ଭୁବନେଶ୍ୱର, ୨୦।୪(ବ୍ୟୁରୋ): ବୟସ ଯେତେବେଳେ ୧୪ ହୋଇଥିଲା ସେବେଠାରୁ ବଳାତ୍କାରର ଶିକାର ହୋଇ ଆସୁଛନ୍ତି ଜଣେ ଯୁବତୀ। ୧୫ବର୍ଷ ଧରି ସମ୍ପର୍କୀୟ ମାମୁଙ୍କ ବଳତ୍କାର ଯୋଗୁ ଏବେ ସେ ୩ କନ୍ୟା ସନ୍ତାନର ମା’। ଏହା କୌଣସି ଆଦିବାସୀ ଇଲାକାର ଘଟଣା ନୁହେଁ, ରାଜଧାନୀ ଉପକଣ୍ଠ ବାଲିପାଟଣା ଅଞ୍ଚଳରେ ଦେଖିବାକୁ ମିଳିଛି ଏଭଳି ସ୍ପର୍ଶକାତର ଚିତ୍ର। ସୋମବାର ଏକ ହୋଟେଲରେ ଆୟୋଜିତ ଖବରଦାତା ସମ୍ମିଳନୀରେ ପୀଡିତା ଜଣକ ତାଙ୍କ ପ୍ରତି ହୋଇଥିବା ଅତ୍ୟାଚାରର ପୂରା କାହାଣୀ ବଖାଣିବା ପରେ ଘଟଣା ପଦାକୁ ଆସିଛି।
ପୀଡିତାଙ୍କ ଅଭିଯୋଗ ଅନୁସାରେ, ସମ୍ପର୍କୀୟ ମାମୁ ବଳାତ୍କାର କରିବାରୁ ସେ ୧୪ବର୍ଷ ବୟସରେ ଗର୍ଭବତୀ ହୋଇଥିଲେ। ଘର ଲୋକେ ସାଥ୍ ଦେବା ବଦଳରେ ଲୋକନିନ୍ଦା ଭୟରେ ମାମୁଙ୍କ ସହ ବିନା ବିବାହରେ ସ୍ତ୍ରୀ ଭାବେ ରହିବାକୁ ଛାଡିଦେଇଥିଲେ। ହେଲେ ସମ୍ପର୍କୀୟ ମାମୁ ସ୍ତ୍ରୀ ଭାବେ ରଖିବା ବଦଳରେ ବାରମ୍ବାର ବଳାତ୍କାର ଓ ନିର୍ଯାତନା ଦେଉଥିଲେ। ଏବେ ୩୦ବର୍ଷ ବୟସ ହୋଇଥିବାବେଳେ ୩ ସନ୍ତାନର ମା’ ହୋଇଛନ୍ତି। ଶାରୀରିକ ଓ ମାନସିକ ଉତ୍ପୀଡନ ଅସହ୍ୟ ହେବାରୁ ଶେଷରେ ପୀଡିତା ଜଣକ ଗତ ନଭେମ୍ବର ୧ରେ ମାନବାଧିକାର କର୍ମୀ ଡ. ଇପ୍ସିତା ଦାଶ ଓ ଶ୍ୱାତିସ୍ମିତା ମହାପାତ୍ରଙ୍କୁ ଏ ସମ୍ପର୍କରେ ଜଣାଇଥିଲେ। ପରେ ମହିଳା ଥାନା ସହଯୋଗରେ ତାଙ୍କୁ ସ୍ବଧାର ଗୃହକୁ ପଠାଯାଇଥିଲା। ସେପଟେ ଅଭିଯୁକ୍ତ ମାମୁ ପୀଡିତାଙ୍କୁ ସାମାଜିକ ଗଣମାଧ୍ୟମରେ ଅଶ୍ଳୀଳ ପୋଷ୍ଟକରି ବଦନାମ କରିବାକୁ ଚେଷ୍ଟା କରିଥିଲେ। ସେହିପରି ମହିଳା କମିଶନ କାର୍ଯ୍ୟାଳୟରେ ତାଙ୍କୁ ଉଠାଇନେବାକୁ ଉଦ୍ୟମ କରିବା ସହ ମାନବାଧିକାର କର୍ମୀ ଦେବାଶିଷ ମିଶ୍ରଙ୍କୁ ଆକ୍ରମଣ କରିଥିବା ପୀଡିତାଜଣକ ଗଣମାଧ୍ୟମକୁ କହିଛନ୍ତି। ଏହି ଖବରଦାତା ସମ୍ମିଳନୀରେ ବିଶ୍ୱ ମାନବାଧିକାର ସୁରକ୍ଷା ସଙ୍ଗଠନର ଡ. ଅଭିନ୍ନ ହୋତା, ଡ. ଇପ୍ସିତା ଲବନ୍ତିକା, ଡ. ଲୋକନାଥ ନାୟକ, ପି. ତାରିଣୀ ପାତ୍ର , ଲିନୁ ମିଶ୍ର, ସଞ୍ଜୀବ ମିଶ୍ର, ସମୀର ତ୍ରିପାଠୀ, ଶିଦ୍ଧ ମହାନ୍ତି, ରଶ୍ମିରଞ୍ଜନ ସ୍ବାଇଁ ପ୍ରମୁଖ ଉପସ୍ଥିତ ଥିଲେ।
