ଦିଗପହଣ୍ଡି,୧୨ା୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସହରକୁ ମୌଳାଭଞ୍ଜା ସ୍ଥିତ ଘୋଡ଼ାହାଡ଼ ନଦୀରୁ ସ୍ଥାନୀୟ ଜନସ୍ବାସ୍ଥ୍ୟ ପାନୀୟଜଳ (ପିଏଚଡି) କାର୍ଯ୍ୟାଳୟ ପକ୍ଷରୁ ପାଇପ ଯୋଗେ ପାନୀୟ ଜଳ ଯୋଗାଣ କରାଯାଉଛି । ତେବେ ବୁଧବାର ଭୋରରୁ ପାଇପରେ ଦୂଷିତ ଗୋଳିଆ ପାଣି ଛଡା ଯାଇଥିବାରୁ ତୀବ୍ର ଜନଅସନ୍ତୋଷ ପ୍ରକାଶ ପାଇଛି । ଉକ୍ତ ପାଣି ପିଇବା ପାଇଁ ସମ୍ପୂର୍ଣ୍ଣ ଅନୁପଯୁକ୍ତ ବୋଲି ଜଣାପଡିଛି । ଦିଗପହଣ୍ଡି ଏନଏସି ୧୧ ଟି ୱାର୍ଡ ଅଧିନ ସାହି ବସ୍ତି ମାନଙ୍କରେ ରହୁଥିବା ପ୍ରାୟ ୩୮୦୦ ଘର କୁ ଲୋକେ ପାଣି ପାଇପ ସଂଯୋଗ ନେଇଛନ୍ତି । ସେହିପରି ୬୦ ରୁ ଉର୍ଦ୍ଧ୍ବ ଷ୍ଟାଣ୍ଡ ପୋଷ୍ଟ ଜରିଆରେ ଲୋକଙ୍କୁ ପାଇପ ପାଣି ଯୋଗାଇ ଦିଆଯାଉଛି । ସେହିପରି ମଳାଭଞ୍ଜା ନଦୀରୁ ମୋଟର ଯୋଗେ ପାଣି ଉଠାଣ ରେ ନିଅଣ୍ଟିଆ ପରିସ୍ଥିତି ସୃଷ୍ଟି ହେଲେ ସହରର ହସ୍ପିଟାଲ ରାସ୍ତାରେ ଜନସ୍ବାସ୍ଥ୍ୟ ପାନୀୟଜଳ ବିଭାଗ ପକ୍ଷରୁ ବୋର୍ ଖୋଳି ନିର୍ମାଣ କରାଯାଇଥିବା ସମ୍ପ୍ ରୁ ବିଶୁଦ୍ଧ ପାନୀୟ ଜଳ ଯୋଗାଣ କରାଯାଉଛି। କିନ୍ତୁ ସହର ବାସିନ୍ଦାଙ୍କୁ ଗୋଳିଆ ପାଣି ଯୋଗାଣକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ସହରାଞ୍ଚଳ ଜନସ୍ବାସ୍ଥ୍ୟ ବିଭାଗ ପକ୍ଷରୁ ନିର୍ଦ୍ଧାରିତ ସମୟରେ ଜଳ ଯୋଗାଣ କରାଯାଉନାହିଁ ।କର୍ମଚାରୀମାନେ ତାଙ୍କ ମନ ଇଚ୍ଛା ପାଣି ଛାଡୁଛନ୍ତି । ନିୟମିତ ବ୍ୟବଧାନରେ ଟାଙ୍କିକୁ ବ୍ଲିଚିଂ ଦ୍ଵାରା ଶୋଧନ କରାଯାଉନାହିଁ । ଭାଙ୍ଗି ଯାଇଥିବା ଅନେକ ଷ୍ଟାଣ୍ଡପୋଷ୍ଟ ଗୁଡ଼ିକୁ ମାସାଧିକ କାଳ ମରାମତି କରାଯାଉନାହିଁ । ବିଶେଷକରି ୧ ନଂ ୱାର୍ଡର ଅନେକ ସାହି ବସ୍ତିକୁ ପାଣି ଯାଉନାହିଁ ବୋଲି ସିପିଆଇର ସହର କମିଟି ସମ୍ପାଦକ ତପନ କୁମାର ମିଶ୍ର ଅଭିଯୋଗ କରିଛନ୍ତି । ଏନେଇ ବିଭାଗୀୟ ଯନ୍ତ୍ରୀ ଇଂ. ଅଜିତ କୁମାର ବସ୍ତିଆଙ୍କୁ ପଚାରିବାରୁ ସୋମବାର ମଳାଭଞ୍ଜା ନଦୀ ପଠାରୁ ବାଲି ଉତ୍ତୋଳନ ପାଇଁ ଯାଇଥିବା ହାଇୱା ଜେସିବି ମେସିନ ପ୍ରକଳ୍ପର ରାଇଜିଂ ପାଇପକୁ ଖୋଳି ଭାଙ୍ଗି ଦେଇଥିବା କାରଣରୁ ସହରକୁ ପାଇପ ଜରିଆରେ ପାଣି ଯୋଗାଣରେ ବାଧା ସୃଷ୍ଟି ହୋଇଥିଲା।
ମଙ୍ଗଳବାର ସକାଳୁ ବିଳମ୍ବିତ ରାତି ଯାଏଁ ପାଇପ ମରାମତି କରାଯିବା ସମୟରେ ଗୋଳି ପାଣି ପାଇପରେ ପ୍ରବେଶ କରିଯାଇଥିଲା। ସେହିପରି ପ୍ରକଳ୍ପର ୩ ନଂ ମୋଟରଟି ପୋଡ଼ି ଯାଇଥିବାରୁ ନଦୀରୁ ପାଣି ଉତ୍ତୋଳନରେ ସମସ୍ୟା ସୃଷ୍ଟି ହୋଇଥିଲା। ଅନ୍ୟ ଏକ ପାଇପ ଲାଇନରେ ଲିକେଜ୍ ଥିବାରୁ ତାହାକୁ ପରିବର୍ତ୍ତନ କରାଗଲା। ବୁଧବାର ପ୍ରକଳ୍ପର ୨ ଟାଙ୍କି କୁ ସମ୍ପୂର୍ଣ୍ଣ ସଫା କରାଯାଇଛି। ଗୁରୁବାର ଭୋରରୁ ଟାଙ୍କିରେ ଥିବା ପାଣିକୁ ବିଶୋଧିତ କରାଯାଇ ନିରବଚ୍ଛିନ୍ନ ଭାବେ ବାସିନ୍ଦାଙ୍କୁ ଯୋଗାଣ ପାଇଁ ସମସ୍ତ ଆନୁସଙ୍ଗିକ କାର୍ଯ୍ୟ ସରିଥିବା ସେ କହିଛନ୍ତି । ସହରର ଥାନା ନିକଟରେ ୬ ଲକ୍ଷ ୫୦ ହଜାର ଲିଟର ବିଶିଷ୍ଟ ଓଭରହେଡ୍ ଟାଙ୍କି ନିର୍ମାଣ ଚାଲିଛି । ଆଗାମୀ ମାସେ ଦୁଇମାସ ମଧ୍ୟରେ ନିର୍ମାଣ କାମ ସରିଗଲେ ପାଣି ପାଇଁ ଆଉ ସମସ୍ୟା ରହିବ ନାହିଁ।
ସେହିପରି ମେଗା ପ୍ରକଳ୍ପ କାର୍ଯ୍ୟ ସରିଗଲେ ସହରକୁ ଉକ୍ତ ପ୍ରକଳ୍ପରୁ ଦୈନିକ ୩ ଲକ୍ଷ ଲିଟର ପାଣି ଯୋଗାଣ କରାଯିବ ବୋଲି ସରକାରୀ ସ୍ତରରେ ନିଷ୍ପତ୍ତି ନିଆଯାଇଥିବା ବେଳେ ପ୍ରତିଦିନ ସହରାଞ୍ଚଳ ବାସିନ୍ଦାଙ୍କୁ ନିର୍ଦ୍ଧାରିତ ସମୟରେ ପାଇପ ଯୋଗେ ପାନୀୟ ଜଳ ଯୋଗାଣ କରାଯାଉଛି । ନିର୍ଦ୍ଦିଷ୍ଟ ଅଭିଯୋଗ ମିଳିଲେ କର୍ମଚାରୀମାନେ ଷ୍ଟାଣ୍ଡପୋଷ୍ଟ ମରାମତି କରିବାରେ କୌଣସି ଅସୁବିଧା ହେବ ନାହିଁ ବୋଲି ସେ କହିଛନ୍ତି ।
