ଭୁବନେଶ୍ୱର,୧ା୩(ସୁଚିସ୍ମିତା ସାହୁ): ସନ୍ଧ୍ୟା ଆକାଶରେ ଶନିବାରଠାରୁ ୬ଟି ଗ୍ରହ ନିକଟତର ହେବେ। ଏହି ବିରଳ ମହାଜାଗତିକ ଦୃଶ୍ୟ ମାର୍ଚ୍ଚ ୭ ଯାଏ ଦୃଶ୍ୟମାନ ହେବ। ପ୍ରତିଦିନ ସୂର୍ଯ୍ୟାସ୍ତ ପରେ ପ୍ରାୟ ୩୦ ମିନିଟରୁ ୬୦ ମିନିଟ ମଧ୍ୟରେ ଆକାଶରେ ଆକର୍ଷଣ ସାଜିବେ ଏହି ଗ୍ରହ ପୁଞ୍ଜ। ଇଂଲିଶରେ ଏହାକୁ ‘ପ୍ଲାନେଟ ପରେଡ୍’ଏବଂ ଓଡ଼ିଆରେ ଗ୍ରହ ସମାବେଶ ବୋଲି କୁହାଯାଉଛି। ଏହି ଶବ୍ଦର କୌଣସି ବୈଜ୍ଞାନିକ ସଂଜ୍ଞା ନାହିଁ। କିନ୍ତୁ ଜ୍ୟୋତିର୍ବିଜ୍ଞାନରେ ଏହା ବହୁଳ ଭାବରେ ବ୍ୟବହୃତ ହେଉଛି ବୋଲି ଜନବିଜ୍ଞାନୀ ଡ. ଶୁଭେନ୍ଦୁ ପଟ୍ଟନାୟକ କହିଛନ୍ତି।
ସୂର୍ଯ୍ୟାସ୍ତର ପ୍ରାୟ ୩୦ ମିନିଟ ପରେ ପଶ୍ଚିମ ଆକାଶର ଦିଗ୍ବଳୟ ନିକଟରେ କ୍ରମାନ୍ବୟରେ ଶୁକ୍ର, ବୁଧ, ନେପ୍ଚୁନ ଏବଂ ଶନି ଗ୍ରହ ରହିବେ। ପ୍ରାୟ ୪୫ ଡିଗ୍ରୀ ଉପରେ ୟୁରାନ୍ସ ଓ ପ୍ରାୟ ମୁଣ୍ଡ ଉପରକୁ ବୃହଷ୍ପତି ଗ୍ରହ ରହିବ। ଏହି ୬ଟି ଗ୍ରହ ଭିତରୁ ୪ଟି ଅର୍ଥାତ ଶୁକ୍ର, ବୁଧ, ବୃହଷ୍ପତି ଏବଂ ଶନି ଖାଲି ଆଖିରେ ଦେଖାଯିବେ। କିନ୍ତୁ ୟୁରାନ୍ସ ଓ ନେପ୍ଚୁନ ଗ୍ରହ ଦୁଇଟିକୁ କେବଳ ଦୂରବୀକ୍ଷଣ ଯନ୍ତ୍ରରେ ଦେଖିହେବ। ବୁଧ ଓ ଶନି ଗ୍ରହର ଉଜ୍ଜ୍ୱଳତା ଖୁବ୍ କମ୍ ଥିବାରୁ ଆଲୋକ ପ୍ରଦୂଷଣ ଥିବା ସହରଗୁଡିକରୁ ଦେଖିବା କଷ୍ଟକର ହେବ। ଏକ ସମୟରେ ଖାଲି ଆଖିରେ ୪ଟି ଗ୍ରହର ଏହି ମହାଜାଗତିକ ଦୃଶ୍ୟକୁ ଦେଖିବାର ସୁଯୋଗ ପାଇପାରିବେ ଲୋକେ। ଓଡିଶା ତଥା ଭାରତର ସବୁ ଅଞ୍ଚଳରୁ ଆକାଶ ମେଘ ଓ ଆଲୋକ ପ୍ରଦୂଷଣ ମୁକ୍ତ ଥିଲେ ଏହାକୁ ଦେଖି ହେବ ବୋଲି ଡ. ପଟ୍ଟନାୟକ କହିଛନ୍ତି।
