ମସ୍କୋ, ୨୯।୫ : ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଚେତାବନୀ ଦିଆଯାଇଛି। ସେ ଆଉ ମାତ୍ର ୩ ବର୍ଷ ବଞ୍ଚିବେ। ରୁଷିଆର ରାଷ୍ଟ୍ରପତି ଭବନ ନେତାଙ୍କ ଅବସ୍ଥାକୁ ନେଇ ଚିନ୍ତିତ ହୋଇପଡ଼ିଛି। ରୁଷିଆର ଗୁପ୍ତଚର ଏଜେନ୍ସି ଏଫଏସବିର ଜଣେ ଅଧିକାରୀ ପୁଟିନଙ୍କ ଅବସ୍ଥାକୁ ଗୁରୁତର ବୋଲି ବର୍ଣ୍ଣନା କରିଛନ୍ତି ଏବଂ କହିଛନ୍ତି ଯେ ତାଙ୍କଠାରେ ଗୁରୁତର କର୍କଟ ସମସ୍ୟା ରହିଛି ।
ଡାକ୍ତରମାନେ ତାଙ୍କୁ ମାତ୍ର ୩ ବର୍ଷ ସମୟ ଦେଇଛନ୍ତି। ଅଧିକାରୀ କହିଛନ୍ତି ଯେ ୟୁକ୍ରେନ ଯୁଦ୍ଧ ପୂର୍ବରୁ ପୁଟିନଙ୍କଠାରେ ଏହି ମାରାତ୍ମକ ସମସ୍ୟା ଥିବା ଜଣାପଡ଼ିଥିଲା। ଏବେ ଦୁଇ ସପ୍ତାହ ପୂର୍ବରୁ ତାଙ୍କର ଅପରେଶନ କରାଯାଇଛି।
ଅଧିକାରୀଙ୍କ ଅନୁଯାୟୀ, ବର୍ତ୍ତମାନ ପୁଟିନଙ୍କ ପାଖରେ ମାତ୍ର ୨ରୁ ୩ ବର୍ଷ ସମୟ ଅଛି। ଧୀରେ ଧୀରେ ତାଙ୍କର ଦେଖିବାର କ୍ଷମତା ମଧ୍ୟ ଦୁର୍ବଳ ହେବାକୁ ଲାଗୁଛି। ଗଣମାଧ୍ୟମ ସଂସ୍ଥା ମିରର ରିପୋର୍ଟରେ ଦର୍ଶାଯାଇଛି ଯେ ପୁଟିନଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିଛି।
ଗୁପ୍ତଚର ଏଜେନ୍ସି ଏଫବିଏସର ପୂର୍ବତନ ଅଧିକାରୀ ବୋରିସ କାର୍ପିଚକୋଭ ଏକ ଗୁପ୍ତ ବାର୍ତ୍ତା ଆଧାରରେ ଏହି ସୂଚନା ପ୍ରଦାନ କରିଛନ୍ତି। ଅଧିକାରୀ ଜଣକ କହିଛନ୍ତି ଯେ ପୁଟିନଙ୍କୁ ଚଷମା ପିନ୍ଧିବାକୁ ଡାକ୍ତରମାନେ କହିଥିଲେ, କିନ୍ତୁ ସେ ତାହା କରିବାକୁ ମନା କରିଦେଇଥିଲେ।
ରିପୋର୍ଟରେ କୁହାଯାଇଛି ଯେ, ପୁଟିନଙ୍କର ୧୬-୧୭ ମେ’ରେ ଅପରେଶନ କରାଯାଇଥିଲା। ଅପରେଶନ ପରେ ମେ ୨୦ ସନ୍ଧ୍ୟାରେ ତାଙ୍କର ସ୍ବାସ୍ଥ୍ୟ ଅବସ୍ଥା ଖରାପ ହୋଇଯାଇଥିଲା। କିନ୍ତୁ ମେ ୨୧ ସକାଳେ ପୁଣି ଥରେ ତାଙ୍କ ସ୍ବାସ୍ଥ୍ୟବସ୍ଥା ସ୍ଥିର ହୋଇଥିଲା।
ପୁଟିନଙ୍କ ଅପରେଶନ ଏପ୍ରିଲର ଦ୍ୱିତୀୟ ସପ୍ତାହରେ ହେବାର ଥିଲା। କିନ୍ତୁ ୟୁକ୍ରେନ ଯୁଦ୍ଧ ଯୋଗୁ ଏଥିରେ ବିଳମ୍ବ ଘଟିଥିଲା।
