ଦିଗପହଣ୍ଡି,୧୫।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ର ଜଣାଶୁଣା ଆଇନଜୀବୀ ତଥା ଖେମୁଣ୍ଡି ଓକିଲ ସଂଘର ପୂର୍ବତନ ସଭାପତି ହରପ୍ରସାଦ ରଥଙ୍କ ମସ୍ତିଷ୍କରେ ଟ୍ୟୁମର ହୋଇଥିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନା ସ୍ନାୟୁଶଲ୍ୟ ବିଭାଗରେ ଭର୍ତ୍ତି କରାଯାଇଥିଲା। ସେଠାରେ ସ୍ନାୟୁଶଲ୍ୟ ବିଭାଗୀୟ ମୁଖ୍ୟ ପ୍ରଫେସର ଡା. ରବି ନାରାୟଣ ପଣ୍ଡାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆସିଷ୍ଟାଣ୍ଟ ପ୍ରଫେସର ଡା. ଦେବଦତ୍ତ ସେନାପତି, ଡା. ଦେବଶ୍ରୀ ମହାପାତ୍ର, ଡା. ତୁଷାର କାନ୍ତ ରଥ, ଡା. ପି. ହରିପ୍ରସାଦ ପ୍ରମୁଖଙ୍କୁ ଏକ ଡାକ୍ତରୀ ଟିମ ହରପ୍ରସାଦଙ୍କ ମସ୍ତିଷ୍କରେ ଦୀର୍ଘ ଦିନରୁ ରହିଥିବା ପ୍ରାୟ ୩ ଶହ ଗ୍ରାମ ଓଜନର ଏକ ମାଂସ ପିଣ୍ଡୁଳା(ଟ୍ୟୁମର)କୁ ପ୍ରାୟ ୩ ଘଣ୍ଟାର ଅପରେଶନ ପରେ ବାହାର କରିବାରେ ସଫଳ ହୋଇଛନ୍ତି। ନିଶ୍ଚେତକ ବିଭାଗୀୟ ମୁଖ୍ୟ ଡା. ସଂଜୀବ ପାତ୍ର ଏବଂ ତାଙ୍କ ସହଯୋଗୀ ଅସ୍ତ୍ରୋପଚାର ସମୟରେ ଉପସ୍ଥିତ ଥିଲେ। ଏହି ସଫଳ ଅସ୍ତ୍ରୋପଚାର ପରେ ହରପ୍ରସାଦ ଏବଂ ତାଙ୍କ ପରିବାର ଲୋକେ ସ୍ନାୟୁ ଶଲ୍ୟ ବିଭାଗର ଡାକ୍ତରୀ ଟିମଙ୍କ ସମେତ ଅସ୍ତ୍ରୋପଚାର ଓ ଚିକିତ୍ସା ଦିଗରେ ସହାୟତା ଯୋଗାଇ ଦେଇଥିବା ସମସ୍ତ କର୍ମଚାରୀଙ୍କୁ ସାଧୁବାଦ ଜଣାଇବା ସହ ବିଭିନ୍ନ କ୍ଷେତ୍ରରେ ସହାୟତା ପାଇଁ ବ୍ରହ୍ମପୁର ବଡ଼ ମେଡିକାଲ କଲେଜ ପରିଚାଳନା ଅଧିକ୍ଷୀକା ଡା. ସୁଚିତ୍ରା ଦାସ ଏବଂ ଗଞ୍ଜାମ ଜିଲାପାଳ ଭି. କୀର୍ତ୍ତିଭାସନଙ୍କୁ କୃତଜ୍ଞତା ଜଣାଇଛନ୍ତି। ବର୍ତ୍ତମାନ ହରପ୍ରସାଦଙ୍କୁ ଅପରେଶନ ପରବର୍ତ୍ତୀ ନିରୀକ୍ଷଣରେ ରଖାଯାଇଥିବା ବିଭାଗୀୟ ମୁଖ୍ୟ ଡା.ରବି ନାରାୟଣ ପଣ୍ଡା ପ୍ରକାଶ କରିଛନ୍ତି। ଏହି ବିରଳ ଅସ୍ତ୍ରୋପଚାର ସଫଳ ହୋଇଥିବାରୁ ଖେମୁଣ୍ଡି ଓକିଲ ସଂଘ ପକ୍ଷରୁ ଡାକ୍ତରୀ ଟିମର ସମସ୍ତ ସଦସ୍ୟା ସଦସ୍ୟଙ୍କୁ ଅଭିନନ୍ଦନ ଜଣାଇବା ସହ ହରପ୍ରସାଦଙ୍କ ଆଶୁ ଆରୋଗ୍ୟ କାମନା କରାଯାଇଛି ।
