ଭୁବନେଶ୍ୱର, ୩।୧ (ତପନ ସ୍ବାଇଁ): କଳିଙ୍ଗ ଷ୍ଟାଡିୟମରେ ମଙ୍ଗଳବାର ଜାତୀୟ ସିନିୟର ଆର୍ଟିଷ୍ଟିକ ଜିମ୍ନାଷ୍ଟିକ୍ସ ଚାମ୍ପିୟନଶିପ୍ ଆରମ୍ଭ ହୋଇଛି। ପ୍ରତିଯୋଗିତାର ଅଲ୍ରାଉଣ୍ଡ ବିଭାଗରେ ଓଡ଼ିଶାର ରାକେଶ ପାତ୍ର ଚମତ୍କାର ପ୍ରଦର୍ଶନ କରି ଶୀର୍ଷସ୍ଥାନ ଅଧିକାର କରିଛନ୍ତି। ପୁରୁଷ ଦଳଗତ ବିଭାଗରେ ରେଲଓ୍ବେ ସ୍ବର୍ଣ୍ଣ ପଦକ ଜିତିଥିବାବେଳେ ସର୍ଭିସେସ ରୌପ୍ୟ ଓ ଆୟୋଜକ ଓଡ଼ିଶା ବ୍ରୋଞ୍ଜ ପଦକ ପାଇଛି। ରେଲଓ୍ବେ ୨୯୩.୦୦ ପଏଣ୍ଟ ପାଇଛି। ସର୍ଭିସେସ ୨୯୨.୧୦ ଓ ଓଡ଼ିଶା ୨୯୦.୪୦ ପଏଣ୍ଟ ହାସଲ କରିଛି। ରାଜ୍ୟ କ୍ରୀଡ଼ା ବିଭାଗର ନିର୍ଦ୍ଦେଶକ ସିଦ୍ଧାର୍ଥ ଦାସ ମୁଖ୍ୟ ଅତିଥିଭାବେ ଯୋଗଦେଇ ପ୍ରତିଯୋଗିତାକୁ ଉଦ୍ଘାଟନ କରିଛନ୍ତି। ଓଡ଼ିଶା ଅଲିମ୍ପିକ୍ ଆସୋସିଏଶନ ସମ୍ପାଦକ ଅଭିଜିତ ପାଲ୍ ଓ ଏଏମ୍/ଏନ୍ଏସ୍ର ଅଧିକାରୀମାନେ ଉପସ୍ଥିତ ଥିଲେ। ଲୋକାଲ ହିରୋ ରାକେଶ ଅଲ୍ ରାଉଣ୍ଡ ବିଭାଗରେ ମୋଟ ୭୫.୦୫ ପଏଣ୍ଟ ହାସଲ କରି ଶୀର୍ଷସ୍ଥାନ ଅଧିକାର କରିଥିଲେ। ସେ ଫ୍ଲୋର ଏକ୍ସରସାଇଜ୍ରେ ୧୨.୧୫, ପୋମେଲ ହର୍ଷରେ ୧୧.୩୫, ରିଙ୍ଗ୍ସରେ ୧୪.୧୫, ଭଲ୍ଟରେ ୧୨.୭୫, ପାରାଲାଲ ବାର୍ସରେ ୧୨.୨୦ ଓ ହୋରିଜୋଣ୍ଟାଲ ବାର୍ସରେ ୧୨.୪୫ ପଏଣ୍ଟ ହାସଲ କରିଥିଲେ। ରେଲଓ୍ବେର ସିଦ୍ଧାର୍ଥ ବର୍ମା ୭୪.୭୫ ପଏଣ୍ଟ ସହ ଦ୍ୱିତୀୟ ଓ ସର୍ଭିସେସର ଗୌରବ କୁମାର ୭୪.୬୫ ପଏଣ୍ଟ ପାଇ ତୃତୀୟ ସ୍ଥାନ ଅଧିକାର କରିଛନ୍ତି। ବୁଧବାର ଦ୍ୱିତୀୟ ଦିବସରେ ଅଲିମ୍ପିଆନ ଦୀପା କର୍ମକାର ଓ ପ୍ରଣତି ନାୟକ ଆକ୍ସନରେ ଦେଖିବାକୁ ମିଳିବେ।
