ସୋନପୁର,୨୮।୮(ମୃତ୍ୟୁଞ୍ଜୟ ଶତପଥୀ): କଳା, ସଂସ୍କୃତିର ମାଟି ସୁବର୍ଣ୍ଣପୁରରେ ଆଉ ଜଣେ ଯୁବକ ଚଳଚ୍ଚିତ୍ର ଦୁନିଆରେ ନିଜର ପାଦ ଥାପି ସଫଳତା ପାଇଛନ୍ତି। ଚଳଚ୍ଚିତ୍ର ଦୁନିଆକୁ ଏହି ମାଟିର ସୁଯୋଗ୍ୟ ସନ୍ତାନ ସବ୍ୟସାଚୀ ମହାପାତ୍ର, ପଦ୍ମଶ୍ରୀ ନୀଳମାଧବ ପଣ୍ଡା ଓ ସୂର୍ଯ୍ୟ ଦେଓ ପ୍ରମୁଖଙ୍କ ଅବଦାନ ଅତୁଳନୀୟ। ଏବେ ସୋନପୁର ସହର ଗ୍ରୀଡ୍କୋ ଅଞ୍ଚଳର ଯୁବକ ରାଜକିଶୋର ହୋତା (୩୫) ହିନ୍ଦୀ ସିନେମାରେ କାର୍ଯ୍ୟ କରି ନିଜର ସ୍ବତନ୍ତ୍ର ଛାପ ଛାଡିଛନ୍ତି। ନିକଟରେ ରିଲିଜ୍ ହୋଇଥିବା ହିନ୍ଦୀ ସିନେମା ଡ୍ରିମ୍ଗର୍ଲ ୨ରେ ସେ ସହ ନିର୍ଦ୍ଦେଶକ ଅଛନ୍ତି। ଆୟୁଷ୍ମାନ ଖୁରାନାଙ୍କ ଅଭିନୀତ ଏହି କମେଡି ସିନେମାଟି ବକ୍ସ ଅଫିସରେ ମଧ୍ୟ ଭଲ ନାମ କମାଇଛି। ଏକ ମଧ୍ୟବିତ୍ତ ପରିବାରରେ ଜନ୍ମଗ୍ରହଣ କରିଥିବା ରାଜକିଶୋର ସୋନପୁରରୁ ଭୁବନେଶ୍ୱରକୁ ପାଠ ପଢିବାକୁ ଆସିଥିଲେ। ଭୁବନେଶ୍ୱରରେ ଇଣ୍ଟିଗ୍ରେଟେଡ୍ ଏମ୍ବିଏ କରିବା ସମୟରେ ୨୦୦୮ରେ ସେ ଅଧାରୁ ପାଠ ଛାଡିଥିଲେ। ପରେ ଚଳଚ୍ଚିତ୍ର ଦୁନିଆରେ କାମ କରିବାକୁ ମାୟାନଗରୀ ମୁମ୍ବାଇକୁ ଚାଲି ଯାଇଥିଲେ। ସେଠାରେ ତାଙ୍କୁ ଅନେକ ସଂଘର୍ଷ କରିବାକୁ ପଡିଥିଲା। ପ୍ରଥମେ କିଛି ହିନ୍ଦୀ ସିରିଏଲରେ କାମ କରିଥିଲେ। ନୀଳମାଧବ ପଣ୍ଡାଙ୍କ ଆଇ ଏମ୍ କାଲାମରେ ରାଜକିଶୋର ସହ ନିର୍ଦ୍ଦେଶକ ଭାବେ କାମ କରିବାକୁ ସୁଯୋଗ ପାଇଥିଲେ। ୨୦୨୧ରେ ଓଡ଼ିଶାର ୪୦୦ ଅନୁସୂଚିତ ଜନଜାତି ବର୍ଗର ବାଳିକାଙ୍କୁ ନେଇ ଦି ମାଉଣ୍ଟେନ ହକି ନାମକ ଏକ ଡକ୍ୟୁମେଣ୍ଟାରି ଫିଲ୍ମ କରିଥିଲେ। ୨୦୧୯ରୁ ଡ୍ରିମ୍ ଗାର୍ଲ ୨ ଶୁଟିଂ ଆରମ୍ଭ ହୋଇଥିଲା। ତେବେ କୋଭିଡ୍ ପାଇଁ ଶୁଟିଂ ବନ୍ଦ ରହିବା ସହ ରିଲିଜ୍ ହେବାକୁ ବିଳମ୍ବ ହେଲା। ଶୁଟିଂ ସେଟ୍ରେ ବଡ ଅଭିନେତ୍ରୀ ଓ ଅଭିନେତାଙ୍କ ସହିତ କାମ କରିବାକୁ ସୁଯୋଗ ମିଳିଲା। ଶୁଟିଂ ସମୟରେ ଭଲ ଅନୁଭୂତି ମିଳିବା ସହ ଅନେକ କିଛି ଶିକ୍ଷା ମିଳିଛି। ଆଗକୁ ଆହୁରି ବଡ ବଜେଟର ସିନେମା ଓ ସିରିଏଲ ପାଇଁ ଅଫର ରହିଛି ବୋଲି ରାଜକିଶୋର କହିଛନ୍ତି । ବାପା ଦଶରଥ ହୋତା ସ୍ପିନିଂ ମିଲ୍ରେ କାମ କରୁଥିଲେ। ସ୍ପିନିଂ ମିଲ୍ ବନ୍ଦ ହୋଇଯିବା ପରେ ବାପାଙ୍କୁ ପରିବାର ଚଳାଇବା, ଗୋଟିଏ ଝିଅ ଓ ୨ ପୁଅଙ୍କୁ ପାଠ ପଢାଇ ମଣିଷ କରିବା କଷ୍ଟକର ହୋଇଥିଲା। ଏହି ସଂଘର୍ଷ ସେ ପିଲାବେଳୁ ଦେଖିଛନ୍ତି। ତେଣୁ ଧୈର୍ଯ୍ୟହରା ନ ହୋଇ ପ୍ରାରମ୍ଭିକ ସମୟରେ ତାଙ୍କୁ ମୁମ୍ବାଇରେ ସଂଘର୍ଷ କରିବାକୁ ପଡିଥିଲା। ନିଜର ନିଷ୍ଠା ଓ ଅଧ୍ୟବସାୟ ପାଇଁ ରାଜକିଶୋରଙ୍କୁ ଏବେ ସଫଳତା ମିଳିବାରେ ଲାଗିଛି। ସେ ଏବେ ଗୋଆରେ ଚଳଚ୍ଚିତ୍ର ଶୁଟିଂ କାମରେ ବ୍ୟସ୍ତ ଅଛନ୍ତି।
