ବ୍ରହ୍ମପୁର ଅଫିସ,୨୨ା୫: ସହରର ବସ୍ତି ବାସିନ୍ଦାଙ୍କୁ ଥଇଥାନ ପାଇଁ ବ୍ରହ୍ମପୁର ମହାନଗର ନିଗମ (ବିଇଏମସି) ପକ୍ଷରୁ ସହରର ୧୨ଟି ସ୍ଥାନରେ ରାଜୀବ ଆବାସ ଆପାର୍ଟମେଣ୍ଟ ନିର୍ମାଣ କରାଯାଇଛି। ଯେଉଁଠାରେ ବସ୍ତି ବାସିନ୍ଦାମାନେ ରହିବାର ସୁଯୋଗ ପାଇଛନ୍ତି। ସୂଚନାଥାଉ କି, ବିଇଏମସି ପକ୍ଷରୁ ସହରରେ ୨୧୬୪ଟି ରାଜୀବ ଆବାସ ଗୃହ ନିର୍ମାଣ ଲକ୍ଷ୍ୟ ରଖାଯାଇଥିବା ବେଳେ ବର୍ତ୍ତମାନ ସୁଦ୍ଧା ୨୧୩୨ଟି ରାଜୀବ ଆବାସ ଗୃହ ନିର୍ମାଣ ସରିଛି। ଏଥିମଧ୍ୟରୁ ବିଇଏମସିର ୨୦୨୨-୨୩ ଆର୍ଥିକ ବର୍ଷରେ ୧୬୦ଟି ରାଜୀବ ଆବାସ ଗୃହ ନିର୍ମାଣ ସରିଥିବା ସୂଚନା ମିଳିଛି। ବିଇଏମସି ପକ୍ଷରୁ ନିର୍ମିତ ହେଉଥିବା ରାଜୀବ ଆବାସ ଆପାର୍ଟମେଣ୍ଟ୍ ଗୁଡିକରେ ବସ୍ତି ବାସିନ୍ଦାଙ୍କ ନିମନ୍ତେ ପାନୀୟ ଜଳ, ଆଲୋକୀକରଣ, ଡ୍ରେନେଜ ଓ ସୁଗମ ରାସ୍ତାର ବ୍ୟବସ୍ଥା କରାଯାଇଛି। କିନ୍ତୁ କେତେକ ଆପାର୍ଟମେଣ୍ଟ୍ ଗୁଡିକରେ ଆନୁସଙ୍ଗିକ ସୁବିଧା ନ ଥିବା କାରଣରୁ ବହୁ ବାସିନ୍ଦା ଆପାର୍ଟମେଣ୍ଟରେ ରହି ସମସ୍ୟାର ସମ୍ମୁଖୀନ ହେଉଛନ୍ତି। ଏଥିମଧ୍ୟରୁ ବିଇଏମସି ୨୦ ନଂ ୱାର୍ଡ ଅନ୍ତର୍ଗତ ପୂର୍ଣ୍ଣବାସୀ କଲୋନୀ ରାଜୀବ ଆବାସ ଆପାର୍ଟମେଣ୍ଟ୍ରେ ବହୁ ସମସ୍ୟା ଥିବା ବାସିନ୍ଦାମାନେ ଅଭିଯୋଗ କରିଛନ୍ତି। ଏହି ଆପାର୍ଟମେଣ୍ଟଟି ୨ ବର୍ଷ ହେବ ନିର୍ମାଣ କାର୍ଯ୍ୟ ସରିଛି। ଏଠାରେ ୧୨୮ଟି ଘର ନିର୍ମାଣ ପାଇଁ ଲକ୍ଷ୍ୟ ରଖାଯାଇଥିବା ବେଳେ ୯୬ଟି ଘର ନିର୍ମାଣ ସରିଛି। ବର୍ତ୍ତମାନ ଏହି ଆପାର୍ଟମେଣ୍ଟରେ ୫୦୦ରୁ ଊର୍ଦ୍ଧ୍ୱ ଲୋକ ବସବାସ କରୁଛନ୍ତି। ଆଜକୁ ୧୦ ମାସ ତଳେ ବିଇଏମସି ପକ୍ଷରୁ ଏନଜିଟି ନିୟମ ବଳରେ ପୂର୍ଣ୍ଣବାସୀ କଲୋନୀ ଉଚ୍ଛେଦ ପରେ ଏଠାକାର ବାସିନ୍ଦା ବର୍ତ୍ତମାନ ଆପାଟର୍ର୍ମେଣ୍ଟରେ ରହୁଛନ୍ତି। କିନ୍ତୁ ଆପାର୍ଟମେଣ୍ଟରେ କୌଣସି ସୁବିଧା ନ ଥାଇ ଥଇଥାନ କରିବା କେତେ ଦୂର ଯୁକ୍ତିଯୁକ୍ତ ବୋଲି ରହୁଥିବା ଲୋକେ ପ୍ରଶ୍ନ ଉଠାଇଛନ୍ତି। ସ୍ଥାନୀୟ ବାସିନ୍ଦାଙ୍କ ଅଭିଯୋଗ ମୁତାବକ, ଘର ଗୁଡିକରେ ସିମେଣ୍ଟ୍ ପଲସ୍ତରା ଖସିବା ସହ ଘର ଛାତରୁ ପାଣି ଝରୁଛି। ଏପରିକି ଆପାର୍ଟମେଣ୍ଟ କାନ୍ଥରେ ରହିଥିବା ପାଇପ ଲାଇନ ଗୁଡିକ ଫାଟି ଯାଇଛି। ଅନ୍ୟପଟେ ଏଠାରେ ରହିଥିବା ଡ୍ରେନେଜ ସଫେଇ ହେଉ ନ ଥିବା କାରଣରୁ ବର୍ଷା ଦିନରେ ନର୍ଦ୍ଦମା ପାଣି ଯାତାୟତ ରାସ୍ତାରେ ଭାସମାନ ହେଉଛି। ଫଳରେ ଯାତାୟତ ସମୟରେ ବାଧା ସୃଷ୍ଟି ହେଉଛି। ଦୀର୍ଘ ଦିନ ଧରି ପାଣି ଜମି ରହିବା ଫଳରେ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହୋଇ ମଶା ମାଛିଙ୍କ ପ୍ରାଦୁର୍ଭାବ ବୃଦ୍ଧି ପାଉଛି। ଏଥିସହ ଆପାର୍ଟମେଣ୍ଟକୁ ଆସିବା ନିମନ୍ତେ କାୈଣସି ସୁଗମ ରାସ୍ତା ନାହିଁ। ତତସହିତ ଆପାର୍ଟମେଣ୍ଟ୍ ବାହାରେ କାୈଣସି ଷ୍ଟ୍ରିଟ ଲାଇଟ ନ ଥିବା କାରଣରୁ ରାତ୍ରି ସମୟରେ ଆପାର୍ଟମେଣ୍ଟ୍ ପରିସର ଅନ୍ଧକାର ରହୁଛି। ଏ ବାବଦରେ ବିଇଏମସି କର୍ତ୍ତୃପକ୍ଷଙ୍କୁ ବହୁବାର ଅବଗତ କରାଯାଇଛି। କିନ୍ତୁ ସମସ୍ୟା ସମାଧାନ ଦିଗରେ କାୈଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଆପାର୍ଟମେଣ୍ଟ୍ ବାସିନ୍ଦା ଦାବି କରିଛନ୍ତି। ଏ ନେଇ ବିଇଏମସି ନିର୍ବାହୀ ଯନ୍ତ୍ରୀ ନାଗେଶ୍ୱର ସୁବୁଦ୍ଧିଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ଆପାର୍ଟମେଣ୍ଟ କାର୍ଯ୍ୟ କରିଥିବା ସଂସ୍ଥାକୁ ପୁଣି ଥରେ ଡକାଯାଇ ମରାମତି ସାଙ୍ଗକୁ ଅନ୍ୟାନ୍ୟ ସମସ୍ତ କାର୍ଯ୍ୟ କରାଯିବ ବୋଲି ସେ କହିଛନ୍ତି।
