ବମ୍ବେ: ଇଞ୍ଜିନିୟରିଂ କଲେଜରେ ପାଠପଢ଼ା। ହେଲେ ଫିଲ୍ମ ନିର୍ଦ୍ଦେଶନା ବଦଳାଇଦେଇଥିଲା ଜୀବନ। ଆମେ କଥା ହେଉଛୁ ନିର୍ଦ୍ଦେଶକ ରାମ ଗୋପାଳ ବର୍ମାଙ୍କ ବିଷୟରେ। ‘ରଙ୍ଗିଲା’, ‘ସତ୍ୟା’, ‘କମ୍ପାନୀ’ ଭଳି ସୁପରହିଟ୍ ଫିଲ୍ମ ଭେଟି ଦେଇଥିବା ରାମ ଗୋପାଳଙ୍କ ଆଜି ହେଉଛି ଜନ୍ମଦିନ। ଏହି ଅବସରରେ ତାଙ୍କୁ ପ୍ରଶଂସକଙ୍କ ଶୁଭେଚ୍ଛାର ସୁଅ ଛୁଟୁଛି।
ଆନ୍ଧ୍ରପ୍ରଦେଶରେ ଜନ୍ମ ନେଇଥିଲେ ରାମ ଗୋପାଳ। ସେ ବିଜୟଓ୍ବାଡାର ବି.ଆର୍. ସିଦ୍ଧାର୍ଥ ଇଞ୍ଜିନିୟରିଂ କଲେଜରୁ ପାଠପଢ଼ା ସାରିଥିଲେ। ନିର୍ଦ୍ଦେଶନା କ୍ଷେତ୍ରକୁ ଆସିବା ପରେ ଅନେକ ଫିଲ୍ମରେ ସେ ଅଭିନେତ୍ରୀ ଭାବେ ଉର୍ମିଳା ମାତୋଣ୍ଡକରଙ୍କୁ କାଷ୍ଟ କରିଥିଲେ। ସେଥିରୁ ‘ରଙ୍ଗିଲା’ ସୁପରହିଟ୍ ହୋଇଥିଲା। ଏହି ସମୟରେ ରାମ ଗୋପାଳ ଉର୍ମିଳାଙ୍କ ପ୍ରେମରେ ପାଗଳପ୍ରାୟ ହୋଇଯାଇଥିଲେ। ସେ ନିଜ ଅଫିସର ଗୋଟିଏ କୋଠରୀକୁ ଅଭିନେତ୍ରୀଙ୍କ ନାମରେ ରଖିଥିଲେ।
ଏକ ଫିଲ୍ମ ପାଇଁ ରାମଗୋପାଳ ମାଧୁରୀଙ୍କୁ ନାୟିକା ଭାବେ ନେବାକୁ ମନା କରିଦେଇଥିଲେ। ହେଲେ ଉର୍ମିଳା ଏହା ଜାଣିବା ପରେ ଉକ୍ତ ଫିଲ୍ମ କରିବାକୁ ନା କରିଥିଲେ। ହେଲେ ମୋଟ ଉପରେ ଦେଖିଲେ ତେରଟି ଫିଲ୍ମରେ ଏକାଠି କାମ କରିଛନ୍ତି ଉଭୟ।
ଉର୍ମିଳାଙ୍କ ସହ ତାଙ୍କ ସମ୍ପର୍କ କାରଣରୁ ରାମଗୋପାଳ ଏବଂ ସ୍ତ୍ରୀଙ୍କ ବୈବାହିକ ଜୀବନରେ ଝଡ଼ ସୃଷ୍ଟି ହୋଇଥିଲା। ଏଥିରେ ରାଗିଯାଇ ନିର୍ଦ୍ଦେଶକଙ୍କ ସ୍ତ୍ରୀ ଉର୍ମିଳାଙ୍କୁ ଚାପୁଡ଼ା ମାରିବାକୁ ପଛାଇ ନ ଥିଲେ। ହେଲେ କିଛି ଫରକ ପଡ଼ି ନ ଥିଲା। ଅଭିନେତ୍ରୀଙ୍କ ଯୋଗୁ ରାମଗୋପାଳ ସ୍ତ୍ରୀଙ୍କଠାରୁ ଅଲଗା ହୋଇଯାଇଥିଲେ। ଅପରପକ୍ଷେ ଉର୍ମିଳାଙ୍କ କ୍ୟାରିୟର ନିର୍ଦ୍ଦେଶକଙ୍କ ଯୋଗୁ ପ୍ରଭାବିତ ହୋଇଥିଲା। ତାଙ୍କୁ ଫିଲ୍ମରେ ନେବାକୁ ସେତେବେଳେ ଅନ୍ୟ ନିର୍ଦ୍ଦେଶକ ରାଜି ହେଉ ନ ଥିଲେ।
