ଭୁବନେଶ୍ୱର, ୨୧।୧ (ସରୋଜ ଜେନା): କଟକସ୍ଥିତ ଡ୍ରିମ୍ସ ଗ୍ରାଉଣ୍ଡରେ ଚାଲିଥିବା ଓଡ଼ିଶା ବିପକ୍ଷ ରଣଜୀ ଟ୍ରଫି କ୍ରିକେଟ ମ୍ୟାଚରେ ଦୃଢ ସ୍ଥିତିରେ ରହିଛି ଜମ୍ମୁ-କଶ୍ମୀର। ବୋଲରଙ୍କୁ ସୁହାଉଥିବା ଉଇକେଟରେ ଦ୍ୱିତୀୟ ଦିନର ଷ୍ଟମ୍ପ ଅପସାରଣ ସୁଦ୍ଧା ଓଡ଼ିଶା ୭ ଉଇକେଟରେ ୧୨୬ ରନ୍ କରିଛି। ହାତରେ ୩ ଉଇକେଟ ରହିଥିବା ବେଳେ ଦଳ ମାତ୍ର ୭୬ ରନ୍ରେ ଆଗୁଆ ରହିଛି। ପ୍ରଥମ ଦିନରେ ୧୪ଟି ଉଇକେଟର ପତନ ଘଟିଥିବା ବେଳେ ଦ୍ୱିତୀୟ ଦିନରେ ୧୩ ଜଣ ଖେଳାଳି ଆଉଟ ହୋଇଥିଲେ। ପ୍ରଥମ ଦିନର ଅସମାପ୍ତ ସ୍କୋର ୪୫/୪ରୁ ଖେଳ ଆରମ୍ଭ କରି ଜମ୍ମୁ କଶ୍ମୀର ୧୮୦ ରନ୍ରେ ଅଲଆଉଟ ହୋଇଥିଲା। ଜବାବରେ ଓଡ଼ିଶା ୧୨୬ ରନରେ ୭ ଉଇକେଟ ହରାଇଛି।
ରାଜେଶଙ୍କ ୫ ଉଇକେଟ
ଜମ୍ମୁ କଶ୍ମୀର ଏହାର ଅସମାପ୍ତ ଇନିଂସ ଆରମ୍ଭ କରିଥିବା ବେଳେ ପୂର୍ବ ଦିନର ସ୍କୋରରେ ୮ ରନ୍ ଯୋଡି ପ୍ରଥମ ଉଇକେଟ ହରାଇଥିଲା। ୮୫ ରନ୍ରେ ଦଳ ଷଷ୍ଠ ଉଇକେଟ ହରାଇଥିଲେ ମଧ୍ୟ ଆବିଦ୍ ମୁସ୍ତାକ ୫୦ ଓ ଉମର ନାଜିର ୨୫ ରନ୍ କରି ଦଳକୁ ମହତ୍ତ୍ୱପୂର୍ଣ୍ଣ ୫୦ ରନ୍ର ଅଗ୍ରଣୀ ପ୍ରଦାନ କରିଥିଲେ। ଓଡ଼ିଶା ପକ୍ଷରୁ ରାଜେଶ ମହାନ୍ତି ୫ ଉଇକେଟ ନେଇଥିବା ବେଳେ ସୁନୀଲ ରାଉଳ ୩ଟି ଓ ସୂର୍ଯ୍ୟକାନ୍ତ ପ୍ରଧାନ, ପ୍ରୟାସ ସିଂ ଗୋଟିଏ ଲେଖାଏ ଉଇକେଟ ନେଇଛନ୍ତି।
ଓଡ଼ିଶାର ବିପର୍ଯ୍ୟୟ
୫୦ ରନ୍ରେ ପଛୁଆ ରହି ଦ୍ୱିତୀୟ ଇନିଂସ ଆରମ୍ଭ କରିଥିବା ଓଡ଼ିଶାର ଆରମ୍ଭ ବିପର୍ଯ୍ୟୟପୂର୍ଣ୍ଣ ରହିଥିଲା। ଦଳର ଟପ୍ ଅର୍ଡର ବ୍ୟାଟିଂ ପୁନର୍ବାର ଫେଲ ମାରିଥିଲା। ଓପନର ଶାନ୍ତନୁ ମିଶ୍ର(୭) ଓ ଅନୁରାଗ ଷଡଙ୍ଗୀ(୧୬) ରନ୍ କରଥିବା ବେଳେ ୨୩ ରନ୍ରେ ଉଭୟ ପ୍ୟାଭିଲିୟନ୍ ଫେରିଥିଲେ। ଅନ୍ୟ ମାନଙ୍କ ମଧ୍ୟରେ ଶୁଭ୍ରାଂଶୁ ସେନାପତି ଖାତା ଖୋଲିପାରି ନ ଥିବା ବେଳେ ଗୋବିନ୍ଦ ପୋଦ୍ଦାର ମାତ୍ର ୮ ରନ୍ କରିଥିଲେ। କାର୍ତ୍ତିକ ବିଶ୍ୱାଳ(୭), ରାଜେଶ ଧୂପର(୧) ଓ ପ୍ରୟାସ ସିଂ(୪) ସହଜରେ ଆଉଟ ହୋଇଥିବା ବେଳେ ଓଡ଼ିଶା ମାତ୍ର ୬୭ ରନ୍ରେ ୭ ଉଇକେଟ ହରାଇଥିଲା। ଓଡ଼ିଶା ଏକ ବିପର୍ଯ୍ୟୟ ଆଡକୁ ଅଗ୍ରସର ହେଉଥିବା ବେଳେ ୩ ନମ୍ବର ବ୍ୟାଟର ସନ୍ଦୀପ ପଟ୍ଟନାୟକ(୪୭*) ଓ ସୂର୍ଯ୍ୟକାନ୍ତ ପ୍ରଧାନ(୨୭) ଅଷ୍ଟମ ଉଇକେଟରେ ଅବିଭାଜିତ ୫୯ ରନ୍ ଯୋଡିଥିଲେ। ସନ୍ଦୀପ ୧୦୮ ବଲ୍ ଖେଳି ୬ ଚୌକା ମାରି ବ୍ୟାଟିଂ କରୁଛନ୍ତି। ଅନ୍ୟ ପକ୍ଷରେ ସୂର୍ଯ୍ୟକାନ୍ତ ୨୫ ବଲ୍ ଖେଳି ଗୋଟିଏ ଲେଖାଏ ଛକା ଓ ଚୌକା ମାରିଛନ୍ତି। ଜମ୍ମୁ କଶ୍ମୀର ପକ୍ଷରୁ ରୋହିତ ଶର୍ମା, ଉମର ନାଜିର ମୀର ଓ ଆକ୍ୱିବ ନବି ଦର ଦୁଇଟି ଲେଖାଏ ଉଇକେଟ ନେଇଛନ୍ତି।
ସଂକ୍ଷିପ୍ତ ସ୍କୋର
ଓଡ଼ିଶା ପ୍ରଥମ ଇନିଂସ: ୧୩୦/୧୦ (ଗୋବିନ୍ଦ ପୋଦ୍ଦାର-୫୫, ଶାନ୍ତନୁ ମିଶ୍ର-୨୮, ରୋହିତ ଶର୍ମା-୫/୧୨, ଉମ୍ରାନ ମଲିକ-୨/୩୪, ଉମ୍ରାନ ନାଜିର ମିର-୨/୨୭)।
ଜମ୍ମୁ-କଶ୍ମୀର ପ୍ରଥମ ଇନିଂସ: ୧୮୦/୧୦ (ଆବିଦ୍ ମୁସ୍ତାକ-୫୦, ଉମର ନାଜିର-୨୫, ଶୁଭମ୍ ପୁନ୍ଦିର-୩୪, ରାଜେଶ ମହାନ୍ତି-୫/୬୪, ସୁନୀଲ ରାଉଳ-୩/୩୨, ସୂର୍ଯ୍ୟକାନ୍ତ ପ୍ରଧାନ-୧/୪୨, ପ୍ରୟାସ ସିଂ-୧/୩୦)।
ଓଡ଼ିଶା ଦ୍ୱିତୀୟ ଇନିଂସ: ୧୨୬/୭(ସନ୍ଦୀପ ପଟ୍ଟନାୟକ-୪୭*, ସୂର୍ଯ୍ୟକାନ୍ତ ପ୍ରଧାନ-୨୭*, ଅନୁରାଗ ଷଡଙ୍ଗୀ-୧୬*, ରୋହିତ ଶର୍ମା-୨/୨୩, ଉମର ନାଜିର ମୀର-୨/୨୭, ଆକ୍ୱିବ ନବି ଦର-୨/୪୪)।
