ଗୋପ,୧୬।୩ (ଡି.ଏନ୍.ଏ.): ଗୋପ ଥାନା ଅନ୍ତର୍ଗତ ଶୋରଭା ପାଇକସାହି ଗ୍ରାମର ଜଣଙ୍କ ଘରେ ପଶି ସୁନା ଅଳଙ୍କାର ଚୋରି କରିବା ପରେ ଉପସ୍ଥିତ ବୃଦ୍ଧାଙ୍କୁ ବଳାତ୍କାର କରିବା ଅଭିଯୋଗରେ ପୋଲିସ ଜଣଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି। ସେ ହେଲେ ଉକ୍ତ ଗ୍ରାମର ପିଣ୍ଟୁ ଲେଙ୍କା (୩୦)। ଏନେଇ ଗୋପ ଥାନାରେ ଏକ ମାମଲା (ନଂ. ୧୩୩/୨୩) ରୁଜୁ ହୋଇଛି। ଗିରଫ ପରେ ଅଭିଯୁକ୍ତ ଓ ବୃଦ୍ଧାଙ୍କ ଡାକ୍ତରୀ ମାଇନା କରାଯାଇଥିଲା। ପୋଲିସ ଅଭିଯୁକ୍ତଙ୍କ ପାଖରୁ ଚୋରି ହୋଇଥିବା ସୁନା ଜବତ କରିଛି। ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନା ମୁତାବକ, ପିଣ୍ଟୁ ମଙ୍ଗଳବାର ବିଳମ୍ବିତ ରାତିରେ ଜଣେ ୭୦ ବର୍ଷୀୟା ବୃଦ୍ଧାଙ୍କ ଘରେ ପଶି ଟ୍ରଙ୍କ, ଆଲମାରି ଭାଙ୍ଗି ସୁନା, ରୁପା ଅଳଙ୍କାର ସହ ନଗଦ ୩୦ ହଜାର ଟଙ୍କା ନେଇଥିଲେ। ଶେଷରେ ବୃଦ୍ଧାଙ୍କ କାନରେ ଥିବା ସୁନା କାନଫୁଲ ନେବାବେଳେ ତାଙ୍କର ନିଦ ଭାଙ୍ଗିଥିଲା। ହେଲେ ଯୁବକ ଜୋର ଜବରଦସ୍ତି ତାଙ୍କ କାନଫୁଲ ନେବା ସହ ତାଙ୍କୁ ବଳାତ୍କାର କରିଥିଲେ। ପରେ ସେ ସେଠାରୁ ଚମ୍ପଟ ମାରିଥିଲେ। ବୃଦ୍ଧା ପଡ଼ିଶା ଲୋକଙ୍କୁ ଡାକି ଏ ଘଟଣା ସମ୍ପର୍କରେ କହିବା ସହ ବୁଧବାର ସକାଳେ ନୟାହାଟ ଫାଣ୍ଡିରେ ଅଭିଯୋଗ କରିଥିଲେ। ତେବେ ମହିଳାଙ୍କ ସ୍ବାମୀ ମରିଯାଇଥିବାବେଳେ ତାଙ୍କର ୨ଟି ପୁଅ ଅଛନ୍ତି। ହେଲେ ଦୁହେଁ ବାହାରେ ରହୁଥିବାବେଳେ ବୃଦ୍ଧା ଜଣଙ୍କ ଏଠାରେ ଏକୁଟିଆ ରହୁଥିଲେ।
