ଜୟପୁର,୧୬।୪: ରାଜସ୍ଥାନର କରୌଲିରେ ସାମ୍ପ୍ରଦାୟିକ ଦଙ୍ଗା ବେଳେ ଜଣେ ୪୮ ବର୍ଷୀୟ ମହିଳା ଦୁଃସାହସିକତା ଦେଖାଇ ୧୫ ଜଣଙ୍କୁ ସୁରକ୍ଷା ଦେଇପାରିଥିଲେ। ଗତ ୨ ତାରିଖରେ ହିନ୍ଦୁ ନବବର୍ଷ ପାଳନ ଅବସରରେ କରୌଲିରେ ଦଙ୍ଗା ସୃଷ୍ଟି ହୋଇଥିଲା। ଏହି ସମୟରେ ଉତ୍ତ୍ୟକ୍ତ ଲୋକେ ୧୫ ଜଣ (ଅଧିକାଂଶ ମୁସଲମାନ)ଙ୍କୁ ଆକ୍ରମଣ କରିବାକୁ ଉଦ୍ୟମ କରୁଥିବାବେଳେ ମହିଳା ଜଣଙ୍କ ଏକାକୀ ସେମାନଙ୍କ ଆଗରେ ଛିଡ଼ାହୋଇଥିଲେ। ମଧୁଲିକା ସିଂ ନାମ୍ନୀ ମହିଳାଙ୍କର କରୌଲିରେ ଏକ ପୋଷାକ ଦୋକାନ ରହିଛି। ସ୍ବାମୀ ୫ ବର୍ଷ ପୂର୍ବରୁ ପ୍ରାଣ ହରାଇଥିବାବେଳେ ମଧୁଲିକା ବ୍ୟବସାୟ ସମ୍ଭାଳିଛନ୍ତି। ହିନ୍ଦୁ ନବବର୍ଷ ଶୋଭାଯାତ୍ରା ମୁସଲମାନ ବହୁଳ ଉକ୍ତ ବଜାର ଦେଇ ଗଲାବେଳେ ଉତ୍ତେଜନା ଦେଖାଯାଇଥିଲା। ଉଭୟ ସମ୍ପ୍ରଦାୟ ପରସ୍ପର ଉପରକୁ ଢେଲାମାଡ଼ କରିଥିଲେ। ଆକ୍ରମଣ ଭୟରେ ଦୋକାନୀମାନେ ସଟର ପକାଇ ପଳାଇଯାଇଥିଲେ। ଶପିଂ କମ୍ପ୍ଲେକ୍ସରୁ ଲୋକେ ଭୟରେ ଦୌଡ଼ୁଥିବାବେଳେ ମଧୁଲିକା ତାଙ୍କ ଦୋକାନ ବନ୍ଦ କରି ଘଟଣାସ୍ଥଳକୁ ଯାଇ ସେମାନଙ୍କ ପାଖରେ ଛିଡ଼ା ହୋଇଥିଲେ ଓ ବ୍ୟସ୍ତ ନ ହେବା ଲାଗି ପରାମର୍ଶ ଦେଇଥିଲେ। ଶପିଂ କମ୍ପ୍ଲେକ୍ସର ଉପର ମହଲାରେ ଥିବା ତାଙ୍କ ଆପାର୍ଟମେଣ୍ଟରେ ଆଶ୍ରୟ ନେବାକୁ ୧୫ ଜଣ ଧାଇଁ ଆସିଥିଲେ। ମଧୁଲିକା ସେମାନଙ୍କୁ ଆଶ୍ରୟ ଦେବା ସହ ପାଣି ଓ ଚା’ ଦେଇଥିଲେ। ଏଥିସହିତ ଆକ୍ରମଣ ପାଇଁ ସେଠାରେ ପହଞ୍ଚତ୍ଥିବା ଉତ୍ତ୍ୟକ୍ତ ଲୋକଙ୍କୁ ମଧୁଲିକା ଆଗକୁ ବଢ଼ିବାକୁ ଦେଇ ନ ଥିଲେ। ତାଙ୍କର ଏଭଳି କାର୍ଯ୍ୟକୁ ଭୂୟସୀ ପ୍ରଶଂସା କରାଯାଇଛି।
