କେନ୍ଦ୍ରାପଡ଼ା ଅଫିସ, ୨୧।୮: ବୁଧବାର ସକାଳ ୮ଟା ସୁଦ୍ଧା ୨୪ ଘଣ୍ଟା ମଧ୍ୟରେ କେନ୍ଦ୍ରାପଡ଼ା ଜିଲାର ବିଭିନ୍ନ ବ୍ଲକରେ ମୋଟ ୫୭୧ ମିଲିମିଟର ବର୍ଷା ହୋଇଛି। ମହାନଦୀ ଓ ବ୍ରାହ୍ମଣୀ ସିଷ୍ଟମ, ଖରସ୍ରୋତାରେ ବନ୍ୟାଜଳ ପ୍ରବାହିତ ହେଉଥିବାରୁ ଜିଲାର ଜନଜୀବନ ଅସ୍ତବ୍ୟସ୍ତ ହୋଇପଡିଛି। ଉପାନ୍ତ ଅଞ୍ଚଳରେ ନଦୀବନ୍ଧ ନ ଥିବାରୁ ୫୫ ପଞ୍ଚାୟତରେ ବର୍ଷା ଓ ବନ୍ୟାଜଳ ପଶିବାକୁ ଆରମ୍ଭ କରିଛି। ସେହିପର ନିଷ୍କାସନ ପଥ ପରିଷ୍କାର ନ ଥିବାରୁ ଚାଷ କ୍ଷେତରେ ପାଣି ଜମିରହିଛି। ଆଳି ଗୋବିନ୍ଦପୁର ଗ୍ରାମର ନବ କିଶୋର ମିଶ୍ର କହନ୍ତି, ଖରସ୍ରୋତାରେ ବନ୍ୟା ଜଳ ଆସିବା ପରେ ଧୋୟାଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା। ବ୍ରାହ୍ମଣୀ ବନ୍ୟା ଜଳ ଏଥିରେ ମିଶିବା ପରେ ସିଂହଗଁା, କୃଷ୍ଣଦାସପୁର, ବଡ ରାଉଳିଆ, ପେଣ୍ଠପାଳ ତରଡିପାଳ, ବଲୁରିଆ, ଅମୃତମଣୋହୀ, ଅଣ୍ଡରା, ବାଲିପାଟଣା, ବଛରା, ତାରପୁର, ଶ୍ରୀରାମପୁର ଆଦି ଗ୍ରାମଗୁଡିକରେ ବର୍ଷା ଓ ବନ୍ୟା ଜଳ ପଶିଛି। ଏହି ଗ୍ରାମରୁ ବାହାରକୁ ଆସିବା ପାଇଁ ଏବେ ଡଙ୍ଗାର ଆବଶ୍ୟକତା ପଡୁଛି। ସେହିପରି ମାନପୁରରୁ ଗୋବିନ୍ଦପୁର ମୁଖ୍ୟ ରାସ୍ତାର କେତେକ ସ୍ଥାନରେ ୨ରୁ ୩ ଫୁଟ ପର୍ଯ୍ୟନ୍ତ ବନ୍ୟା ଜଳ ପ୍ରବାହିତ ହେଉଛି। ପେତପଡା, ଠାକୁରପାଟଣା, ମଦନଗିରି, ଖରଖରି, ବାରମାଣିଆ ଆଦି ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି। କୃଷକ ନେତା ଗୟାଧର ଧଳ କହନ୍ତି, ହୀରାକୁଦରେ ଗେଟ ଖୋଲା ପରେ ମହାନଦୀ ସିଷ୍ଟମରେ ଥିବା ଚିତ୍ରୋତ୍ପଳା, ପାଇକା, ଗୋବରୀ, ଲୁଣା ଆଦି ନଦୀର ଜଳସ୍ତର ବଢ଼ୁଛି। ଫଳରେ ଜିଲାର ଉପାନ୍ତ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ବର୍ଷାକୁ ଲକ୍ଷ୍ୟ ରଖି ଚଳିତବର୍ଷ ୧ ଲକ୍ଷ ୨୪ ହଜାର ହେକ୍ଟର ଜମିରେ ଖରିଫ ଚାଷ ଆରମ୍ଭ ହୋଇଥିଲା। ଏଥିମଧ୍ୟରୁ ପ୍ରାୟ ୯୦ ହଜାର ହେକ୍ଟର କ୍ଷେତରେ ପାଣି ଜମି ରହିଛି। ଜଳ ନିଷ୍କାସନ ପଥ ନ ଥିବାରୁ ଫସଲ ପଚିବା ଆରମ୍ଭ ହୋଇଛି। ତୁରନ୍ତ ଜିଲା ପ୍ରଶାସନ ପକ୍ଷରୁ କ୍ଷୟକ୍ଷତି ତଦନ୍ତ କରାଯାଇ କ୍ଷତିପୂରଣ ଦେବା ପାଇଁ ସେ ଦାବି କରିଛନ୍ତି। ଏ ସମ୍ପର୍କରେ ଜିଲାପାଳ ସମର୍ଥ ବର୍ମା କହିଛନ୍ତି, ବନ୍ୟା ପରିସ୍ଥିତିର ସମ୍ମୁଖୀନ ପାଇଁ ଜିଲା ପ୍ରଶାସନ ପକ୍ଷରୁ ସତର୍କତା ଅବଲମ୍ବନ କରାଯାଇଛି। ପ୍ରତି ବ୍ଲକରେ ଶୁଖିଲା ଖାଦ୍ୟ ଓ ଅତ୍ୟାବଶ୍ୟକ ସାମଗ୍ରୀ ମହଜୁଦ ହୋଇଛି। ଜିଲା କୃଷି ଅଧିକାରୀଙ୍କୁ କ୍ଷତିଗ୍ରସ୍ତ ଚାଷ ସମ୍ପର୍କରେ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦିଆଯାଇଛି।
