ମସ୍କୋ/କିଭ୍,୧।୧ : ବିଶ୍ୱ ପାଇଁ ନୂଆ ବର୍ଷ ଆରମ୍ଭ ହୋଇଥାଇପାରେ, କିନ୍ତୁ ୟୁକ୍ରେନ ପାଇଁ ପରିସ୍ଥିତି ସମାନ ରହିଛି। ଗୋଟିଏ ପଟେ ବିଶ ୨୦୨୩ ନୂଆବର୍ଷର ଉତ୍ସବରେ ବୁଡି ରହିଥିବା ବେଳେ ଅନ୍ୟ ପଟେ ୟୁକ୍ରେନ ରୁଷିଆର ଆକ୍ରମଣର ସମ୍ମୁଖୀନ ହୋଇଛି।
ନୂଆ ବର୍ଷରେ ମଧ୍ୟ ରୁଷିଆର କ୍ଷେପଣାସ୍ତ୍ର ଆକ୍ରମଣ ଜାରି ରହିଛି। ଶନିବାର-ରବିବାର ରାତି ୧୨ଟା ବେଳେ ରୁଷିଆର କ୍ଷେପଣାସ୍ତ୍ର ୟୁକ୍ରେନ୍ର ରାଜଧାନୀ କିଭ୍ ସମେତ ଅନ୍ୟ ସହରକୁ ଟାର୍ଗେଟ କରିଥିଲା। ମେୟର ଭିଟାଲି କ୍ଲିଚକୋ ଏକ ଟେଲିଗ୍ରାମରେ ନିଶ୍ଚିତ କରିଛନ୍ତି ଯେ ନୂତନ ବର୍ଷର ପ୍ରଥମ ବିସ୍ଫୋରଣ ମଧ୍ୟରାତ୍ରିର ପ୍ରାୟ ୩୦ ମିନିଟ ପରେ ଆରମ୍ଭ ହୋଇ ଦୁଇଟି ଜିଲାକୁ ବ୍ୟାପକ କ୍ଷତି ପହଞ୍ଚାଇଛି। ଏହାପୂର୍ବରୁ ଶନିବାର ମଧ୍ୟ ରୁଷିଆ ପ୍ରଶାସନ ଦାବି କରିଥିଲା ଯେ ୨୦ରୁ ଅଧିକ କ୍ରୁଜ କ୍ଷେପଣାସ୍ତ୍ର ନିକ୍ଷେପ କରାଯାଇଥିଲା ଯେଉଁଥିରେ ଅନେକ ଲୋକ ଆହତ ହୋଇଥିଲେ।
ୟୁକ୍ରେନର ରାଜଧାନୀ କିଭ୍ ଉପରେ ଏହି ଆକ୍ରମଣ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ବାର୍ତ୍ତାର କିଛି ସମୟ ପରେ ଘଟିଥିଲା। ନୂତନ ବର୍ଷରେ ତାଙ୍କ ଦେଶବାସୀଙ୍କୁ ସମ୍ବୋଧିତ କରି ଜେଲେନସ୍କି କହିଛନ୍ତି ଯେ ୟୁକ୍ରେନମାନେ ଜିତିବା ପର୍ଯ୍ୟନ୍ତ ଲଢ଼ିବେ। ସେ କହିଛନ୍ତି, ସମଗ୍ର ଦେଶ ଏକ ଦଳ ଭାବେ ଯୁଦ୍ଧ କରୁଛନ୍ତି। ମୁଁ ଏଥିପାଇଁ ସମସ୍ତଙ୍କୁ ପ୍ରଶଂସା କରୁଛି। ମୁଁ ୟୁକ୍ରେନର ପ୍ରତ୍ୟେକ ଅଜେୟ ଅଞ୍ଚଳକୁ ଧନ୍ୟବାଦ ଦେବାକୁ ଚାହୁଁଛି। ଆମେ ଯୁଦ୍ଧ କରିବା ଏବଂ ଜିତିବା ପାଇଁ’ଯୁଦ୍ଧ ଜାରି ରଖିବା। ଏହା ସହିତ ସେ ଭ୍ଳାଡିମିର ପୁଟିନଙ୍କ ଏଭଳି କାର୍ଯ୍ୟକୁ ନିନ୍ଦା କରିଛନ୍ତି।
