ଏ ସମ୍ପର୍କରେ ରାଜନଗର ବନଖଣ୍ଡ ଅଧିକାରୀ ଭରଦ୍ୱାଜ ଗାଁଓଙ୍କରଙ୍କ ମତାମତ ନେବାରେ ଖବର ନ ଥିଲା। ଏହା ପ୍ରତି ବନ ବିଭାଗ ସ୍ବତନ୍ତ୍ର ଦୃଷ୍ଟି ଦେବା ସହିତ ଜଳପଥରେ କଡ଼ାକଡ଼ି ଚେକିଂ ହେବ ବୋଲି ସୂଚନା ଦେଇଛନ୍ତି।
