ଭଞ୍ଜନଗର,୨୩।୧(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ତାଲୁକ ଆଇନ ସେବା କମିଟି ପକ୍ଷରୁ ଶୁକ୍ରବାର ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟରେ ଏକ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଭଞ୍ଜନଗର ଅତିରିକ୍ତ ଜିଲା ଦୌରାଜଜ ତଥା ଅଧ୍ୟକ୍ଷ, ତାଲୁକ ଆଇନ ସେବା କମିଟି ସେଖ ମହମ୍ମଦ କଏସ ମୁଖ୍ୟ ଅତିଥି ଭାବେ ଯୋଗଦେଇ ପୋଷ ଆଇନ (କାର୍ଯ୍ୟସ୍ଥଳରେ ଯୌନ ଉତ୍ପୀଡନ ନିରୋଧ ଆଇନ), ସାମ୍ବିଧାନିକ ଅଧିକାର ଓ ନାଗରିକଙ୍କ କର୍ତ୍ତବ୍ୟ ସମ୍ପର୍କରେ କହିଥିଲେ। ଏଥିସହ ସେ କହିଥିଲେ ଯେ, ଲୋକେ ଆଇନ ବିଷୟରେ ସଚେତନ ଥିଲେ ସମାଜରେ ନ୍ୟାୟ ଓ ସମତା ପ୍ରତିଷ୍ଠା ହୋଇପାରିବ। ଆଇନରୁ ଉର୍ଦ୍ଧ୍ୱରୁ କିଏ ନାହିଁ, ସମ୍ବିଧାନ ହେଉଛି ଶ୍ରେଷ୍ଠ। ଅନ୍ୟକୁ ନୀଚ ଦେଖାଇବା ଠିକ ନୁହଁ। ଅଧିକାର ଚାହୁଁଛ ତେବେ କର୍ତ୍ତବ୍ୟ ମଧ୍ୟ ଠିକ ଭାବେ କରିବାକୁ ପଡ଼ିବ। ଶାନ୍ତିପୂର୍ଣ୍ଣ ଭାବେ ଆମ ଦେଶରେ ବସବାସ କରିବା ଆମର ଅଧିକାର ଅଛି। ଆମ ଦେଶର ସମ୍ବିଧାନ ହେଉଛି ବିଶର ବୃହତ୍ତମ ଓ ଶକ୍ତିଶାଳୀ ସମ୍ବିଧାନ। ଅନେକ ଦେଶର ସମ୍ବିଧାନ ବିଫଳ ହୋଇଛି। କିନ୍ତୁ ଆମ ସମ୍ବିଧାନ ଆମକୁ ଶାନ୍ତିରେ ରହିବାକୁ ଦେଇଛି। ଏଠି ସବୁ ଧର୍ମର ଲୋକ ବସବାସ କରନ୍ତି। ଆମକୁ ସ୍ବାଧୀନତା ମିଳିଛି ବୋଲି ଅନ୍ୟର କିଛି କ୍ଷତି ହେଲାଭଳି କାର୍ଯ୍ୟ କରିବା ନାହିଁ। ସନ୍ଦେହର କାହାକୁ ଦଣ୍ଡିତ କରିବା ନାହିଁ। ସେଥିପାଇଁ ଆଇନ ଅଛି। ଅନ୍ୟର ସମ୍ମାନକୁ ଆଖି ଆଗରେ ରଖି ବକ୍ତବ୍ୟ ଦେବାକୁ ପଡିବ। ବିନା ଆଇନ ପ୍ରକ୍ରିୟାରେ କାହାକୁ ଦଣ୍ଡ ଦେଇହେବ ନାହିଁ। ଯଦି ଏଭଳି ବେନିୟମ କାର୍ଯ୍ୟ କିଏ କରେ ତେବେ ତାହା ଅପରାଧ। ଜାତୀୟ ପତାକା, ଜାତୀୟ ସଙ୍ଗୀତ ଏବଂ ସମ୍ବିଧାନକୁ ସମ୍ମାନ ଦେବା। ସ୍ବାଧୀନତା ସଂଗ୍ରାମୀମାନଙ୍କ ବିରୋଧର ମନ୍ତବ୍ୟ ଦେବା ଠିକ ନୁହେଁ। ସେମାନେ ଦେଶ ସ୍ବାଧୀନତା ପାଇଁ ବହୁ କଷ୍ଟ ସ୍ବୀକାର କରିଛନ୍ତି। ଜାତୀୟ ପତାକାକୁ ସର୍ବଦା ଅଣ୍ଟା ଉପରକୁ ପିନ୍ଧିବା। ୧୯୭୬ ମସିହା ପୂର୍ବରୁ ଅଧିକାର ଉପରେ ଆଲୋଚନା ହେଉଥିଲା। କିନ୍ତୁ ୧୯୭୬ ମସିହାରେ ଜରୁରୀକାଳୀନ ପରିସ୍ଥିତି ପରେ ମୌଳିକ କର୍ତ୍ତବ୍ୟ କଥା ଆସିଥିଲା । ତେଣୁ ଅଧିକାର ହାସଲ କରିବାକୁ ହେଲେ ନିଜ କର୍ତ୍ତବ୍ୟ ସଠିକ ଭାବେ ପାଳନ କରିବାକୁ ପଡିବ ବୋଲି ବିଚାରପତି ସେଖ ମହମ୍ମଦ କଏସ କହିଥିଲେ।
ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ ଭିୟେନା ନାୟକ ଯୋଗଦେଇ ଛାତ୍ରୀଛାତ୍ର ମାନଙ୍କୁ ଆଇନଗତ ଅଧିକାର ସହ ନିଜ କର୍ତ୍ତବ୍ୟ ପ୍ରତି ସଚେତନ ରହିବାକୁ ଆହ୍ବାନ କରିଥିଲେ। ସେ ମହିଳା ସୁରକ୍ଷା, ସମ୍ମାନ ଓ କାର୍ଯ୍ୟସ୍ଥଳରେ ସୁରକ୍ଷିତ ପରିବେଶର ଗୁରୁତ୍ୱ ଉପରେ ମଧ୍ୟ କହିଥିଲେ।
ଏସଡିପିଓ ଡ଼ା. ଦୀପକ କୁମାର ମିଶ୍ର ପୋଲିସ ବ୍ୟବସ୍ଥା, ଆଇନ ରକ୍ଷାରେ ନାଗରିକଙ୍କ ଭୂମିକା ଓ ଅପରାଧ ପ୍ରତିରୋଧରେ ସାମାଜିକ ସହଯୋଗର ଆବଶ୍ୟକତା ବିଷୟରେ କହିଥିଲେ। ଆଇନ ସହାୟତା ସଦସ୍ୟ ଡ଼ା. ପୂର୍ଣ୍ଣଚନ୍ଦ୍ର ତ୍ରିପାଠୀ ମାଗଣା ଆଇନ ସହାୟତା ସେବା, ଲୋକ ଅଦାଲତ ଓ ଆଇନ ସେବା ପ୍ରାପ୍ତି ପ୍ରକ୍ରିୟା ସମ୍ପର୍କରେ କହିଥିଲେ। ସଭ୍ୟା ଅଲକା ମଞ୍ଜରୀ ପଟ୍ଟନାୟକ ମହିଳା ଓ ଛାତ୍ରୀଛାତ୍ରଙ୍କ ପାଇଁ ଉପଲବ୍ଧ ଆଇନଗତ ସୁରକ୍ଷା ବ୍ୟବସ୍ଥା ଉପରେ ଆଲୋକପାତ କରିବା ସହ ସଭାକୁ ସଂଯୋଜନା କରିଥିଲେ। କଲେଜ ଅଧ୍ୟକ୍ଷ ରାଜେନ୍ଦ୍ର କୁମାର ଦାଶ ଅତିଥିଙ୍କୁ ସ୍ବାଗତ କରିଥିଲେ । ଅଧ୍ୟାପିକା ସୁନିତା ରାଣୀ ଖଣ୍ଡୁଆଳ ଧନ୍ୟବାଦ ପ୍ରଦାନ କରିଥିଲେ। କାର୍ଯ୍ୟକ୍ରମକୁ ପରିଚାଳନା କରିବାରେ କୋର୍ଟ କର୍ମଚାରୀ ଅଙ୍କନ ପ୍ରଧାନ, ଏନଏସଏସ ଶାଖା ୧ ଅଧିକାରୀ ବି ପ୍ରଧାନ, ଏନ ସି ସି ଆର୍ମି ୱିଙ୍ଗ ସିଟିଓ ଅର୍ପଣ ପ୍ରଧାନ, ଏନସିସି ନାଭାଲ ୱିଙ୍ଗ ସିଟିଓ ବିଭୂତି ଗୌଡ, ଯୁବ ରେଡକ୍ରସ ଅଧିକାରୀ ବିଦେଶୀ ରାଉତ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ।
Dharitri – Odisha’s No.1 Odia Daily
