ସମ୍ବଲପୁର,୨୯।୯(ପ୍ରମୋଦ ବହିଦାର): ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସମ୍ବଲପୁର କାରଖାନା ଓ ବଏଲର୍ସର ସହକାରୀ ନିର୍ଦ୍ଦେଶକ ଉମାକାନ୍ତ ସାମନ୍ତରାୟଙ୍କ ବିରୋଧରେ ଓଡ଼ିଶା ଭିଜିଲାନ୍ସ ବିଭାଗ ପକ୍ଷରୁ ଏକ ବଡ଼ଧରଣର ଚଢ଼ଉ କରାଯାଇଛି । ମଙ୍ଗଳବାର ସକାଳୁ ଭିଜିଲାନ୍ସର ଏକାଧିକ ସ୍ୱତନ୍ତ୍ର ଟିମ୍ ପକ୍ଷରୁ ସମ୍ବଲପୁର, ଭୁବନେଶ୍ୱର, ପୁରୀ ଏବଂ ଖୋର୍ଦ୍ଧା ଜିଲାର ପ୍ରାୟ ୭ଟି ଭିନ୍ନ ଭିନ୍ନ ସ୍ଥାନରେ ଏକକାଳୀନ ଚଢ଼ଉ ଜାରି ରହିଛି।
ସ୍ୱତନ୍ତ୍ର ଭିଜିଲାନ୍ସ କୋର୍ଟର ଜଜ୍ଙ୍କ ପକ୍ଷରୁ ଜାରି ସର୍ଚ୍ଚୱାରେଣ୍ଟ ବଳରେ ଏହି କାର୍ଯ୍ଯାନୁଷ୍ଠାନ ଗ୍ରହଣ କରାଯାଇଛି । ଏହି ଚଢ଼ଉରେ ୮ ଜଣ ଡିଏସପି, ୧୧ ଜଣ ଇନ୍ସପେକ୍ଟର, ୧୧ ଜଣ ଏଏସଆଇ ଏବଂ ଅନ୍ୟାନ୍ୟ କର୍ମଚାରୀ ସାମିଲ ରହିଛନ୍ତି । ସହକାରୀ ନିର୍ଦ୍ଦେଶକ ସାମନ୍ତରାୟ ଆୟର ଉତ୍ସଠାରୁ ବହୁ ଅଧିକ ପରିମାଣର ସମ୍ପତ୍ତି ଠୁଳ କରିଥିବାନେଇ ବିଶେଷ ସୂତ୍ରରୁ ଖବର ପାଇବା ପରେ ଭିଜିଲାନ୍ସ ପକ୍ଷରୁ ଏହି ପଦକ୍ଷେପ ନିଆଯାଇଛି।
ସମ୍ବଲପୁର ସହର ଧନକଉଡ଼ାସ୍ଥିତ ସନସିଟି ଆପାର୍ଟମେଣ୍ଟର ଏକ ୩ ବିଏଚକେ ଫ୍ଲାଟ୍, ଭୁବନେଶ୍ୱର ନନ୍ଦନକାନନ ରୋଡ୍ ନନ୍ଦନ ବିହାରରେ ଥିବା ଏକ ଡୁପ୍ଲେକ୍ସ, ଇଣ୍ଡସ୍ କଲେଜ ଅଫ ଇଞ୍ଜିନିଅରିଂ, ଜଟଣୀ ନିକଟ ବାରକୁଡ଼ାସ୍ଥିତ କୋଠା, ପୁରୀ ବାଳିଗୁଳି ତୋଟାବେହେରା ସାହିସ୍ଥିତ ତ୍ରିତଳ କୋଠା ଏବଂ ଖୋର୍ଦ୍ଧା ବାଲୁଗାଁ ସୁଭାଷ ମାର୍ଗ ତଥା ଅଶୋକ ନଗରରେ ଥିବା ଦୁଇଟି ଦ୍ୱିତଳ କୋଠା ସମେତ ତାଙ୍କର ସମ୍ବଲପୁରସ୍ଥିତ କାର୍ଯ୍ୟାଳୟରେ ଏହି ତଲାସୀ ଅଭିଯାନ ଜାରି ରହିଛି।
ବର୍ତ୍ତମାନ ସୁଦ୍ଧା ତଲାସୀ ପ୍ରକ୍ରିୟା ଜାରି ରହିଥିବାବେଳେ ଆଗକୁ ଆହୁରି କିଛି ଗୁରୁତ୍ୱପୂର୍ଣ୍ଣ ତଥ୍ୟ ଏବଂ ସମ୍ପତ୍ତିର ହିସାବ ସାମ୍ନାକୁ ଆସିବାର ସମ୍ଭାବନା ରହିଛି ବୋଲି ଭିଜିଲାନ୍ସ ସୂତ୍ରରୁ ଜଣାପଡ଼ିଛି।
