ଓର୍ଲିନ୍ସ, ୧୦ା୪(ପି.ଟି.): ଡେନ୍ମାର୍କର ମାଗ୍ନସ ଜୋହାନସେନଙ୍କ ବିପକ୍ଷ ଫାଇନାଲରେ ରୋମାଞ୍ଚକ ବିଜୟ ସହ ଭାରତର ପ୍ରିୟାଂଶୁ ରାଜାଓ୍ବତ୍ ଏଠାରେ ଚାଲିଥିବା ଓର୍ଲିନ୍ସ ମାଷ୍ଟର୍ସ ବ୍ୟାଡ୍ମିଣ୍ଟନ ଟୁର୍ନାମେଣ୍ଟର ପୁରୁଷ ସିଙ୍ଗଲ୍ସ ଚାମ୍ପିୟନ ହୋଇଛନ୍ତି। ଏହା ହେଉଛି ତାଙ୍କର ପ୍ରଥମ ବିଡବ୍ଲ୍ୟୁଏଫ୍(ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ)ଓ୍ବାଲର୍ଡ ଟୁର୍ ସୁପର ୩୦୦ ଟାଇଟଲ। ମଧ୍ୟପ୍ରଦେଶର ଏହି ୨୧ ବର୍ଷୀୟ ଖେଳାଳି ୨୦୨୨ରେ ଥୋମାସ୍ କପ୍ ଜିତି ଐତିହାସିକ ସଫଳତା ହାସଲ କରିଥିବା ଭାରତୀୟ ଦଳର ଜଣେ ସଦସ୍ୟ ଥିଲେ। ତେବେ ସେ ମାତ୍ର ଗୋଟିଏ ମ୍ୟାଚ୍ ଖେଳିଥିଲେ।
ଏଠାରେ ସେ ଫାଇନାଲରେ ବିଶ୍ୱର ୪୯ ନମ୍ବର ମାନ୍ୟତାପ୍ରାପ୍ତ ଜୋହାନସେନଙ୍କୁ ୨୧-୧୫, ୧୯-୨୧-୨୧-୧୬ରେ ହରାଇ ଦେଇଛନ୍ତି। ଏହି ମ୍ୟାଚ୍କୁ ସେ ୬୮ ମିନିଟ୍ରେ ଜିତି ତାଙ୍କ କ୍ୟାରିୟରର ସବୁଠାରୁ ବଡ଼ ଟାଇଟଲ ହାସଲ କରିଛନ୍ତି। ସୂଚନାଯୋଗ୍ୟ, ଏହି ଦୁଇ ଖେଳାଳି ଯୋଗ୍ୟତା ପର୍ଯ୍ୟାୟ ମାଧ୍ୟମରେ ଟୁର୍ନାମେଣ୍ଟରେ ଖେଳିବା ସୁଯୋଗ ପାଇଥିଲେ। ରାଜାଓ୍ବତ୍ ୨୦୨୨ ଓଡ଼ିଶା ଓପ୍ନରେ ରନର-ଅପ୍ ଥିଲେ। ଭାରତୀୟ ବ୍ୟାଡ୍ମିଣ୍ଟନ ଆସୋସିଏଶନ(ବାଇ) ଟ୍ରାଏଲ୍ସ ଜିତି ସେ ଥୋମାସ୍ କପ୍ ଟିମ୍ ପାଇଁ ମନୋନୀତ ହୋଇଥିଲେ। ପରେ ସେ ରାୟପୁର ଇଣ୍ଟରନ୍ୟାଶନାଲ ଚ୍ୟାଲେଞ୍ଜ ଜିତିଥିଲେ। ଡିସେମ୍ବରରେ ବାଂଲାଦେଶ ଓପ୍ନରେ ସେ ଦ୍ୱିତୀୟ ସ୍ଥାନ ଅଧିକାର କରିଥିଲେ।
