ଜୟପୁର/ରାୟପୁର,୧୯।୯: କଂଗ୍ରେସ ହାଇକମାଣ୍ଡ ପଞ୍ଜାବରେ ମୁଖ୍ୟମନ୍ତ୍ରୀ ପରିବର୍ତ୍ତନ କରିଛନ୍ତି। ତେବେ ରାଜ୍ୟରେ ନୂଆ ମୁଖ୍ୟମନ୍ତ୍ରୀ ନେଇ ଅଙ୍କକଷା ଜାରି ରହିଛି। ଏବେ ସମସ୍ତଙ୍କ ଆଖି ରାଜସ୍ଥାନ ଏବଂ ଛତିଶଗଡ ଉପରେ ରହିଛି। ଏହି ୨ ରାଜ୍ୟରେ ମଧ୍ୟ ପଞ୍ଜାବ ଭଳି ସମାନ ସମସ୍ୟା ରହିଛି। ରାଜସ୍ଥାନରେ କଂଗ୍ରେସ ନେତା ସଚିନ ପାଇଲଟ ଚାହୁଁଛନ୍ତି ଯେ ତାଙ୍କ ସ୍ଥିତି ପୁଣି ଫେରିଆସୁ। ରାଜ୍ୟରେ ତାଙ୍କୁ ସର୍ବୋଚ୍ଚ ପଦବୀ ପ୍ରଦାନ କରାଯାଉ।
ସେହିପରି ଛତିଶଗଡରେ ଟି.ଏସ. ସିଂହଦେଓ ଚାହୁଁଛନ୍ତି ଯେ ରୋଟୋଶନାଲ ମୁଖ୍ୟମନ୍ତ୍ରୀ ଫର୍ମୂଲା ରାଜ୍ୟରେ ଲାଗୁ ହେଉ। ରାଜସ୍ଥାନରେ ମୁଖ୍ୟମନ୍ତ୍ରୀ ଅଶୋକ ଗେହଲଟ ସଚିନ ପାଇଲଟଙ୍କ ଶିବିର ଦ୍ୱାରା କରାଯାଇଥିବା ଦାବିକୁ ହାଇକମାଣ୍ଡଙ୍କ ନିଷ୍ପତ୍ତି ଯୋଗୁ ଏଡ଼ାଇ ଯାଉଛନ୍ତି। ଏବଂ ଛତିଶଗଡରେ ଭୂପେଶ ବ।ଘେଲ। ଦିଲ୍ଲୀରେ ୫୦ରୁ ଅଧିକ ବିଧାୟକଙ୍କୁ ନେଇ ନିଜର ଶକ୍ତି ପ୍ରଦର୍ଶନ କରି ସାରିଛନ୍ତି। କଂଗ୍ରେସ ନେତୃତ୍ୱର ନିଷ୍ପତ୍ତିକୁ ଅବମାନନା କରାଯାଇଥିବାରୁ ଉଭୟ ରାଜ୍ୟର ମୁଖ୍ୟମନ୍ତ୍ରୀଙ୍କ ଉପରେ ହାଇକମାଣ୍ଡ ଅସନ୍ତୁଷ୍ଟ ରହିଛନ୍ତି।
ପଞ୍ଜାବ ଅପରେଶନ ସହିତ କଂଗ୍ରେସ ହାଇକମାଣ୍ଡ ଅନ୍ୟ ୨ ରାଜ୍ୟର ମୁଖ୍ୟମନ୍ତ୍ରୀଙ୍କୁ ନୂଆ ସଙ୍କେତ ଦେଇଛନ୍ତି। କଂଗ୍ରେସର ସାଧାରଣ ସମ୍ପାଦକ ତଥା ରାଜସ୍ଥାନ ଦାୟିତ୍ୱରେ ଥିବା ଅଜୟ ମାକନ କହିଛନ୍ତି ଯେ ରାଜ୍ୟରେ କ୍ୟାବିନେଟ ବିସ୍ତାର ଏବଂ ସାଂଗଠନିକ ପୁନର୍ଗଠନ ପାଇଁ ରୋଡ ମ୍ୟାପ ପ୍ରସ୍ତୁତ ହୋଇଛି। ମାକନ ଦିଲ୍ଲୀରେ ଏକ ଗଣମାଧ୍ୟମ ସମ୍ମିଳନୀରେ କହିଛନ୍ତି ଯେ ଯଦି ଅଶୋକ ଗେହଲଟ ଅସୁସ୍ଥ ହୋଇ ନ ଥାନ୍ତେ ତେବେ ଆମେ କ୍ୟାବିନେଟ ବିସ୍ତାର କରିଥାନ୍ତୁ। ବୋର୍ଡ ନିଗମ ଏବଂ ଜିଲା ସଭାପତିଙ୍କ ନିଯୁକ୍ତି ପାଇଁ ରୋଡମ୍ୟାପ ପ୍ରସ୍ତୁତ କରାଯାଇଥିବା ସେ ସୂଚନା ଦେଇଛନ୍ତିି। କଂଗ୍ରେସ ନେତା କହିଛନ୍ତି ଯେ ଗେହଲଟ ଏବେ ବି ଅସୁସ୍ଥ ଅଛନ୍ତି ଏବଂ ଘରୁ ତାଙ୍କ କାମ କରୁଛନ୍ତି । ସେ ସୁସ୍ଥ ହେବା ମାତ୍ରେ ଏହା କରାଯିବ।
ସଚିନ ପାଇଲଟଙ୍କ ବିଷୟରେ ପଚରାଯିବାରୁ ସେ କହିଛନ୍ତି ଯେ ରାଜ୍ୟ ସ୍ତରରେ ଆମେ ସମସ୍ତ ପ୍ରସଙ୍ଗ ଉପରେ ଆଲୋଚନା କରୁଛୁ, କିନ୍ତୁ ଯଦି ଏଆଇସିସି ସ୍ତରରେ କିଛି ନିଷ୍ପତ୍ତି ନିଆଯାଏ ତେବେ ଏହା ମୋ ପାଇଁ ସମ୍ପୂର୍ଣ୍ଣ ଅଜଣା।
ସେହିପରି ଛତିଶଗଡରେ ସିଂହଦେଓଙ୍କ ସମର୍ଥକମାନେ ଅଢ଼େଇ ବର୍ଷ କ୍ଷମତାରେ ରହିବା ପରେ ମୁଖ୍ୟମନ୍ତ୍ରୀ ବଦଳାଇବାକୁ ଜିଦ ଧରିଛନ୍ତି। ରୋଟେଶନାଲ ମୁଖ୍ୟମନ୍ତ୍ରୀ ପ୍ରସଙ୍ଗରେ କଂଗ୍ରେସ ଦଳର ଶୀର୍ଷ ନେତୃତ୍ୱଙ୍କଠାରୁ କୌଣସି ସଙ୍କେତ ମିଳି ନାହିଁ। ଫଳରେ ଏହି ପ୍ରସଙ୍ଗ ଏପର୍ଯ୍ୟନ୍ତ ରହସ୍ୟ ଘେରରେ ରହିଛି। ରୋଟେଶନାଲ ମୁଖ୍ୟମନ୍ତ୍ରୀ ଫର୍ମୂଲା ଉପରେ ଗୁରୁତ୍ୱ ଦେଉଥିବା ସିଂହଦେଓ କହିଛନ୍ତି ଯେ ସବୁକିଛି ଦଳର ନେତୃତ୍ୱଙ୍କ ଅଧୀନରେ ଅଛି ଏବଂ ଯାହା ନିଷ୍ପତ୍ତି ନିଆଯିବ, ତାହାକୁ ଆମେ ଗ୍ରହଣ କରିବୁ।
