ଢେଙ୍କିକୋଟ,୮ା୫(ଡି.ଏନ୍.ଏ.): କେନ୍ଦୁଝର ଜିଲା ହରିଚନ୍ଦନପୁର ଥାନା ଅନ୍ତର୍ଗତ ଭଗାମୁଣ୍ଡା ସାପ୍ତାହିକ ହାଟରୁ ଫେରୁଥିବା ଜଣେ ୬୦ ବର୍ଷୀୟା ଆଦିବାସୀ ବୃଦ୍ଧାଙ୍କୁ ଗଣବଳାତ୍କାର ହୋଇଛି। ଏ ନେଇ ହରିଚନ୍ଦନପୁର ଥାନାରେ ବୃଦ୍ଧା ଜଣଙ୍କ ଶନିବାର ଲିଖିତ ଅଭିଯୋଗ କରିଛନ୍ତି। ଅଭିଯୁକ୍ତମାନେ ଫେରାର ହୋଇଯାଇଥିବା ବେଳେ ପୋଲିସ ମାମଲା ରୁଜୁକରି ତଦନ୍ତ ଆରମ୍ଭ କରିଛି। ପୋଲିସ ସୂଚନା ମୁତାବକ, ଗତ ବୁଧବାର ଭଗାମୁଣ୍ଡା ହାଟକୁ ଉକ୍ତ ଥାନା ଅଞ୍ଚଳର ଜନୈକା ଆଦିବାସୀ ବୃଦ୍ଧା ଯାଇଥିଲେ। ଫେରିବା ସମୟରେ ନିଛାଟିଆ ଜଙ୍ଗଲ ମଝିରେ ଥକା ନେଇଥିଲେ। ସେ ସମୟରେ ସ୍ଥାନୀୟ ଅଞ୍ଚଳର ଉତ୍ତମ ଲୋହାର(୩୦) ଓ ମଙ୍ଗଳା ସୋରେନ(୩୨) ବୃଦ୍ଧାଙ୍କ ନିକଟରେ ପହଞ୍ଚତ୍ ତାଙ୍କୁ ଜଙ୍ଗଲକୁ ଟେକିନେଇ ବଳାତ୍କାର କରିଥିଲେ। ପରେ ତାଙ୍କୁ ଧମକ ଦେଇ ସେଠାରେ ଛାଡ଼ି ଚାଲିଯାଇଥିଲେ। ବୃଦ୍ଧା କାନ୍ଦି କାନ୍ଦି ଆସି ଘରେ ପହଞ୍ଚତ୍ ସବୁକଥା କହିଥିଲେ। ପରିବାର ଲୋକେ ଅଭିଯୁକ୍ତଙ୍କ ଘରେ ଜଣାଇବା ସହ ଗ୍ରାମରେ ଜଣାଇ ନ୍ୟାୟ ଭିକ୍ଷା କରିଥିଲେ। ମାତ୍ର ଅଭିଯୁକ୍ତମାନେ ଫେରାର ହୋଇଯିବାରୁ ଶନିବାର ବୃଦ୍ଧା ହରିଚନ୍ଦନପୁର ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ପାଇ ହରିଚନ୍ଦନପୁର ଥାନା ଅଧିକାରୀ ଓ ଏସ୍ଡିପିଓ ଘଟଣାସ୍ଥଳ ପରିଦର୍ଶନ କରିଥିଲେ। ଏ ନେଇ ଥାନାରେ ମାମଲା(ନଂ.୬୨/୨୩) ରୁଜୁ ହୋଇଛି। ପରେ ବୃଦ୍ଧାଙ୍କ ଡାକ୍ତରୀମାଇନା କରାଯାଇ ତଦନ୍ତ ଚାଲିଥିବା ଥାନା ଅଧିକାରୀ ପ୍ରଫୁଲ୍ଲ କୁମାର ବାର୍ଲା କହିଛନ୍ତି। ଖୁବ୍ଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଏସ୍ଡିପିଓ ସୁଶୀଲ କୁମାର ମିଶ୍ର ପ୍ରକାଶ କରିଛନ୍ତି।
