ବ୍ରହ୍ମପୁର ଅଫିସ,୨୪ା୩: ଏକ ଆବାସିକ ସ୍କୁଲର ଜନୈକା ପ୍ରଧାନ ଶିକ୍ଷୟିତ୍ରୀଙ୍କୁ ବିବାହ ପ୍ରତିଶ୍ରୁତି ଦେଇ ବଳାତ୍କାର ଅଭିଯୋଗରେ ବ୍ରହ୍ମପୁର ସଦର ଥାନା ପୋଲିସ ଜଣେ ସିପାହୀଙ୍କୁ ଗୁରୁବାର ଗିରଫ କରିଛି। ଅଭିଯୁକ୍ତ ଜଣକ ହେଲେ ମୋହନା ଥାନା ଅନ୍ତର୍ଗତ କାଳିଆପୁଟା ଗ୍ରାମର ଭୂବନା ନନ୍ଦ ନାୟକ। ଭୂବନାନନ୍ଦ ତୃତୀୟ ବାଟାଲିୟନ (ଏସ୍ଏସ୍ବିଏନ)ର ସିପାହୀ। ସେ ବର୍ତ୍ତମାନ ରାୟଗଡ଼ା ଜିଲା ବିଷମକଟକ ଥାନାରେ କାର୍ଯ୍ୟରତ ଅଛନ୍ତି। ଗୁରୁବାର ଉଭୟ ପୀଡ଼ିତା ଓ ସିପାହୀଙ୍କ ଡାକ୍ତରୀ ମାଇନା କରାଯାଇଥିବା ପୋଲିସ କହିଛି। ମାମଲା ନମ୍ବର ୧୮୨/୨୩ ରେ ଗୁରୁବାର ସିପାହୀଙ୍କୁ କୋର୍ଟ ଚାଲାଣ କରିଛି।
ପ୍ରକାଶ ଯେ, ଗଜପତି ଜିଲା ଚାନ୍ଦିପୁଟ ଗ୍ରାମର ୩୭ବର୍ଷୟୀ ଜୈନିକା ବିବାହିତା ମହିଳା ଏକ ସ୍କୁଲରେ ପ୍ରଧାନ ଶିକ୍ଷୟିତ୍ରୀ ଥିଲେ। ତାଙ୍କର ଜଣେ ପୁଅ ଓ ଝିଅ ଅଛନ୍ତି। କୌଣସି କାରଣକୁ କେନ୍ଦ୍ର କରି ମହିଳା ଜଣଙ୍କ ତାଙ୍କ ସ୍ବାମୀଙ୍କଠାରୁ ଅଲଗା ହୋଇ ବ୍ରହ୍ମପୁର ସଦର ଥାନା ଅଞ୍ଚଳରେ ରହୁଥିଲେ। ସାଥିରେ ତାଙ୍କର ଦୁଇ ସନ୍ତାନଙ୍କୁ ରଖିଥିଲେ। ୨୦୧୦ରେ ସିପାହୀ ଭୂବନାନନ୍ଦ ସମ୍ପୃକ୍ତ ମହିଳାଙ୍କୁ ବିବାହ ପ୍ରତିଶ୍ରୁତି ଦେଇ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ସେହିପରି ସିପାହୀ ତାଙ୍କର ୩ ଥର ଗର୍ଭପାତ କରାଇଛନ୍ତି। ଏପରିକି ସିପାହୀ ଜଣଙ୍କ ମହିଳାଙ୍କ ସହ ଲଗାତର ଭାବେ ଶାରୀରିକ ସମ୍ପର୍କ ରଖି ଆସୁଥିଲେ। ସେ ମହିଳାଙ୍କଠାରୁ ବିଭିନ୍ନ ଆଳରେ ପ୍ରାୟ ୧୨ ଲକ୍ଷ ଟଙ୍କା ହଡପ କରି ନେଇଯାଇଥିଲେ। ମହିଳାଙ୍କ ସହ ସମ୍ପର୍କ ରଖି ସିପାହୀ ଜଣଙ୍କ ତାଙ୍କ ଅଜାଣତରେ ଅନ୍ୟ ଜଣେ ଯୁବତୀଙ୍କୁ ବିବାହ କରିଥିବା ଜଣାପଡିଥିଲା। ମହିଳା ଜଣଙ୍କ ଏହାର ପ୍ରତିବାଦ କରି ବ୍ରହ୍ମପୁର ସଦର ଥାନାରେ ଅଭିଯୋଗ କରିଥିଲେ।
