କଲମ୍ବୋ, ୮।୭- ଦୁଇଟି ହାତୀ ଛୁଆ ସମାନ ମା’ଠାରୁ କ୍ଷୀର ଖାଉଥିବା ଶ୍ରୀଲଙ୍କାର ଜାତୀୟ ଉଦ୍ୟାନରେ ଦେଖିବାକୁ ମିଳିଛି। ହାତୀଟି ଏହି ୨ଟି ବିରଳ ଯମଜ ଛୁଆ ପ୍ରସବ କରିଥିବା ବନ୍ୟ ଅଧିକାରୀମାନେ ଅନୁମାନ କରିଛନ୍ତି। ଏହି ହାତୀ ଛୁଆ ଦୁଇଟିର ବୟସ ୩ରୁ ୪ ସପ୍ତାହ ହେବ। କଲମ୍ବୋଠାରୁ ୨୦୦ କିଲୋମିଟର ଦୂର ମିନେରିଆ ଅଭୟାରଣ୍ୟରେ ଏକ ହାତୀ ପଲଙ୍କ ମଧ୍ୟରେ ଏହି ୨ଟି ଛୁଆ ବୁଲୁଛନ୍ତି। ବନ୍ୟ ଅଧିକାରୀମାନେ ଦୂରରୁ ବହୁ ସମୟ ନୀରିକ୍ଷଣ କରିବା ପରେ ଏହି ୨ଟି ଛୁଆ ଯମଜ ବୋଲି ନିଶ୍ଚିତ ହୋଇଥିବା ବନ୍ୟଜନ୍ତୁ ସଂରକ୍ଷଣ ବିଭାଗର ମହାନିର୍ଦ୍ଦେଶକ ତାରକା ପ୍ରସାଦ କହିଛନ୍ତି। ଏହି ୨ଟି ଛୁଆ ମଧ୍ୟ ସମାନ ମା’ ନିକଟରୁ କ୍ଷୀର ଖାଉଥିବାର ଫଟୋ ସୋମବାର ଉତ୍ତୋଳନ କରାଯାଇଥିଲା। ଏଥିରୁ ଉଭୟ ଯମଜ ବୋଲି ପ୍ରସାଦ ବିଶ୍ୱାସ କରିଛନ୍ତି। ତେବେ ଏହି ୨ଟି ଛୁଆ ଯମଜ କି ନାହିଁ ତାହା ନିଶ୍ଚିତ ହେବା ପାଇଁ ରେଞ୍ଜର ଉଭୟଙ୍କ ମଳ ସଂଗ୍ରହ କରି ପରୀକ୍ଷା ପାଇଁ ପଠାଇଛନ୍ତି। ଯଦି ଫଳାଫଳ ମ୍ୟାଚ୍ କରେ ତେବେ ଭାରତ ମହାସାଗର ଦ୍ୱୀପରେ ଯମଜ ହାତୀ ଛୁଆ ଠାବ ହେବାରେ ଏହା ପ୍ରଥମ ଘଟଣା ହେବ ବୋଲି ପ୍ରସାଦ କହିଛନ୍ତି। ରିପୋର୍ଟ ମୁତାବକ ହାତୀ ଯମଜ ଛୁଆ ଜନ୍ମ କରିବାର ସମ୍ଭାବନା ଏକ ପ୍ରତିଶତରୁ କମ୍ ରହିଛି। ସେହିଭଳି ଛୁଆ ୨ଟି ବଞ୍ଚିବାର ସମ୍ଭାବନା ମଧ୍ୟ କମ୍ ରହିଥାଏ।
