ପୁରୁଷୋତ୍ତମପୁର,୬।୩ (ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ରାଣୀଗାଁ କାନକାଟି ପୋଖରୀରୁ ମାଛ ଧରିବାକୁ କେନ୍ଦ୍ରକରି ତିନିଦିନ ହେଲା ଲାଗିରହିଥିବା ବିବାଦ ଶୁକ୍ରବାର ଉଗ୍ର ରୂପ ନେଇଛି । ଗୁଣେଶ୍ବର ମହିଳା ସଂଘ(ଏସଏଚଜି)ଓ ଗ୍ରାମବାସୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଛି । ଫଳରେ ମାଜିଷ୍ଟ୍ରେଟ ଦାୟିତ୍ୱରେ ଥିବା ତହସିଲଦାର ବିନୋଦ କୁମାର ବେହେରା, ଏସଡିପିଓ ସୁଜିତକୁମାର ନାୟକ, ଆଇଆଇସି କୁଳମଣି ସେଠୀ , ପୋଲିସ ଫୋର୍ସ ଗ୍ରାମରେ ପହଞ୍ଚି ସରପଞ୍ଚ ଏନ ଭାସ୍କରଦୋରା, ପଞ୍ଚାୟତ ନିର୍ବାହୀ ଅଧିକାରୀ ଏଲ ବାଲ୍ୟାଙ୍କ ସମେତ ଉଭୟ ପକ୍ଷଙ୍କୁ ନେଇ ବୁଝାସୁଝା କରିଛନ୍ତି। ଫଳରେ ପରିସ୍ଥିତି ଏକ ପ୍ରକାର ନିୟନ୍ତ୍ରଣାଧିନ ରହିଛି । ଗ୍ରାମରେ ଶାନ୍ତି ପ୍ରତିଷ୍ଠା ଲାଗି ଉଭୟ ପକ୍ଷଙ୍କୁ ନେଇ ଶାନ୍ତିକମିଟି ଗଠନ କରି ବୁଧବାର ଦିନ ମାଛଧରିବା ଲାଗି ସ୍ଥିର କରାଯାଇଥିଲା। ଏଥିରେ ମହିଳା ସଂଘର ଖର୍ଚ୍ଚ ଓ ତଦାରଖର ଟଙ୍କା ସମେତ ଲଭାଶଂର ୬୦ ପ୍ରତିଶତ ଦିଆଯିବା ସହ ୪୦ ପ୍ରତିଶତ ଗ୍ରାମରେ ଥିବା ମୁକ୍ତେଶ୍ବର ମନ୍ଦିର ଉନ୍ନୟନ ଲାଗି ଦିଆଯିବା ନେଇ ଏକ ପ୍ରକାରର ସ୍ଥିର କରାଯାଇଛି ।
ସୂଚନାଯୋଗ୍ୟ, ଗ୍ରାମରେ ଥିବା ସମସ୍ତ ପୋଖରୀକୁ ଦୀର୍ଘ ବର୍ଷ ହେଲା ଗ୍ରାମବାସୀ ନିଜ ଅଧୀନରେ ରଖି ତାହାର ଲାଭାଶଂ ମନ୍ଦିର ଉନ୍ନୟନରେ ବିନିଯୋଗ କରିଆସୁଥିଲେ । ମାତ୍ର ସରକାର ମହିଳାଙ୍କୁ ଆତ୍ମନିର୍ଭରଶୀଳ କରିବା ଲାଗି ଯୋଜନା କରିଥିବା ପ୍ରକାରେ ଗତବର୍ଷ ମାଛ ଚାଷ ଲାଗି ପୋଖରୀକୁ ଅନୁସୂଚିତଜାତି ମହିଳା ସ୍ବୟଂ ସହାୟିକା ଗୋଷ୍ଠୀକୁ ନିୟମ ପ୍ରକାରେ ଲିଜ୍ ଦିଆଯାଇଥିଲା । ଜୁଲାଇ ମାସରେ ସେମାନେ ପୋଖରୀରେ ମାଛ ଯାହାଂଳ ଛାଡିଥିଲେ । ଏହାକୁ ନେଇ କିଛି ଗ୍ରାମବାସୀ ଅଭିଯୋଗ ଉଠାଇଥଲେ। ଏପରିକି ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ । ଏହାକୁ ନେଇ ବିଡିଓ ଶରତକୁମାର ପାତ୍ରଙ୍କ ସହ ଯୋଗାଯୋଗ କରାଯିବାରେ ସେ କହିଛନ୍ତି ଯେ, ହାଇକୋର୍ଟରେ କରାଯାଇଥିବା ମାମଲା ପ୍ରକାରେ ନିଲାମ କାର୍ଯ୍ୟ ଠିକ ହୋଇଛି କି ନାହିଁ ସେଥିନେଇ ଜଣାଇବା ସକାଶେ ମାନ୍ୟବର ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଏହାକୁ ନେଇ ସରପଞ୍ଚ, ଥାନା ଆଇଆଇସି, ସରପଞ୍ଚ, ଅଭିଯୋଗକାରୀ,କର୍ମଚାରୀ ଓ ଉଭୟ ପକ୍ଷଙ୍କ ଉପସ୍ଥିତିରେ ନିଲାମ ପ୍ରକ୍ରିୟାର ସମସ୍ତ ବିଷୟର କାଗଜପତ୍ର ମାନ ଯାଞ୍ଚ କରିବାବେଳେ ସବୁଠିକ୍ ରହିଥିବାର ଦେଖିବାକୁ ମିଳିଥିଲା । ଏଥିନେଇ ହାଇକୋର୍ଟଙ୍କୁ ଜଣାଯାଇଥିଲା। ମାତ୍ର ମାଛ ଧରିବା ବନ୍ଦ ଲାଗି ହାଇକୋର୍ଟଙ୍କ ପକ୍ଷରୁ ସେମିତି କିଛି ନିର୍ଦ୍ଦେଶ ଆସିନାହିଁ । ଯେହେତୁ ମହିଳାସଂଘ ନିୟମ ପ୍ରକାରେ ଲିଜ୍ନେଇ ଯାହାଂଳ ଛାଡି ଚାଷ କରିଛନ୍ତି । ଏଣୁ ସେମାନେ ମାଛଧରିବାର ଅଧିକାର ରହିଛି ବୋଲି କହିଛନ୍ତି।
